Read idoma AÍJĒ KÚ Ɛ̄GBĀ 12 Bible Online

AÍJĒ KÚ Ɛ̄GBĀ 12 - idoma bible

AÍJĒ KÚ Ɛ̄GBĀ 12

¹Óndú, kócōō lɛ alɔ hɛ́tá, ohígbū ka ɔ̄cɛ o yá ucē okpaakpa mɛ́mla ucē olɔhi í kē yɔ̄ gɛ ŋ́. Ācɛ ɔ̄kwɛ̄yi ā í tōō má ipú alɛɛcɛ gɛ ŋ́.

²Ācɛ dóódu bá ī kɛ̄mgbɛ̄ lɛ ɔ́mpa uwā. É bī okónu o yá ɔ̄cɛ ɛbɛ́ yɔ̄ ī plla ɔ́mpa uwā.

³Óndú, lɛ okónū ká ācɛ nōo gē yá ācɛ ɛbɛ́ ā gwū, kú okónu ká ācɛ nōo gē gwō ā kóō le klá.

⁴Ācɛ ɛ́gɔ́ɔmā gē da iyī uwā kahíníī, “Alɔ gē bī ɛlā kú okónu kú alɔ gē le lɛ ɔdā dóódu nōo he alɔ ɔtū. Ɔ̄cɛ dóódu í kē yɔ̄ nōo ī da alɔ ɔdā dúúmā glá ŋ́.”

⁵Óndú ā kahíníī, “N géē wā í gbō aógbɛhá ā ɛ́gɛ́nɛ̄ é tíne ā, ohígbū kéē bá ī pīya uwá tū, klla bá ī yá uwā ōwē, nōo cɛ̄ lɛ uwá bá ī tíifu.”

⁶Okónu nɛ̄ Óndú ā ce ā, wɛ ɛ́nɛ́ɛ́nɛ̄. Ó kē wɛ okónu nɛ̄ ɔ̄cɛ lɛ ɔtūce ɔ́ glá. Ó wɛ ɔkwɔ̄ɔ̄kwɛ̄yi bɛ̄ɛka oje nɛ̄hɛ́ nēé bī ɔlá le na ɔ́ igbo ahāapa ā.

⁷Óndú, gbō alɔ piyóó ipú ɛcɛ nyā. Gbō alɔ ŋmá abɔ̄ kú ācɛ obɔ̄bí kú eko nyā.

⁸Ācobɔ̄bíipú bá ī yɛ ɛga dóódu. Odúúdú ācɛ bá ī cɛ̄tra ɔdōbɔ̄bī nɛ̄ ācɛ bá yɔ̄ ī yá ā.