Read idoma AÍJĒ KÚ Ɛ̄GBĀ 22 Bible Online

AÍJĒ KÚ Ɛ̄GBĀ 22 - idoma bible

AÍJĒ KÚ Ɛ̄GBĀ 22

¹ Ɔwɔicō kú um, Ɔwɔicō kú um, ɔdíyá nāa ma um tá āa? N le ikwū je tū uwɔ ká ā tá um abɔ̄, amáŋ á kē wā í tá um abɔ̄ ŋ́.

²Ɔwɔicō kú um, n hī uwɔ igwú ɔlɛɛnɔ, á kē tá um ohi ŋ́, n klla hī uwɔ igwú otú, amáŋ ń kē lɛ omlɛ́nyɔ́ ŋ́ kpɔ́.

³Nááná a kē tīihɔ, a klla ce akpa kú ɔcɛ́ kú uwɔ. Anɔ́ɔ ācɛ kú Ísrɛ̄lu bá ī cɛ̄tra uwɔ á.

⁴Awɔ nɛ̄ aádáádā alɔ kpɔ́tūce á. Abɔ̄ é kē le ɔtū kpóce uwɔ ā, a kē le uwá hɛ́tá.

⁵É hī uwɔ igwú, a kē le uwá nyatá. Awɔ nēé kpɔ́tūce á, á kē cɛ̄ lɛ uwēyī kwú uwā ŋ́.

⁶Amáŋ ācɛ í má um bɛ̄ɛka ɔlɛɛcɛ ā gɛ ŋ́, n lɛbɛ̄ɛka inyílɔ́ ā mɛ́ɛnɛ. Ń wɛ ɔdā dúú ɛɛ́ gɛ ŋ́, ācɛ í je um ka n wɛ ɔdā dúú ɛ́ɛ́ gɛ ŋ́. Anɔ́ɔ é bá ī leyī gwō um bónū á.

⁷ Odúúdú ācɛ nēe má um ā gē yá um okónu. É gē cē okónu tú um gbɛdɛɛ klla ī jílɛyí jigijigi,

⁸gē ka kahíníī, “Ó kwú īyī nū ú gboló ce Óndú ā ŋ́ nɛɛ? Ɔdíyá nɛ̄ Óndú ā, í nya ɔ́ tá gɛ ŋ́ mā? Óndú ā kóō lɛ ɔ́ hɛ́tá mɛ́ɛnɛ, ɔ́daŋ ka ó yíihɔtū tú ɔ̄.”

⁹Nááná, awɔ Óndú ā bī um bɛ̄cɛ ŋmá ipú kú ɛ́nɛ́ um má. Awɔ húmáyī leyīkwu um ŋmá obene kú um má.

¹⁰O ŋmífī nɛ̄ ɛ́nɛ́ ma um ā, awɔ nɛ̄ n gboló ce á. Ŋmífī nɛ̄ ɛ́nɛ́ ma um ā, awɔ húmáyī wɛ Ɔwɔicō kú um á.

¹¹Ā híī ligbō ŋmá ɛgīyí um ŋ́ Óndú, ohígbū ka unwalu má kwu um ajaajɛ ɛɛ́. ɔ̄cɛ dúúmā í kē yɔ̄ nōo gē tá um abɔ̄ ŋ́.

¹²Aólɛlā alɛwa le yɛ um jīla tá bɛ̄ɛka aɛ́bɛ́ obɔ̄bí ā. É le yɛ um jīla tá dúúdú bɛ̄ɛka aɛ́bɛ́ obɔ̄bí kú ajɛ kú Ubássan ā.

¹³É le okónu kú uwā nwūla gbādāā lɛyíkwu um bɛ̄ɛka ágábá nōo nwūla okónu yɔ̄ ī tū oji, gē tíne ɛbɛ́ nɛ̄ ó í fā lé ā.

¹⁴Abɔ̄ kwú hɛ́ um iyē bɛ̄ɛka éŋkpɔ̄ nēé pīya klá ajɛ ā. Ikpokwú kú um dúúmā í kwu ɔhá gɛ ŋ́. Ɔtū kú um le gbogodo klla kwú gbeny ɛɛ́.

