Read idoma AÍJĒ KÚ Ɛ̄GBĀ 26 Bible Online

AÍJĒ KÚ Ɛ̄GBĀ 26 - idoma bible

AÍJĒ KÚ Ɛ̄GBĀ 26

¹Óndú, lɛ ɛpɔ̄hi hɛ́ gā um, ohígbū ka n gē yá ɔdā olɔhi mɛ́mla ɔdā okpaakpa. N klla lɔtūce uwɔ dúúdú.

²Óndú lɛ um jámá ká ā má ɔ̄, lɛ aɔ́dā nēe kwu um ɔtū ā mɛ́mla ɛlá nɛ̄ n gē gbo ā jila.

³Ihɔtū nāa ī yá tū um ā, gē ma ɔwɛ fú gā um á. Okpaakpa kú uwɔ gē bī um jé ɔwɛ á.

⁴Ń gē klá ɛga éyi tɔ̄há mla ācɛ o hɛ́ ācɛ lé ŋ́, ɛ́ɛ́ nɛ̄ n gē yɛ mla ācɛ ō yá obɔ̄bí mɛ́mla aóleyɛpa ŋ́.

⁵O yɛ mla ācɛ obɔ̄bí gē wú um ɔtū. N klla ī je ɔwɛ kú ācobɔ̄bí táajɛ.

⁶Óndú, n le abɔ̄ kú um na, ká n̄ mafú ka ń lɛpɔ̄bí dúúmā ŋ́. N klla ī gbā uwɔ ɛ̄gbā ī yɛ ede kú uwɔ tá biílí.

⁷N gē gwíijē ī tá uwɔ ahínyá. N klla í ka odúúdú ɔdā nāa yá gā um ā tɛ́ɛcɛ.

⁸Óndú, ɔlɛ́ nāa lā anú ā he um ɔtū nɛ̄hi, ɛga nɛ̄ ācɛ í má ɛgahi kú uwɔ ā.

⁹Ā je um yíífi mla ācobīyíne ā ŋ́. Lɛ um nyatá ŋmá abɔ̄ kú ācɛ oŋmɔ́ɔ̄cɛ ā, cɛ́ɛ́ ká n̄ híī kwú mla uwá ŋ́.

¹⁰Ācɛ nēe bá nyā gē yá ɔdōbɔ̄bí eko dóódu á. É klla le tútū kéē mīyɛ omíci lé eko dóódu.

¹¹Amáŋ ami ā, n kē ī yá ɔdā nōo le kpaakpa ā. Ményīnyi kú um ká ā lɛ um nyatá.

¹²N gaá yɔ̄ ipú ɛbɔ́ ɛɛ́, n géē cɛ̄tra Óndú ā, ipú ójīla kú ācɛ ɔlɛ́ nū á.