Read idoma AÍJĒ KÚ Ɛ̄GBĀ 145 Bible Online

AÍJĒ KÚ Ɛ̄GBĀ 145 - idoma bible

AÍJĒ KÚ Ɛ̄GBĀ 145

¹N géē bī ɛ́gɛ́nɛ̄ a lɔfú nɛ̄hi lɛ ā tɔ́ɔna, Ɔwɔicō mɛ́mla ɔcɛ́ kú um. N géē yɔ̄ ī tá uwɔ ahínyá piyóó.

²N géē tá uwɔ ahínyá ɛ̄cī dóódu. N géē cɛ̄tra uwɔ piyóó.

³Óndú ā lɔfú nɛ̄hi, odúúdú ācɛ cíkā ō cɛ̄tra ɔ́ nɛ̄hi. Ɛ́gɛ́nɛ̄ Óndú ā jājīlīmā nwuné lɛ ā, ɔ̄cɛ dúúmā í jɛ́yí nū glá ŋ́.

⁴Aɛ́gɔ́ éyi nēe yēeyī eko éyī ā, ga aɛ́gɔ́ ɔhá nēe gboce uwá ā, géē yɔ̄ ī cɛ̄tra úklɔ́ kú uwɔ. É klla kē í bī úklɔ́ nɛ̄hi nāa yá ā tɔ́ɔna.

⁵É kē í kɛlā lɛyíkwu ɛgahi mɛ́mla ojīlīmā kú uwɔ. N kē í yɔ̄ ī gbɛlá kwu úklɔ́ idáagó kú uwɔ.

⁶Ācɛ géē bá ī kɛlā lɛyíkwu úklɔ́ idáagó nɛ̄hi kú uwɔ ā, n kē í yɔ̄ ī tɔ́ɔna kú ojājīlīmā nɛ̄hi kú uwɔ.

⁷É géē bá ī ka ka awɔ ɔ́ɔ lɔhi. É klla í bá ī gwíijē gbōmgbōm ka a gbonɛnɛ.

⁸Óndú ī yíihɔtū klla ī ményinyi ɔ̄cɛ, ó gē cɔ̄nū fíyaa ŋ́, ó klla le mu mla ihɔtū eko dóódu.

⁹Óndú ā lɔhi lɛ odúúdú ācɛ, ó klla ī ményīnyi kú ɔdā dóódu nōó yá ā.

¹⁰Óndú, odúúdú úklɔ́ abɔ̄ kú uwɔ géē cɛ̄tra uwɔ. Odúúdú ācɛ ɔlɛ́ uwɔ ā géē tá uwɔ ahínyá.

¹¹É géē bá ī kɛlā kú ɛgahi kú uwɔ, é klla í bá ī kɔ̄ɔ̄kā ɔfú kú uwɔ.

¹²Cɛ́ɛ́ ká odúúdú ācɛ kéē jé ɛgahi mɛ́mla ojīlīma kú ajɔ̄ɔ̄cɛ́ kú uwɔ mɛ́mla ɔdā nɛ̄hi nāa yá ā.

¹³Ajɔ̄ɔ̄cɛ́ kú uwɔ yɔ̄ piyóó ipú ɛcɛ nyā, íkwu kú ɔcɛ́ kú uwɔ kē í yɔ̄ piyóó, o ŋmá eko tá eko. Óndú kē ī yá odúúdú okónu nɛ̄ ó ce ā kpɛ́mm, ó klla gē méyīnyinyi klla gē gbonɛnɛ ipú ɔdā dóódu nɛ̄ ó yá ā.

¹⁴Óndú géē tá ācɛ nɛ̄ ɔtū kú uwā le gbenyi ā abɔ̄, ó klla géē je ācɛ nēe má gwōnū ɛɛ́ mā ŋmá ajɛ.

¹⁵Óndú, odúúdú aɔ́dā nēe lɛ oyēeyī ā, a kē ī je ɔdōlé kú uwā lɛ uwá eko nēé cɛgbá nū ā.

¹⁶Eko dúúmā nāa lɛ abɔ̄ kú uwɔ nwūla, a lɛ ɛgbá kú odúúdú aɔ́dā nēe yēeyī ā yá lɛ uwá.

¹⁷Óndú ā le kpaakpa ipú ucē kú nū nōó ī yá ā, ó kē gbonɛnɛ ipu ɔdā dóódu nɛ̄ ó gē yá ā.

¹⁸Óndú ā kwu odúúdú ācɛ nēe gē hī ɔ̄ igwú ɔ̄kwɛ̄yi ā ajaajɛ.

¹⁹Ó gē yá odúúdú ɛgbá kú ācɛ nēe gē lɛ ojīlīmā ce ɔ́ ā, ó gē pó ɔkɔ nēé gē gbā, ó kē gē nya uwá tá.

²⁰Óndú ā gē gbō ɔ̄cɛ dóódu nōo gē yíihɔtū tū ɔ̄ ā. amáŋ, ó géē je odúúdú ācobɔ̄bíipú a kpó yíífi.

²¹N géē yɔ̄ ī cɛ̄tra Óndú ā eko dóódu. Odúúdú aɔ́dā nɛ̄ Ɔwɔicō yá ā kéē cɛ̄tra anú piyóó.