Read idoma AÍJĒ KÚ Ɛ̄GBĀ 149 Bible Online

AÍJĒ KÚ Ɛ̄GBĀ 149 - idoma bible

AÍJĒ KÚ Ɛ̄GBĀ 149

¹Aá cɛ̄tra Óndú ā. Aá gwííjē ɛ̄yīpɛ̄ lɛ Óndú ā. Aá cɛ̄tra anú ipú ójīla kú ācɛ okpaakpa kú nū ā.

²Ācɛ Ísrɛ̄lu, ɔtū kóō he aá ohígbū ɔ̄cɛ nɛ̄ ó yá aá ā. Ācɛ kú Usáyɔn, aá gwéeyē ohígbū ɔcɛ́ kú aá.

³Aá jīijē kú aá cɛ̄tra ɔ́, aá gwó uba mɛ́mla ɛ̄ngwū le cɛ̄tra ɔ́.

⁴Ohígbū ka ācɛ kú Óndú ā he ɔ́ ɔtū, ó ī lɛ ojīlīma ce ācɛ nēe gē tá iyí uwā wāajɛ ŋmá lɛ ō cɛ̄ lɛ uwá yá aólɛlā kú uwā lé.

⁵Ācɛ kú Ɔwɔicō kéē gwéeyē abɔ̄ é le yálé ā, cɛ́ɛ́ kéē klla gwíijē kú éeyē, ɛyi agōdō kú uwā otú gbó ɔ̄cī.

⁶Kéē lɛ ɔkɔ cɛyí gwíijē ō cɛ̄tra Ɔwɔicō. Kéē klla bī ɔkpacaŋ́gelī ā abɔ̄ kú uwā,

⁷cɛ́ɛ́ kéē géē gwō aéwɔhá ā ɔ́ci, kéē klla yá ācɛ éwɔhá italā.

⁸Kéē lɛ agbá kpó kwu aɔ́cɛ́ kú aéwɔhá ā ikpó mɛ́mla abɔ̄. É klla í ce aótrɛ̄yí kú uwā odó.

⁹Cɛ́ɛ́ kéē géē lɛ italā yá aéwɔhá ā, ɛ́gɛ́nɛ̄ Ɔwɔicō je ɔ́da lɛ ā. Ɔdā nyā wɛ ojīlīmā lɛ ācɛ kú ɔlɛ́ Ɔwɔicō ā nɛ̄ n. Aá cɛ̄tra Óndú.