Read idoma AÍJĒ KÚ Ɛ̄GBĀ 25 Bible Online

AÍJĒ KÚ Ɛ̄GBĀ 25 - idoma bible

AÍJĒ KÚ Ɛ̄GBĀ 25

¹Awɔ, Óndú ā nɛ̄ n gē gbɔ̄ɔkɔ klla ī gbɛ̄ɛ̄gbā ga uwɔ á.

²Awɔ nɛ̄ n lɔtūce á, Óndú, Ɔwɔicō kú um. Ā cɛ̄ lɛ aólɛlā yá um lé kú uwēyī kóō kwú um ŋ́. Ā cɛ̄ lɛ aólɛlā kú um gwéeyē tū um ŋ́.

³É gáā yá ami ɔ̄cɛ nōo kpɔ́tūce uwɔ ā lé glá ŋ́. Amáŋ ācɛ nēé gē yíīkpɛ̄yí olɔfú tá uwɔ ā nē é yálé glá á.

⁴Óndú nwū um ɔwɛ kú uwɔ, lɛ ɔwɛ kú uwɔ mafú gā um.

⁵Nwū um, ká n̄ lā o ŋmá lɛ ɛ́gɛ́nɛ̄ ɔ̄kwɛ̄yi kú uwɔ ka lɛ ā. Ohígbū ka awɔ wɛ Ɔwɔicō kú um, nōo gē nya um tá á. N kē lɔtūce ce uwɔ eko dóódu.

⁶Óndú ā blakwu ɛ́gɛ́nɛ̄ a gbonɛnɛ klla gē ményīnyi klla gē yíihɔtū tū um eko dóódu ā.

⁷Óndú, kwú aíne nɛ̄ n bīya íkííkēe mɛ́mla onyíleyē nɛ̄ n yá eko nɛ̄ n wɛ ɔyípɛ̄ oklóbīya ā í yá um ɛhi. Blakwu um ohígbū ka a ī yíihɔtū tá ācɛ ɔlɛ́ uwɔ eko dóódu. A klla gē yá ɔdā lɔhi lɛ uwá.

⁸Abɔ̄ nɛ̄ Óndú ā lɔhi klla le kpaakpa ā, ó ge nwū ācobīyíne ɔwɛ nōo cíkā kéē yɛ ā.

⁹Ó gē bī ācɛ nēe tá iyī ūwā wāajɛ ā jé ɔwɛ kú okpaakpa ā. Ó klla ī nwū uwā ɔdā nōo wɛ ɔtū kú nū ā.

¹⁰Ācɛ dóódu nēe gē lɛ okónu nɛ̄ Óndú ā ce ā tū, klla ī lɛyítáajɛ lɛ ɛlā kú nū ā, ó géē bī uwā jé ɔwɛ kú okpaakpa mɛ́mla ihɔtū kú nu.

¹¹Íne nɛ̄ n bīya ā lɛwa íbí, Óndú. Lɛ okónu nāa ce ā yá, ká ā kwú aíne nɛ̄ n bīya í kpó yá um ɛhi.

¹²Óndú ā gē nwū ācɛ nēe gē lɛyítáajɛ lɛ ɔ́ ā, ɔwɛ nēé cíkā ō yɛ ā.

¹³É kē í lā ipú abahi, klla í jɛ̄ gɔbū. Ayí uwā géē lɛ ajɛ ā.

¹⁴Óndú ā wɛ oklóbīya kú ācɛ dúúmā nēe gē yúufi nū ā. Ó kē í da uwá okónu nɛ̄ ó ce lɛ uwá ā.

¹⁵Īkpēyī kú um kwu Óndú ā eko dóódu kóō tú um abɔ̄. Ó kē le um hɛ́tá ŋmá ipú unwalu mɛ́mla ukpa.

¹⁶Óndú, pīyeyī má um, ká ā ményīnyi um. Ohígbū ka n klá cíí ōfōōfū um, í lɛ ɔ̄cɛ nōo ī tá um abɔ̄ ŋ́. É klla bá ī yá um ōwē.

¹⁷Kwú odúúdú unwalu kú um ú ŋmá ipú ɔtū kú um cɛ́ɛ́ ká ā lɛ um hɛ́tá ŋmá ipú odúúdú ákanya kú um.

¹⁸Leyī yɛ ōwē mɛ́mla ákanya kú um, ká ā kwú íne nɛ̄ n bīya ā í yá um ɛhi.

¹⁹Leyī yɛ ɛ́gɛ́nɛ̄ aólɛlā kú um lɛwa lɛ ā, mɛ́mla ɛ́gɛ́nɛ̄ é wɔ̄tū um bɔ̄bíbɔ̄bí lɛ ā.

²⁰Óndú, gbō um, ká ā lɛ um hɛ́tá. A cɛ̄ lɛ uwēyī kwú um ŋ́, ohígbū ka awɔ nɛ̄ n wā ɛgiyí uwɔ cɛ́ɛ́ ká ā lɛ um tábɔ̄ á.

²¹Olɔhi kú um, mɛ́mla okpaakpa kú um kóō lɛ um tū, ohígbū ka n kpɔ́tūce uwɔ.

²²Ɔwɔicō, lɛ ācɛ ɔlɛ́ uwɔ, Ísrɛ̄lu nyatá ŋmá, ipú odúúdú unwalu mɛ́mla ákanya kú uwā.