¹⁵Ɔkɔ kú um kwú ŋmó flōōflōō bɛ̄ɛka ajɛ kú eko kú olugbaagbaa ā. Ígblɛ́nyī kú um kwú jíla gaá bá um akpakó ɛɛ́. A ma um tá gwutá úmúlá yɔ̄ ī gbēyī ikwū ɛɛ́.

¹⁶Ācɛ obɔ̄bí ā le um yɛ jīla tá, bɛ̄ɛka ígwu kú aéwo nēe lɛ ɛbɛ́ hɛ́tū gáā kwú ɔ̄ ā. É bá ī fā um ikpó mɛ́mla abɔ̄.

¹⁷N lɔfú gbo ikpokwú kú iyē kú um áluka glá. Aólɛlā kú um kē bá lɛ eyī hɛ́ tū um.

¹⁸É lɛ ūlī tá ohígbū īlī kú um kéē le ɔ́ kpó kɔ̄ lɛ īyī uwā ɛɛ́.

¹⁹Óndú, ā híī yɛ ligbō hɛ̄ um tá gɛ ŋ́. Wā fíyaa, í tá um abɔ̄. Awɔ gē tá um abɔ̄ á.

²⁰Lɛ um nyatá ŋmá ɔkpacaŋgelī kú aólɛlā kú um. Lɛ oyēeyī kú um nyatá ŋmá abɔ̄ kú aéwo nēe bá ā.

²¹Lɛ um nyatá ŋmá okónu kú ágábá ā. Lɛ odo kú um nyatá ŋmá ajī kú ɛyī ā.

²² N géē da ācɛ ɔlɛ́ um ɔdā nāa yá nyā. N géē cɛ̄tra awɔ ɛga nɛ̄ ācɛ le jīla bá kē gbā uwɔ ɛ̄gbā.

²³Aá nēe gē yúufi Óndú ā, aá cɛ̄tra anú. Odúúdú ayí kú Ujékɔ̄pu, aá wóófu iyē kū nū. Odúúdú ayí kú Ísrɛ̄lu, aá gbā ɔ̄ ɛ̄gbā.

²⁴Ohígbū ka ó lɛ eyī gwō aógbɛhá ā bónū ɛɛ́, nɛ̄ ó gē leyī gwó ōwē mɛ́mla ɔnɔ kú uwā bónū ŋ́. Ó gáā cīgbīhi kwu uwá ŋ́, amáŋ, ó gē tá uwā ohi, eko dúú nēé hī ɔ̄ igwū kú otábɔ̄.

²⁵Ipú ōjíla nɛ̄hi ā, n géē cɛ̄tra uwɔ, kú ɔdā nɛ̄hi nāa yá ā. N gwɛ́ɛya nɛ̄ n cókónū ka n gē gwó ā gā awɔ, ɛga nɛ̄ ɛwa nɛ̄hi le jīla bá ī gbā uwɔ ɛ̄gbā ā.

²⁶Aógbɛhá ā géē lé ɔdōlé kllā í nū ipú. Ācɛ nēe géē wā ɛgiyí Óndú gaá gbā ɛ̄gbā géē cɛ̄tra anú. Kéē le lɛ́ɛcɛ ipú ɛcɛ nyā nɛ̄hi.

²⁷Odúúdú aéwo kú ɛcɛ géē blakwu Óndú ā, klla í kwúcē wā ɛgiyí nū. Aéwo dóódu géē gbā ɔ̄ ɛ̄gbā.

²⁸Ohígbū ka Óndú ā wɛ ɔcɛ́ á. Anú gē gbō odúúdú aéwo á.

²⁹Odúúdú ācɛ ōyɔ́bɔ́ɔ̄cɛ kú ɛcɛ ā géē túkpɛ́ɛ iyɔ̄bū nū. Odúúdú alɛɛcɛ dóódu géē túkpɛ̄ɛ̄ lɛ ɔ́, ohígbū ka oyēeyī kú uwā í kē yɔ̄ ipú abɔ̄ kú uwā ŋ́.

³⁰Ayááyí ga ayááyí géē gbā ɔ̄ ɛ̄gbā. É kē í bá í kɛlā kú Óndú ā lɛ ayí nēé géē ma ɛ̄cɔ̄bū ā.

³¹É géē bá í kɔ̄kā kú nū lɛ ayááyí nēé ma ɛ́ɛ́ ŋ́ mā, kahíníī, “Óndú ā lɛ ācɛ ɔlɛ́ nū nyatá.”