Read idoma AÍJĒ KÚ Ɛ̄GBĀ 144 Bible Online

AÍJĒ KÚ Ɛ̄GBĀ 144 - idoma bible

AÍJĒ KÚ Ɛ̄GBĀ 144

¹N cɛ̄tra Óndú, nōo gbō um ā, nōo klla nwū um ɛ́gɛ́nɛ̄ é gē kpɛ́fú lɛ ā.

²Anú ā gbō um klla ī cɛ̄pɔ̄ um á. Ó gē gbō um klla ī hɛ́ um tá, anú nɛ̄ n lɔtūce koó í yá ká n̄ lā ɛbɔ́ á. Anú gē yá aéwɔhá ā lé klla kpó uwā bá ɛháajɛ um á.

³Óndú, ɔdí nɛ̄ ɔ̄cɛ wɛ ɛ́ɛ́ nāa gē lɛ ɛlá kwu ɔ́ ā? Ɔdí nɛ̄ alɛɛcɛ wɛ ɛ́ɛ́ nāa gē gbɛlá kwu ɔ́ ā?

⁴Oyēeyi kú ɔ̄cɛ í gē gbojī ŋ́ bɛ̄ɛka owu ā nɛ. Ɔ̄cɛ gē bí tāajɛ bɛ̄ɛka ojiji ā nɛ n.

⁵Óndú, lɛ ɔkpáncō yíla ɛpa gā ajɛ, ká ā gā ajɛ, lɛ ikpó da ɛyí aɛ́fu ā cɛ́ɛ́ kéē tá ódūdū.

⁶Lɛ akpáabana tɛ̄hɔ̄ wāajɛ kóō lɛ aólɛlā kú uwɔ kpó fíyátátā. Lɛ ɔyī kú uwɔ tá kátáá lɛ uwá kóō lɛ uwá tɔ́ɔbīnya.

⁷Lɛ abɔ̄ kú uwɔ nāndaa ŋmá ɔkpáncō, ká ā lɛ um hɛ́tá ŋmá ipú itekwú nyā. Lɛ um hɛ́tá ŋmá abɔ̄ kú aéwɔhá,

⁸nēé ī kɛlā ɔkwɛ̄yi gbógbóō ŋ́ mā. Ācɛ nēe klla ī kɛ̄mgbɛ̄ nááná nēé le ɔkpá gbo ā.

⁹Óndú, n géē bī ɛ̄ngwū le gwíijē ɛ̄yīpɛ̄ gā uwɔ.

¹⁰Awɔ gē yá nɛ̄ aɔ́cɛ́ gē yálé ɔgbɛ́fú á. Awɔ klla kē hɛ́ Udéfīdi ɔ̄cocɛ̄hɔ̄ kú uwɔ ā tá ŋmá ikwū á.

¹¹Lɛ um hɛ́tá ŋmá abɔ̄ kú aólɛlā kú um ō bɔ́bíipú ā. Ká ā klla lɛ um hɛ́tá ŋmá abɔ̄ kú aéwɔhá, nēé ī kɛlā ɔkwɛ̄yi gbógbóō ŋ́, ācɛ nēe klla ī kɛ̄mgbɛ̄ nááná nēé le ɔkpá gbo ā.

¹²Yá ká ayínɔ̄nyilɔ kú alɔ kéē jɛ̄ lɔfú eko ɔyípōklóbīya kú uwā bɛ̄ɛka ɔcí nōo jɛ̄ lɔfú ŋmá ajɛ ā. Ká ayínɔ̄nyā kú alɔ kéē lɔhi bɛ̄ɛka aúpíla nēé le yá ɔ́kíkā kú Agblīihɔ-nɛ̄hi ā ifa ā.

¹³Aɔ́bā kú alɔ kéē le mu mla ɛdɔ kú ɔdɛ̄hɔ̄ dóódu. Aálá kú alɔ kéē ma nyīla, kéē ma ayí úlúúlā.

¹⁴Aɛ́na kú alɔ kéē ma ayí lɛwa, amáŋ kéē híī hɛ́ ɔyí ma ŋ́. Ká ālɔ̄ híī pó íbá kú ámíyā ipú úláyi ká alɔ ŋ́.

¹⁵Ɛyí lɔhi lɛ ɛdɔ kú ācɛ dúúmā nɛ̄ ɛdɔ kú ɔdā olɔhi ɛ́gɛ́nyā yɔ̄ lɛ uwá ā. Ɛyí lɔhi lɛ ācɛ dúúmā nɛ̄ Óndú, wɛ Ɔwɔicō kú uwā ā.