Read idoma AÍJĒ KÚ Ɛ̄GBĀ 16 Bible Online

AÍJĒ KÚ Ɛ̄GBĀ 16 - idoma bible

AÍJĒ KÚ Ɛ̄GBĀ 16

¹A cɛ̄ lɛ ɔdā dúú yá um ŋ́, Ɔwɔicō kú um, ohígbū ka n le kwu wā í ce uwɔ ɛɛ́.

²N da Óndú ā kahíníī, “Awɔ wɛ Óndú um á. Ɔdā olɔhi dóódu nɛ̄ n lɛ ā ŋmá ɛgiyí uwɔ.”

³Ācɛ nēe cɛ̄ɛ̄lā Óndú kpaakpa ipú ajɛ ā wɛ ācɛ ojīlīmā[1] Ɛlā uwā he um ɔtū nɛ̄hi.

⁴Ācɛ nēe gē nyɔ̄ ī gbā aɔ́wɔ ɔhá ɛ̄gbā ā gē kpó unwalu alɛwa klá iyī uwā[2] N gáā pā aɛ́cí ɔ́ɔmā ŋ́, ɛ́ɛ́ nɛ̄ n kōō ī hē iyē kú uwā ŋmá okónu kú um ŋ́.

⁵Óndú, Ɔwɔicō, wɛ ukpɛ̄ kú um nɛ̄ n je á. Awɔ gē yá odúúdú ɛgbá kú um gā um á. Ɔdā dóódu kú um yɔ̄ ipú abɔ̄ kú uwɔ.

⁶Ukpɛ̄ nāa je gā um ā lɔhi nɛ̄hi. Ɔdā nāa kpó gā um ā lɔhi fíyábɔ̄.

⁷N ge cɛ̄tra Óndú ā, ohígbū ka anú gē nwū um ɛlā á. Ahāpōtú nɛ̄hi, ɔtū kú um gē gbɛlá ɔwɛ okpaakpa nɛ̄ n cíkā ō lā oyēeyī ā.

⁸N kē jé eko dóódu ka Ɔwɔicō yɔ̄ mla um. Ó yɔ̄ kwu um ajaajɛ, ohígbū ɔ́ɔmā, ɔdā dúúmā í jíla um iyē glá ŋ́.

⁹Ohígbū ɛ̄nyā ā, ɔtū he um, n klla yɔ̄ ī gwéeyē, ɔdā dúúmā í kē gáā yá um glá gɛ ŋ́.

¹⁰Ohígbū ka awɔ gē gbō um ŋmá ɔfú kú ikwū á. Á kē gáā mā ami nōo ī gbā uwɔ ɛ̄gbā ŋmá ɔtū ékpónú ā tá ɔlékwū ŋ́.

¹¹A gē ma ɔwɛ kú oyēeyī fū ga um. N gē gwéeyē nɛ̄hi eko nɛ̄ n yɔ̄ ɛgiyí uwɔ. Eko nɛ̄ n má kwu uwɔ ajaajɛ, ɔtū gē he um piyóó.