Read idoma AÍJĒ KÚ Ɛ̄GBĀ 30 Bible Online

AÍJĒ KÚ Ɛ̄GBĀ 30 - idoma bible

AÍJĒ KÚ Ɛ̄GBĀ 30

¹N gē cɛ̄tra awɔ, Óndú ɛ́gɛ́nɛ̄ ā lɔfú nɛ̄hi lɛ ā, ohígbū ka a le um hɛ́tá. Ā cɛ̄ le aólɛlā kú um gwéeyē tá um ŋ́.

²N jikwū klá uwɔ ká ā tá um abɔ̄, Óndú, Ɔwɔicō kú um. A kē le ɔkɔ kú um pó le um tabɔ̄.

³A le n nyatá ŋmá abɔ̄ kú ikwū. N kwú ikpó ú ce únóji. Amáŋ a le um pi wɛ̄ɛcɛ, le oyēeyī ɛ̄yīpɛ̄ je gā um.

⁴Aá gwíijē ká aá wóofu klla cɛ̄tra Óndú ā, odúúdú ācɛ okpaakpa kú Óndú ā. Aá blakwu ɔdā nɛ̄ anú nōo tīihɔ ā yá ā, cɛ́ɛ́ kú aá tá ɔ̄ ahínyá.

⁵Ó gē cɔ̄nū gbojī ajɛ ŋ́, ó gē yá ɔdā olɔhi piyóó. Ɔ̄cɛ lɔfú jikwū otú glá. Agīje lɔfú pɛ́ otú gbō ɔ̄cī glá, amáŋ éeyē géē gbɔɔ́ ɔ̄cɔ̄ɔ̄cī.

⁶Eko nɛ̄ n yɔ̄ ī má abahi klla yɔ̄ ɛbɔ́ ā, n ka, “É gáā yá um lé glá ŋ́.”

⁷O ŋmá lɛ olɔhi kú uwɔ ā, a gē gbō um bɛ̄ɛka ɔlɛ́ nɛ̄ ɛfu yɛ ɔ́ jīla tá biílí ā. Amáŋ a kwú iyī uwɔ ú tayínū ŋmá ɛgiyí um, anɔ́ɔ n kē gbɔɔ́ ō yúufi á.

⁸N hī uwɔ igwú Óndú, n gbɔ̄ɔkɔ gā uwɔ ká ā tá um abɔ̄.

⁹Ile nyá nāa géē lɛ ŋmá ikwū kú um ā? Itene nyá nāa géē lɛ ɔ́dāŋ ka n gekwú ā? Ācɛ nēe gekwú ɛɛ́ mā, géē cɛ̄tra uwɔ glá kpɔ́ ɛ́ɛ́ nɛɛ? É géē bá ī kɛlá ɔkwɛ̄yi kú uwɔ ā tɛ́ɛcɛ glá kpɔ́ ɛ́ɛ́ nɛɛ?

¹⁰Pó ɔkɔ nɛ̄ n yɔ̄ ī gbā ā, Óndú, méyīnyinyi um. Ká ā tá um abɔ̄, Óndú.”

¹¹A kwú ekwu ō yɔ̄ kú um í pīya ijē ōōjē kú éeyē ɛɛ́. A kwú ɔtūnōbí ū ŋmá ɛgiyí um, klla kwú éeyē ú gaá yɛ um jīla tá ɛɛ́.

¹²Ohígbū ɔ́ɔmā ā, ń gáā lɛ okónu klá ŋ́, n géē yɔ̄ í gwíijē, yɔ̄ ī cɛ̄tra uwɔ. Óndú, awɔ wɛ Ɔwɔicō kú um á. N géē tá uwɔ ahínyá piyóó ipú ɛcɛ nyā.