Read idoma AÍJĒ KÚ Ɛ̄GBĀ 140 Bible Online

AÍJĒ KÚ Ɛ̄GBĀ 140 - idoma bible

AÍJĒ KÚ Ɛ̄GBĀ 140

¹Óndú lɛ um hɛ́tá ŋmá abɔ̄ kú ācɛ oyódōbɔ̄bí, lɛ oyēeyī kú um tū ŋmá ɛgiyí ācoŋmɔ́ɔ̄cɛ.

²É gē yá ojuju obɔ̄bí ipú ɔtū kú uwā eko dóódu. É klla gē tū ikpɛ́lā ɔtāhɛ̄ kú ācɛ eko dóódu.

³ Ígblɛ́nyī kú uwā lɛbɛ̄ɛka ɛ́fa oŋmɔ́ɔ̄cɛ kú ɛgwā obɔ̄bí ā. Ɛlā nōo gé ŋmá okónu kú uwā ā lɛbɛ̄ɛka ɛ́fa kú ɔ́fúlɔ́kpɔ̄ ā.

⁴Óndú, gbō um ŋmá ɔfú kú ācobɔ̄bíipú ā, lɛ oyēeyī kú um tū ŋmá ɛgiyí ācoŋmɔ́ɔ̄cɛ, nēe ī yá ojuju kéē hɛ́ um gwōnū ā.

⁵Ācɛ o lɔtūkpɔ́ ā lɛ ukpa kpla tá ajɛ gē gbēyī um ɛɛ́. É lɛ egbudu jē tá ajɛ gbēyī um dúú. É kē klla le ukpa kpla tá ɔwɛ, kéē kwú um dúú.

⁶N da Óndú ā kahíníī, “Awɔ wɛ Ɔwɔicō kú um á.” Óndú um, jāhɔ̄ lɛ ɔkɔ nɛ̄ n gē gbā ā mɛ́mla ɛ̄ba nɛ̄ n gē ba ā.

⁷Óndú, Ɔwɔicō kú um, awɔ wɛ olɔfú nɛ̄hi nōo ī cɛ̄pɔ̄ ami nōo wɛ olɛkpɛ á. Awɔ kē gbō um ɔgbɛ́fú á.

⁸Óndú, ā cɛ̄ ká ɔdā nɛ̄ ācobɔ̄bíipú ā miya ā kóō yá ŋ́. Ā cɛ̄ lɛ ojuju obɔ̄bí kú uwā ā, kóō kwú ɔ̄ lɛ uwá ŋ́.

⁹Ā cɛ̄ lɛ aólɛlā kú um nēe cīíbɔm tū um ā yá um lé ŋ́. Le yá ka ɔfú nēé ka lɛyíkwu um ā kóō kwú pīya klá uwá.

¹⁰Ahɔ̄lá kóō le pīya klá uwá. Kéē lɛ uwá tá tū ipú ɔ̄gɔ̄ nēé gáā bɛ̄ɛcɛ ŋmá anú gbóógbóō glá ŋ́.

¹¹Ā cɛ̄ ká ācɛ nēe gē kɛ̄mgbɛ̄ bá ācɛ ɔhá ā kéē jɛ̄ gɔbū ipú ajɛ ā ŋ́. Ɔdōbɔ̄bí nɛ̄hi kóō wā í le yá ācoŋmɔ́ɔ̄cɛ ā, cɛ́ɛ́ kóō kwú uwā ú kpó yíífi.

¹²Óndú, n jé ka a ī cɛ̄pɔ̄ aógbɛhá, a klla ī hɛ́pɔ̄ okpaakpa lɛ ɔ̄cɛ nōó lɛ ɔ̄cɛ nōo ī tá ɔ̄ abɔ̄ ŋ́ mā.

¹³Ācɛ okpaakpa ā gē cɛ̄tra uwɔ ɔkwɛ̄yi, é géē lā ɛga nāa yɔ̄ ā.