Read idoma AÍJĒ KÚ Ɛ̄GBĀ 132 Bible Online

AÍJĒ KÚ Ɛ̄GBĀ 132 - idoma bible

AÍJĒ KÚ Ɛ̄GBĀ 132

¹Óndú, gbɛlá kwu Udéfīdi ohígbū odúúdú ōwē nɛ̄ ó má ā.

²Óndú, blakwu okónu nōó cē gā uwɔ ā. Blakwu ɔkpá nɛ̄ ó le ce iyí nū gā uwɔ, nōo wɛ olɔfú nɛ̄hi kú Ujékɔ̄pu ā kahíníī,

³“Ń gáā ga ɔlɛ́ um, ɛɛ́ nɛ̄ n gē gwutá agōdō ŋ́,

⁴ń gáā leyī yá iyɔ̄lā ŋ́, ɛ́ɛ́ nɛ̄ n gē héyī bené kú iyɔ̄lā ŋ́

⁵jāā gbéeko nɛ̄ n lɛ ɛga nɛ̄ ikpati kú okónu ōce kú Óndú ā géē yɔ̄ ā tútū. Gbéeko nɛ̄ n lɛ ɛga nɛ̄ Ɔwɔicō kú Ujékɔ̄pu, nōo lɔfú nɛ̄hi ā géē lā ā tútū”

⁶ Alɔ pó ɔ̄kā lɛyíkwu ikpati kú okónu ōce kú Óndú ā Ubɛ́tulɛhɛ̄m. Alɔ le ikpati kú okónu ōce kú Óndú ā, pīyɛ̄ ipú ɛhɔ̄ kú ɔlɛ́ ɔ̄cɛ éyi ajɛ kú Ujɛyarím.

⁷Anɔ́ɔ alɔ kahíníī, “Alɔ nyɔ̄ ipú Agblīihɔ-nɛ̄hi kú Óndú ā, cɛ́ɛ́ ká alɔ gáā gbɔ̄ɔkɔ lɛ Óndú ā ipú nū, iyɔ̄bū ede kú nū.”

⁸Óndú! wā ipú Agblīihɔ-nɛ̄hi kú uwɔ, ká ā gáā klá mla ikpati kú okónu ōce nōo ī cābɔ̄ ɔfú mla íkwu kú uwɔ ā.

⁹Ká ācogwɛ́ɛya kú uwɔ ā, kéē yá ɔdā nōo le kpaakpa ipéyī kú uwɔ ojigógó, ɛ́gɛ́nɛ̄ ɔ̄cɛ gē lɛ úwé wiyē ā. Cɛ́ɛ́ ká ācɛ kú uwɔ kéē gwéeyē kéē tɔ́ɔga.

¹⁰Ohígbū ɔ̄cocɛ̄hɔ̄ kú uwɔ Udéfīdi ā, á híī tá ɔcɛ́ kú uwɔ nāa le anɔ̄ tū ɔ̄ ɛyí ā ŋ́.

¹¹ Óndú leokónu ce lɛ Udéfīdi klla lɛ ɔkpā ce īyī uwɔ, nɛ̄ á gáā tá nyílá glá gbóógbóō ŋ́ kahíníī, “N géē je ɔyí uwɔ éyi ce ɔcɛ́, kóō gbō ajɛ eko nāa gēkwú.

¹²Ɔ́dāŋ ka ayí uwɔ ā lɛ íne mɛ́mla ɔ́da mɛ́mla okónu nɛ̄ n ce ā tū, é géē bá ī lé ɔcɛ́ piyóó ipú ajɛ kú Ísrɛ̄lu.”

¹³Óndú ā le Usáyɔn fu ɛɛ́, ó kē tíne kóō lā abɔ́ɔ.

¹⁴Óndú, a kahíníī, “Amānyā géē wɛ ɛga nɛ̄ n géē lā piyóó á, amānyā nɛ̄ n gáā ce ɔcɛ́ á, ohígbū ka ó he um ɔtū.

¹⁵N géē hɔ́hā ce Usáyɔn, í kpó ɔdā dóódu nōo cɛgbá ā lɛ ɔ́ cabá cabá, n klla í je ɔdōlé lɛ aógbɛhá kú Usáyɔn kéē lé nū ipú.

¹⁶N géē hɔ́hā ce odúúdú ɔdā nɛ̄ ācogwɛ́ɛya kú nū géē yá ā. Odúúdú ācɛ ɔlɛ́ um nēe lā abɔ́ɔ ā géē tɔ́ɔga kú éeyē.

¹⁷ N géē je éyi kú ayí kú Udéfīdi pīya ɔcɛ́ nɛ̄hi, Usáyɔn abɔ́ɔ. N kē í yá ká ɔcɛ́ nɛ̄ n fu ā kóō cɛ ɔcɛ́ piyóó.

¹⁸N géē je uwēyī lɛ aólɛlā kú nū, amáŋ ajɔ̄ɔ̄cɛ́ kú ɔcɛ́ kú igelī nɛ̄hi ā géē yɔ̄ ī jɛ̄ gɔbū, í yɔ̄ ī gbagbénú.”