Read idoma AÍJĒ KÚ Ɛ̄GBĀ 17 Bible Online

AÍJĒ KÚ Ɛ̄GBĀ 17 - idoma bible

AÍJĒ KÚ Ɛ̄GBĀ 17

¹Óndú, jāhɔ̄ lɛ ɔkɔ nɛ̄ n gē gbā ká ā yá ɔdā nēe le kpaakpa ā. Jáhɔ̄ lɛ ɔkɔ ɔ̄kwɛ̄yi nɛ̄ n gē gbā gā uwɔ ā.

²Lɛ ɛpɔ̄hi hɛ́ gā um, ohígbū ka eyī kú uwɔ gē má ɔdā nōo le kpaakpa ā.

³A jé ipú ɔtū kú um. A kē wā ɛgiyí um otú dúú ɛɛ́. A kē le um jila má dúúdú ɛɛ́, a kē má ka ń bī ɔdōbɔ̄bí dúúmā ipú ŋ́. Ń kē gáā ka ɔdōbɔ̄bí dúúmā ŋmá okónu kú um ŋ́.

⁴Ń kē ī kɛlā obɔ̄bí ɛ́gɛ́nɛ̄ ācɛ ɔhá gē ka ā ŋ́. N kē ī bī ɔdā nāa gē nwū ā le yúklɔ́. Ń kē bɔ̄bíipú ŋ́.

⁵N gē yá ucē nāa tíne ā eko dóódu. Ń kē nyíleyī ŋmá anú jéjée ɛɛ́ ŋ́.

⁶N gē gbɔ̄ɔkɔ gā uwɔ Ɔwɔicō, ohígbū ka a géē tá um ohi. Pīyeyī má um Óndú ká ā jáhɔ̄ lɛ ɛlā kú um.

⁷Lɛ ihɔtū nāa lɛ lɛ ācɛ ɔlɛ́ uwɔ eko dóódu ā mafú gā um. Lɛ ācɛ ɔlɛ́ uwɔ nēe kwu wā í táyínū ɛgiyí uwɔ ā nyatá ŋmá ɛgiyí aólɛlā kú uwā ā.

⁸Gbō um, ɛ́gɛ́nɛ̄ a gē gbō īkpēyí kú īyī uwɔ ā. Kwú um ú tayínū ɛga nɛ̄ abɔ̄ í gáā kwu um glá ŋ́, ɛ́gɛ́nɛ̄ ɛ́nɛ́ ugwū gē kpó ayí nū bá ipú acá kú nū gē lɛ ɔtū klá uwá báajɛ ā.

⁹Gbō um ŋmá abɔ̄ kú ācobɔ̄bíipū nēe ī tíne ō je um yíífi ŋmá ajɛ ā. Aólɛlā nēe le um yɛjīla tá, ī tíne ō ŋmó um ā.

¹⁰É ī ményinyi ɔ̄cɛ dúúmā ŋ́, é klla ī yɔ́bɔ́cɛ klla ī gwō.

¹¹É le yɛ um jīla tá abālɔbányā, ɛga dúúmā nɛ̄ n pīya nyɔ̄ ā. É bá ī gbēyī kéē lɛ ɛga má kéē lɛ um pi wāajɛ.

¹²É le kwāajɛ bá ī gbēyī kéē le um ŋmó ɛ́gɛ́nɛ̄ aágábá gē kwāajɛ gbēyī ɛbɛ́ kéē ŋmó, je ɛbɛ́ nū fā lé ā.

¹³Wā, Óndú, wā í kpɛ́fú tá aólɛlā kú um, ká ā lɛ uwá yálé. Bī ɔkpacaŋ́gelī kú uwɔ, káā lɛ um hɛ́tá ŋmá abɔ̄ kú ɔ̄cobɔ̄bíipú.

¹⁴Lɛ um hɛ́tá ŋmá abɔ̄ kú ācɛ nēe lɛ ɔdā dúúmā nēé tíne ipú oyēeyī nyā ā. Lɛ italā nāa tútū gbēyī uwā ā yá uwā cabá cabá, kóō le hile nōo í jɛ̄ ayípɛ̄ ɔlɛ́ uwā mɛ́mla ayááyí uwā.

¹⁵Amáŋ, n géē má uwɔ eyī, Óndú, ohígbū ka ń yá ɔdōbɔ̄bí ŋ́. Eko nēé le um héyī, n géē má uwɔ eyī ɛ́gɛ́nɛ̄ a lɛ ā.