Read idoma AÍJĒ KÚ Ɛ̄GBĀ 138 Bible Online

AÍJĒ KÚ Ɛ̄GBĀ 138 - idoma bible

AÍJĒ KÚ Ɛ̄GBĀ 138

¹Óndú, n tá uwɔ ahínyá mla odúúdú ɔtū kú um, N yɔ̄ ī gwíijē ī cɛ̄tra uwɔ iyɔ̄bū aɔ́wɔ ɔhá ā.

²N túkpɛɛ́ pīyeyī kwu Agblīihɔ-nɛ̄hi kú uwɔ, anɔ́ɔ n le ahínyá tá uwɔ, ohígbū ka a ī ma ihɔtū fú lɛ alɔ eko dóódu, a klla ī yá ɔdā nāa ka ā. Ohígbū ka a le íkwu je lɛ ɛlā kú uwɔ fíyɛ́ ɔdā dóódu kú uwɔ ɛɛ́.

³Ɛ̄cī nɛ̄ n hī uwɔ igwú ā, a le ohi tá um, a klla le ɔfú tá um iyē ŋmá lɛ ɔtū nāa le tū um ɔtū ā.

⁴Odúúdú aɔ́cɛ́ kú ipú ɛcɛ géē cɛ̄tra awɔ, Óndú. Ohígbū keé le okónu nāa ce ā pó ɛɛ́.

⁵É gē gwíijē lɛyíkwu ɔdā nāa yá ā mɛ́mla ɛgahi nɛ̄hi kú uwɔ ā.

⁶Óndú, abɔ̄ a yɔ̄ licō nɛ̄ɛ̄nɛ̄hi lɛ alɔ nááná, a gē lɛ ɛlá kwú ācɛ nēe tú iyī uwā wāajɛ ā, amáŋ ācɛ o yɔ́bɔ́ɔ̄cɛ̄ í kē tayínū ŋmá ɛgiyí uwɔ glá ŋ́.

⁷Eko nɛ̄ unwalu lɛ um yɛ jīlatá biílí ɛ́gɛ́nɛ̄ é gē cīíbɔm tū ɔ̄cɛ ā, a gē lɛ um tū oyēeyī. A gē bɛ́yíkwu aólɛlā kú um nēe gē cɔ̄nū mla um ā, a klla gē bī ɔfú kú uwɔ le hɛ́ um tá ŋmá abɔ̄ kú uwā.

⁸A géē yá ɔdā nāa cokónu nū ā gā um. Óndú ihɔtū nāa lɛ lɛ ācɛ ɔlɛ́ uwɔ ā yɔ̄ piyóó. Ā híī gwó ɛlá ācɛ nɛ̄ a bī abɔ̄ kú uwɔ yá ā ŋ́.