Read idoma AÍJĒ KÚ Ɛ̄GBĀ 143 Bible Online

AÍJĒ KÚ Ɛ̄GBĀ 143 - idoma bible

AÍJĒ KÚ Ɛ̄GBĀ 143

¹Óndú pó ɔkɔ nɛ̄ n gbā ā. Kócōō, jāhɔ̄ lɛ ɛ̄ba nɛ̄ n ba uwɔ ā, cɛ́ɛ́ ká ā tá um abɔ̄, Ohígbū ka a lɔhi lɛ ācɛ ɔlɛ́ uwɔ, a klla gē yá okónu nāa ce lɛ uwá.

² Óndú, a híī hɛ́pɔ̄ ká ami nōo wɛ ɔ̄cocɛ̄hɔ̄ kú uwɔ ā ŋ́, ohígbū ka ɔ̄cɛ dúúmā í lé ɛpɔ̄hi iyɔ̄bú uwɔ glá ŋ́.

³Olɛlā kú um le um nū inya, ó klla le um yálé dúúdú ɛɛ́. Ó kwú um ú tá ipú agbá nōo dobū, nɛ̄ n le pīya bɛ̄ɛka ācɛ nōo gekwú gbojī ɛɛ́ mā.

⁴Ohígbū ɔ́ɔmā, ɔtū kwú gbenyi gā um, ipú kú um kwú gbogodo.

⁵N blakwu íkée ā, klla gbɛlá kwu odúúdú ɔdā, nāa tɛtɛ yá ā. N gbafíyóó lɛyí odúúdú úklábɔ̄ kú uwɔ.

⁶N kwú abɔ̄ kú um nāndaa gicō yɔ̄ ī gbɔ̄ɔkɔ gā uwɔ, n cɛgbá uwɔ bɛ̄ɛka ɛ́gɛ́nɛ̄ ajɛ oŋmókókó cɛgbá éŋkpɔ̄ ɔwɔ ā.

⁷Óndú, wā í tá um abɔ̄ fíyaa. Eyī le cá um ɛɛ́. Ā je iyī uwɔ tayínū ŋmá ɛgiyí um gɛ ŋ́, ámāŋ n géē kwú.

⁸Ɔ̄cɔ̄ɔ̄cī dóódu, blatū um lɛyíkwu ihɔtū nāa lɛ gā um eko dóódu ā, ohígbū ka awɔ nɛ̄ n lɔtūce á. N gbɔ̄ɔkɔ gā uwɔ, nwū um ɔwɛ nɛ̄ n cíkā ō yɛ ā.

⁹Óndú, lɛ um hɛ́tá ŋmá abɔ̄ kú aólɛlā kú um, ohígbū ka n le kwu wā ɛgiyí uwɔ ká ā gbō um ɛɛ́.

¹⁰Nwū um ká n̄ yá ɔdā nāa tíne ā, ohígbū ka awɔ wɛ Ɔwɔicō kú um á. Gbonɛnɛ gā um, bī um jé ɔwɛ nɛ̄ n géē yɛ ɛbɔ́ ā.

¹¹Óndú, lɛ oyēeyī kú um tū ɛ́gɛ́nɛ̄ a cokónu lɛ ā. Lɛ um hɛ́tá ŋmá ipú unwalu kú um, ohígbū ka a lɔhi lɛ ācɛ ɔlɛ́ uwɔ.

¹²Ohígbū ihɔtū nāa ī yá tú um eko dóódu ā, lɛ aólɛlā kú um kpó ŋmó, ká ā klla lɛ odúúdú ācɛ o wɔ́tū um ā kpó yíífi, ohígbū ka n wɛ ɔ̄cocɛ̄hɔ̄ kú uwɔ nɛ.