Read idoma AÍJĒ KÚ Ɛ̄GBĀ 27 Bible Online

AÍJĒ KÚ Ɛ̄GBĀ 27 - idoma bible

AÍJĒ KÚ Ɛ̄GBĀ 27

¹Óndú ā lɛbɛ̄ɛka ɔlá ōfíyajɛ kú um. Anú klla ī nya um tá á. Ohígbū ɔ́ɔmā, ń gáā yúufi ɔdā dóódu ŋ́.

²Eko nɛ̄ aólɛlā kú um gáā tū um iyē kéē ŋmó um nɛɛ, é le ikpó gbaajɛ má gwōnū.

³Ɔ́dāŋ ka aícɔ́ɔja alɛwa le tútū le íbɔm cē tū um, cɛ́ɛ́ kéē wā í kpɛ́fú tú um, ɔtū í hɛ́ um ko, ɛ́ɛ́ nɛ̄ n gē yúufi ɔdā dúúmā ŋ́. Ɔ́dāŋ nɛ̄ aólɛlā ā gbɔɔ́ ō kpɛ́fú tá um nááná, n géē lɔtūce Ɔwɔicō, Óndú kú um kpɔ́.

⁴Ɔdā ékpónú nɛ̄ n gē ba Ɔwɔicō á. Ɔdā ékpónú ɔ́ɔmā nɛ̄ n tíne á. Ká n̄ lā ɔlɛ́ Óndú ā odúúdú oyéeyī kú um, ká n̄ hídáagó kú ɛ́gɛ́nɛ̄ ó gē yá ɔdā olɔhi lɛ ā. Cɛ́ɛ́ ká n̄ klla ba ɔ́, kóō bī um jé ɔwɛ.

⁵Eko kú unwalu, ó géē gbo um ɛyí. Ó kē í je um tayínū ipú Agblīihɔ-nɛ̄hi kú nū. Ó klla í je um háyi ɛyí ápátɛ́cɔ̄.

⁶N géē yá aólɛlā nēe cīíbɔm tū um ā lé. N géē lɛ ɔkɔ cɛyí í tɔ́ɔga kú éeyē abɔ̄ nɛ̄ n géē ga ipú Agbliihɔ-nɛ̄hi kú nū gaá gwɛ́ɛya ā. N géē bī ɔkɔ ō lɔnyɛ í gwíije í cɛ̄tra Óndú ā.

⁷Óndú, kócōō, pó ɔkɔ kú um eko nɛ̄ n hī uwɔ igwú. Ményīnyi um ká ā tá um ohi.

⁸Eko nāa kahíníī, “Wā gaá gbā um ɛ̄gbā.” N géē tá uwɔ ohi kahíníī, “N géē wā Óndú.”

⁹A híī je iyī uwɔ tayínū ŋmá ɛgiyí um ŋ́. A híī cɔ̄nū da um, je um nū ŋmá ɛgiyí uwɔ ŋ́. Awɔ húmáyī tá um abɔ̄ á. Á híī má um tá, ɛ́ɛ́ nāa gē kwu hɛ̄ um tá ŋ́, Ɔwɔicō, ohɔ́nyɛtá kú um.

¹⁰Ɔ́dāŋ ka ádā um mla ɛ́nɛ́ um le kwu hɛ̄ um tá nááná Ɔwɔicō géē leyīkwu um.

¹¹Óndú, nwū um ɔdā nāa tíne ká n̄ yá ā. Bī um bū ɔwɛ nɛ̄ ó lɛ unwalu ŋ́ mā. Ohígbū aólɛlā kú um nēe lɛ ɛwa ā.

¹²Á híī kwu gwū um tá lɛ aólɛlā kú um ŋ́. Ohígbū ka ācɛ o cījáalī ɛ̄kɛ̄mgbɛ̄ ā cāŋjɛ lɛyíkwu um, klla bá ī fu um ɔnū ɛɛ́.

¹³N jé ka n géē yēeyī, kē í má olɔhi kú Óndú ā ipú oyēeyī nyā.

¹⁴Aá lɔtūce Óndú ā. Aá cɛ̄ɛ̄lā nū, aá lɔtūlé, aá lɔtūce Óndú ā.