Read idoma AÍJĒ KÚ Ɛ̄GBĀ 148 Bible Online

AÍJĒ KÚ Ɛ̄GBĀ 148 - idoma bible

AÍJĒ KÚ Ɛ̄GBĀ 148

¹Aá cɛ̄tra Ɔwɔicō. Aá nēe lā ɔkpáncō nōo licō fíyɛ́ dúú ā, kóō cɛ̄tra Ɔwɔicō.

²Odúúdú aálelékwū otɛ̄hɔ̄ kú nú, aá cɛ̄tra anú. Odúúdú aícɔ́ɔja kú nū, aá cɛ̄tra anú.

³Ɛnɔ mɛ́mla ɔyā, aá cɛ̄tra anú. Aínyílɔ́wɔ nēe gē fíyajɛ ā, aá cɛ̄tra anú.

⁴Aɛ́ga kú ɔkpáncō nōo licō fíyɛ́ dúú ā, aá cɛ̄tra anú. Aísu nōo yɔ̄ ɛhícō kú ɔkpáncō, aá cɛ̄tra anú.

⁵Odúúdú uwā kéē cɛ̄tra Óndú, ohígbū koó le ɔ́da je, é kē le uwá kpó yá.

⁶O ŋmá lɛ ɔ́da kú nū, ó kwú uwā í kwu aɛ́ga nēé kwu piyóó nēé kē gáā tá ɔ́da ā glá ŋ́.

⁷Aɛ́bɛ́ obɔ̄bí mɛ́mla aɛ́ga olipú kú itekwú, aá cɛ̄tra Óndú ā ŋmá ipú ɛcɛ nyā.

⁸Ɔwolímanya, ɛcɔ̄ ɔwɔ, ébú, mɛ́mla owu nɛ̄hi nōo gē lɛyítáajɛ lɛ ɔ́da kú nū ā, aá cɛ̄tra Óndú ā.

⁹Ɛfu nɛ̄hi mɛ́mla ɛfu nɛ̄ŋcɛ́, ɔcí ogwá īkpō, mɛ́mla ūpū, aá cɛ̄tra Óndú ā.

¹⁰Odúúdú aɛ́bɛ́, kwu aɛ́bɛ́ ɔlɛ́, aɛ́bɛ́ ipáácí mɛ́mla aɛ́bɛ́ nēe ī lɛ ɔtū piyaajɛ mɛ́mla aígbáanɔ, aá cɛ̄tra Óndú ā.

¹¹Aɔ́cɛ́ kú odúúdú ɛcɛ, mɛ́mla odúúdú ācɛ kú ipú ɛcɛ, mɛ́mla aótrɛ̄yí kú ipú ɛcɛ ā, aá cɛ̄tra anú.

¹²Kwu ayípōklóbīya mɛ́mla ayípɔ̄nɔ̄nyā mɛ́mla anyākwɔ́cɛ mɛ́mla ayípɛ̄ dúú, aá cɛ̄tra Óndú ā.

¹³Odúúdú aá kéē cɛ̄tra Óndú ā, ohígbū ka anú ōfōōfūnū jājīlīmā fíyɛ́ dúú á. Ɛgahi kú nū le fíyɛ́ okpancó mla ɛcɛ.

¹⁴Ó lɛ aéwo kú nū yá lɔfú, cɛ́ɛ́ ká odúúdú ācɛ ɔlɛ́ nū nēe wɛ ācɛ Ísrɛ̄lu, nēe he ɔ́ ɔtū nɛ̄ɛ̄nɛ̄hi ā, kéē cɛ̄tra anú.