Read idoma AÍJĒ KÚ Ɛ̄GBĀ 32 Bible Online

AÍJĒ KÚ Ɛ̄GBĀ 32 - idoma bible

AÍJĒ KÚ Ɛ̄GBĀ 32

¹ Ɔ̄cɛ dúúmā nēé kwú íne nɛ̄ ó bīya ā í yá ɔ̄ ɛhi, nēé klla habɔ̄ ɔdōbɔ̄bí nɛ̄ ó yá ā tá lɛ ɔ́ kóō gwéeyē.

²Ɔ̄cɛ dúúmā, nɛ̄ Óndú ā ī kpó ɛlā obɔ̄bí dúúmā ce ɔ́ ŋ́ nɛ̄ ó kē wɛ ɔ̄cɛ o kɛ̄mgbɛ̄ ŋ́ mā kóō gwéeyē.

³Eko nɛ̄ ń ka íne nɛ̄ n bīya ā tɛ̄ɛcɛ ɛ́ɛ́ ŋ́, abɔ̄ kwú hɛ́ um iyē, ohígbū ikwū nɛ̄ um yɔ̄ ī je ɛ̄cī odunkwulu ā.

⁴Kwu otú kwu ɛnɔ, abɔ̄ kú italā nāa gē yá um ā, wu um iyē. Ɔfú kwú ŋmó ŋmá um iyē ɛ́gɛ́nɛ̄ éŋkpɔ̄ ī ŋmó ŋmá ajɛ ɔnɔ̄ ā.

⁵Anɔ́ɔ n le íne nɛ̄ n bīya ā ka tɛ́ɛcɛ gā uwɔ á. Ń kē je ɔ́ tayínū gā uwɔ ŋ́. N kahíníī, “N géē lɛ ɔdōbɔ̄bí nɛ̄ n yá ā ka tɛ́ɛcɛ gā uwɔ.” Anɔ́ɔ a kē kwú yá um ɛhi á.

⁶Ohígbū ɔ́ɔmā, odúúdú ācɛ nēe gē yɛce Óndú ā kéē gbɔ̄ɔkɔ gā uwɔ, eko kú unwalu kú uwā dóódu. Cɛ́ɛ́ eko nɛ̄ unwalu lɛ cēnyi ī pɛ́ wā kwūū ɛ́gɛ́nɛ̄ ɔkpá gē cēnyi ī pɛ́ kwūū ā, ó gáā gaajɛ uwā gɛ ŋ́.

⁷Awɔ wɛ ɛga nɛ̄ n gē tayínū á. Awɔ gē gbō um ŋmá ipú unwalu á. A le um yɛ jīla tá mla ācɛ nēe bá gē gwéeyē, yɔ̄ ī tɔ́ɔga ohígbū ka a le um hɛ́tá.

⁸Óndú a kahíníī, “N géē nwū uwɔ, ɔwɛ nāa géē nyɔ̄ ā, n gē nwū uwɔ ɛlā klla í ma ɔwɛ fú gā uwɔ.

⁹Ā híī lííla bɛ̄ɛka ɔnya ámāŋ ka ijakī ā ŋ́. Ohigbū ka é gē jé ɛga nēé gē nyɔ̄ ā ŋ́, jāā gbéeko nēé kwú anjámī ú wu uwā okónu, cɛ́ɛ́ kéē pīya uwā ɛyí tá ɔwɛ.”

¹⁰Ōwē kú ācobɔ̄bíipú ā géē nwuné nɛ̄hi. Amáŋ ihɔtū nɛ̄ Óndú ā lɛ lɛ ācɛ nēe kpɔ́tūce ɔ́ eko dóódu ā le yɛ uwá jīla tá biílí.

¹¹Aá nɛ̄ ucē kú aá le kpaakpa ā, aá gwéeyē, ohígbū ɔdā nɛ̄ Óndú ā yá ā. Aá nēe ī lɛyítáajɛ lɛ ɔ́ ā, aá gwéeyē ká aá tɔ́ɔga.