Read idoma AÍJĒ KÚ Ɛ̄GBĀ 139 Bible Online

AÍJĒ KÚ Ɛ̄GBĀ 139 - idoma bible

AÍJĒ KÚ Ɛ̄GBĀ 139

¹Óndú, a lɛ um jīla ɛɛ́, a kē jé ɔdā dóódu lɛyíkwu um.

²A jé eko nɛ̄ n gē cīce klla ī cāŋjɛ ā. Nááná nāa yɔ̄ ligbó ā, a jé ɛlá nɛ̄ n gē gbo ā.

³A gē má um ɔ́dāŋ nɛ̄ n gē yúklɔ́ ámāŋ ka n gē mlɛ́nyɔ́. A jé odúúdú ɔdā nɛ̄ n gē yá ā.

⁴Óndú, gbɔbū ɛ́ɛ́ kú ɛlā kóō géē wā ipú okónu kú um, ka n̄ géē ka ɔ́ dúú ā, a le odúúdú nū jé gbojī ɛɛ́.

⁵A lɛ um yɛ jīlatá biílí bɛ̄ɛka igá nōo ī gbō um ā. A klla kē lɛ abɔ̄ kú uwɔ bī um eko dóódu.

⁶Ɛ́gɛ́nɛ̄ a jé um nɛ̄hi nyā, kōō le ce um bá ɛɛ́, ó le fíyɛ́ um abɔ̄ ō jɛ́yí nū.

⁷Iní nɛ̄ n géē nyɔ̄ ŋmá ɛgiyí uwɔ glá ā? Ámāŋ iní nɛ̄ n gēe kwu nyɔ̄ ŋmá ɛgiyí uwɔ nyɔ̄ glá ā?

⁸Ɔ́dāŋ ka n le kwu ga ɔkpáncō, a yɔ̄ abɔ́ɔ, ɔ́dāŋ ka n kwú agōdō kú um ú kwu ɔlékwū, a kē yɔ̄ abɔ́ɔ,

⁹ɔ́dāŋ ka n lɛ acá bū bɛ̄ɛka ígbáanɔ ā, le wu ga ɛga oligbō fíyɛ́ ɛnɔ̄ɔ̄cī, ámāŋ ka n gaá lā ɛga oligbó fíyɛ́ dúú kú ɛnɔ̄ɔ̄nɛ̄,

¹⁰a kē í yɔ̄ abɔ́ɔ ká ā bī um jé ɔwɛ. A kē klla í yɔ̄ abɔ́ɔ ká ā tú um abɔ̄.

¹¹Ɔ́dāŋ ka n ka ka, “Obū ōfōōfūnū kóō wā í klá um mɛ́ɛ̄, cɛ́ɛ́ kú ofíyajɛ nōo yɛ um jīla tá ā kóō kwú pīya otú.”

¹²Amáŋ obū ā í kē dobū tū uwɔ ŋ́. Otú ā kē tá péee bɛ̄ɛka ɔlɛ́ɛnɔ ā tū uwɔ, ohígbū ka obū mɛ́mla ofíyajɛ wɛ ɔdā ékpónú tū uwɔ.

¹³Awɔ yá odúúdú āyā kú iyē kú um á, awɔ kē kpó āyā kú iyē kú um kwɔhá ipú kú ɛ́nɛ́ um á.

¹⁴N gē cɛ̄tra awɔ, ohígbū ka ɔ̄cɛ cíkā ō yúufi uwɔ, úklɔ́ kú uwɔ dóódu klla wɛ ɔdā nōo ī hɛ́ ɔ̄cɛ idáagó. Á jé um lɔɔlɔhi.

¹⁵Eko nāa yɔ̄ ī yá ikpokwú kú um, ɛ́ɛ́ nāa gē kpó um kwɔhá ipú kú ɛ́nɛ́ um ā, nɛ̄ n tayínū abɔ́ɔ yɔ̄ í jɛ̄ ā, a kē jé ka ami ɔ́ɔ yɔ̄ abɔ́ɔ.

¹⁶Eyī kú uwɔ má um ɛ́ɛ́ nēé ma um á, a lɛ odúúdú ɛ̄cī kú oyēeyī kú um ā tá tū ipú ɔkpá kú uwɔ, ɛ́ɛ́ nēé ma um á.

¹⁷Ɔwɔicō, a ī gbō ohílipú alɛwa nɛ̄hi, ɛlá nāa ī gbo ā kē lɔnɔ tū um ō jé nɛ̄hi. É klla le lɛwa ce um bá.

¹⁸Ɔ́dāŋ ka, n gbɔ́ɔ ō ka uwá, é lɛwa fíyɛ́ ɔjɛ kú ísu. Eko nɛ̄ n kwú héyī ŋmá iyɔ̄lā, n yɔ̄ mla awɔ kpɔ́.

¹⁹Ɔwɔicō, lɛ ācobɔ̄bíipū ā kpó ŋmó, cɛ́ɛ́ ká ā lɛ ɔ̄coŋmɔ́ɔ̄cɛ nū nyɔ̄ ŋmá ɛgiyí um.

²⁰É gē kɛlā obíipú lɛyíkwu uwɔ, é klla ī ka ucē obɔ̄bí lɛyíkwu iyē kú uwɔ ā.

²¹Óndú, n gē wɔ́tū ācɛ nēe gē wɔ́tū uwɔ ā. Ācɛ nēe gē yíkpɛ̄yí olɔfú tá uwɔ ā, n gē leyī gwō uwā bónū.

²²N gē wɔ́tū uwā nɛ̄hi ŋmá ipú ɔtū kú um. N je uwá bɛ̄ɛka aólɛlā kú um ā.

²³Ɔwɔicō, lɛ um jila, cɛ́ɛ́ ká ā má ɛlá nɛ̄ n gē gbo ā.

²⁴Má ɔ̄, ɔ́dāŋ ka ɔwɛ kú ɔ́bíipú dúúmā yɔ̄ ipú oyēeyī kú um nɛɛ, cɛ́ɛ́ ká ā bī um jé ɔwɛ ō yɛ piyóó.