Read idoma AÍJĒ KÚ Ɛ̄GBĀ 34 Bible Online

AÍJĒ KÚ Ɛ̄GBĀ 34 - idoma bible

AÍJĒ KÚ Ɛ̄GBĀ 34

¹N gē tá Óndú ā ahínyá eko dóódu. N géē yɔ̄ ī cɛ̄tra Óndú ā piyóó.

²N géē yɔ̄ ī cɛ̄tra Óndú ā kú ɔdā nɛ̄ ó yá ā. Ká ācɛ nēé yɔ̄ ī lɛ abɔ̄ da uwá ɛyí tāajɛ ā kéē pó ɛ̄nyā, cɛ́ɛ́ kú ɔtū kóō he uwá.

³Aá wā í cɛ̄ um ka tɛ́ɛcɛ ka Óndú ā lɛ ojīlīmā nwuné nɛ̄hi. Aá wā kú ālɔ̄ cɛ̄tra Óndú ā tɔ̄há.

⁴N le ɔkɔ gbā lɛ Óndú ā, ó kē le ohi tá um. Ó le um hɛ́tá ŋmá ipú odúúdú aɔ́dā nēe yɔ̄ ī tū um ufi ā.

⁵Ācɛ nēé gē pīya tū ā, lɛ ɔtūce Óndú, ɔtū kē he uwá, uwēyī í gāa kwú uwā ŋ́.

⁶Ɔ̄cɛ nɛ̄ ó lɛ ɔ̄cɛ ɔhá nōo í tá ɔ̄ abɔ̄ ŋ́ mā, le ikwū je klá Óndú. Ó kē le ɔkɔ kú nū pó, anɔ́ɔ ó le ɔ́ nyatá ŋmá ipú odúúdú unwalu kú nū á.

⁷Alelékwū otɛ̄hɔ̄ kú Óndú ā, le yɛ ācɛ dóódu nēe gē yúufi Óndú ā jīlata, klla ī hɛ́ uwá tá.

⁸ Aá jé Óndú ā má, cɛ́ɛ́ ká ā má ɔ̄ ka, Óndú ā lɔhi íbí. Ɔtū he ɔ̄cɛ dóódu nɛ̄ Óndú ā gē gbō ā.

⁹Aá yúufi kú Óndú ā, ācɛ nēe wɛ ācɛ ɔlɛ́ nū ā, ohígbū ka ācɛ nēe gē yúufi nū ā, gē lɛ odúúdú ɔdā nēe ce uwá ɛgbá ā.

¹⁰Ɛgbá kú odée gē ce ayí kú ágábá. ɛmiyɛ klla ī ŋmó uwā dúú, amáŋ ācɛ nēe gē lɛyítáajɛ lɛ Óndú ā, ɔdā olɔhi dóódu í gē ŋá uwā ŋ́.

¹¹Aá wā, ācɛ nēe gē nwū odée ŋmá ɛgiyí um ā, aá jáhɔ̄ gā um, n géē nwū aá ɛ́gɛ́nɛ̄ aá géē gbā Óndú ā ɛ̄gbā.

¹²Ɔ̄nyɛ yɔ̄ abɔ́ɔ nɛ̄ oyēeyī olɔhi he ɔ́ ɔtū, nōo gē cɛgbá oyēeyī olīkpō. Ɔ̄nyɛ yɔ̄ nōo dɔ̄ɔ̄kā kóō jé ɔ̄nyɛ kú oyēeyī?

¹³Ayíka, ɔ̄cɛ ɛ́gɔ́ɔmā kóō kwú ígblɛ́nyī kú nū ú táajɛ hɛ́ ɛ̄kɛ̄mgbɛ̄ ō kā tá. Kóō lɛ okónu kú nū táajɛ ŋmá ɛ̄kɛ̄mgbɛ̄ ō kā.

¹⁴Kó ō nyɛ̄ɛ̄ ŋmá ipú ɔdōbɔ̄bí, kóō yá ɔdā nōo lɔhi. Kóō cēyītīkwū nɛ̄hi, cɛ́ɛ́ ká ācɛ kéē lɛ ɛbɔ́ lɛ.

¹⁵Eyī kú Óndú ā kwu ācɛ ō yá okpaakpa. Ó gē jāhɔ̄ lɛ ikwū nēé gē je ā.

¹⁶Amáŋ, Óndú gē héyī kwu ācɛ oyóbɔ̄bí ā, kóō lɛ uwá kpó yífi ŋmá ipú ɛcɛ, nɛ̄ ɔ̄cɛ dúúmā í gáā blakwu uwá gɛ ŋ́.

¹⁷Eko nɛ̄ ācɛ okpaakpa gē jikwū kú otábɔ̄ ā Óndú gē pó. Ó kē ī nya uwá tá ŋmá ipú unwalu kú uwā.

¹⁸Óndú ā gē kwu ācɛ nɛ̄ ɔtū kú uwā le gbenyi ā ajaajɛ. Ó klla gē nya ācɛ nēé lɛ eyīyōce ŋ́ mā tá.

¹⁹Unwalu mɛ́mla ōwē kú ācɛ okpaakpa ā lɛwa nɛ̄hi, amáŋ, Óndú ā géē nya uwá tá ŋmá ipú odúúdú aúnwalu ā kpɛ́mm.

²⁰Óndú ā gē gbō uwā ɔwɛ dóódu, nɛ̄ ikpokwú kú odúúmā kú uwā í kōō gáā ce ŋ́.

²¹Ɔdōbɔ̄bí géē ŋmó ācobɔ̄bíipú á. É géē yá ācɛ nēe gē wɔ́tū ācɛ okpaakpa ā italā.

²²Óndú ā gē nya oyēeyī kú ɔ̄cocɛ̄hɔ̄ kú nū tá. Ācɛ dóódu nēe gā ɛgiyí Óndú kóō gbō uwā, ó gē nya uwá tá, é gáā ŋmó uwā ɛpɔ̄bí ŋ́.