Read idoma AÍJĒ KÚ Ɛ̄GBĀ 28 Bible Online

AÍJĒ KÚ Ɛ̄GBĀ 28 - idoma bible

AÍJĒ KÚ Ɛ̄GBĀ 28

¹Óndú, awɔ nōo gē gbō um ā, awɔ nɛ̄ n gē hīgwú á. Jáhɔ̄ lɛ ikwū nɛ̄ n gē je ā, cɛ́ɛ́ ká ā tá um ohi. Ɔ́dāŋ ka, á tá um ohi ŋ́, ayíka n géē kwú.

²Pó ɔkɔ nɛ̄ n gē gbā ā, eko nɛ̄ n gē jikwū klá uwɔ ká ā tá um abɔ̄. Mɛ́mla eko dúúmā nɛ̄ n je abɔ̄ kú um gicō lɛyíkwu Agblīihɔ-nɛ̄hi kú uwɔ ā.

³Á híī ŋmó um ɛpɔ̄bí mɛ́mla ācobɔ̄bíipú, mɛ́mla ācɛ o yá ɔdōbɔ̄bí ŋ́. Ācɛ nēe ī lɛ ɛhɛ kwu ayīnu lɛ ogwiji tá ipú ā.

⁴Lɛ italā kú ɔdā nēé yá ā yá uwā. Lɛ italā kú ucē nēé yá kpɛ́mm ā yá uwā. Kwú ɔdā nōo cíkā lɛ uwā ā ú lɛ uwá.

⁵É lɛ ɛlā wu ɔdā dóódu nɛ̄ Óndú ā yá ā ŋ́, ohígbū ɔ́ɔmā, ó géē yá uwā italā, klla í je uwá kpó yíífi piyóó.

⁶Aá cɛ̄tra Óndú ā, ohígbū ka ó le ɔkɔ nɛ̄ n gbā kóō tá um abɔ̄ ā pó.

⁷Óndú ā gē gbō um lɔfúlɔfú á, n kē lɔtūce ɔ́. Ó gē tá um abɔ̄ klla ī cɛ̄ lɛ ɔtū he um. Ohígbū ɔ́ɔmā, n géē gwíijē kú éeyē í cɛ̄tra anú.

⁸Óndú ā gē gbō ācɛ kú nū á. Ó gbō ɔcɛ́ nɛ̄ ó fu ā klla ī nya ɔ́ tá.

⁹Óndú, lɛ ācɛ kú uwɔ nyatá, hɔ́hā ce ācɛ nēe wɛ ákú uwɔ ā. Lɛ pīya ɔ̄cɛ nōo gē gbō uwā, cɛ́ɛ́ a leyīkwu uwá piyóó ipú ɛcɛ nyā.