Read idoma AÍJĒ KÚ Ɛ̄GBĀ 35 Bible Online

AÍJĒ KÚ Ɛ̄GBĀ 35 - idoma bible

AÍJĒ KÚ Ɛ̄GBĀ 35

¹Bɛ́yíkwu ācɛ nēé bɛ́yíkwu um ā, Óndú. Óndú, nuunu tá ācɛ, nēe gē nuunu tá um ā.

²Kwú ɔkplɛ́fú ō bī abɔ̄ mɛ́mla ɔkplɛ́fu ō wu iyē kú uwɔ ú kpó, ká ā wā í tá um abɔ̄.

³Lɛ ɔdájī mɛ́mla óbō kú uwɔ pīya kwu ācɛ nēe gē nū um inya ā. Ká ā da um ka awɔ, Óndú ā géē hɛ́ um tá.

⁴Ācɛ nēe gē tíne kéē ŋmó um ā, uwēyī kóō lɛ uwá kwú ká ā lɛ uwá yálé. Ācɛ nēe gē tū ujɔ̄ tū um ā, lɛ uwá kpó cīgbīhi, kéē lɛ uwá kpó gbájí.

⁵Kéē lɛbɛ̄ɛka igbóngbō ocikāpā nɛ̄ owu gē gwu bónū ā, abɔ̄ alelékwū-ōtɛ̄hɔ̄ kú Óndú ā yɔ̄ ī nu uwā inya ā.

⁶Ɔwɛ kú uwā kóō kwú pīya ɛtrɔ-ɛtrɔ mɛ́mla obū, eko nɛ̄ alelékwū-ōtɛ̄hɔ̄ kú Óndú ā í yɔ̄ ī nū uwā inya ā.

⁷Ń yá uwá ɔdā dúúmā ŋ́, amáŋ é je ukpa gbēyī um. É lɛ ɔ̄gɔ̄ bū tá ajɛ gbēyī um ká n̄ le míya tá ipú nū, nááná nɛ̄ ń yá uwā ɔdā dúúmā ŋ́ mā.

⁸Ífi kóō wā í klá uwá acígilí ukpa nēé kpla ā kóō lɛ uwá kwú. Ké ē má gwōnū tá ipú ɔ̄gɔ̄ kú ífi kú uwā.

⁹Cɛ́ɛ́ n géē yɔ̄ ī gwéeyē ohígbū ɔdā nɛ̄ Óndú yá ā. N yɔ̄ ī gwéeyē ohígbū ka ó le um hɛ́tá.

¹⁰N géē da Óndú ā ɔ̄kā mla odúúdú ɔtū kú um ka, n géē yɔ̄ ī cɛ̄tra, klla í da Óndú ā kahíníī, “Ɔ̄nyɛ lɛbɛ̄ɛka awɔ ā? Ohígbū ka a gē hɛ́ ācɛ nēé lɛ otábɔ̄ ŋ́ mā tá ŋmá abɔ̄ kú ācɛ nēe le lɔfú ce uwá bá ā. A klla ī hɛ́ ācɛ nēé lɔfú ŋ́ mā tá ŋmá abɔ̄ kú ācɛ o pīya ɔ̄cɛ tū.”

¹¹Ācɛ oyódōbɔ̄bí bá ī cɛ̄ ijáalí ɛ̄kɛ̄mgbɛ̄ tū um. É gē da um ɔ̄kā kú ɔdā nɛ̄ ń jé ŋ́, ɛ́ɛ́ nɛ̄ n gē jɔ́ɔkwu nū ŋ́ mā.

¹²É bī obɔ̄bí gē le cílá um ulé kú ɔdā olɔhi nɛ̄ n yá ā. Odo kú um má tówódō icíici.

¹³Amáŋ eko nēé bá ī doōcē ā, n lɛ okónu gwū, le ewo wu klá ɛyí. N le īlī ekwu kpó wiyē, klla le ɛyí playi ajɛ yɔ̄ ī gbɔ̄ɔkɔ ohígbū uwā.

¹⁴Bɛ̄ɛka ɔdā nɛ̄ n yɔ̄ ekwu kú oklóbīya um, ámāŋ ɔyínɛ́ um ā. N yɔ̄ ī yɛ le ɛyí playi ajɛ bɛ̄ɛka ɔ̄cɛ nōo yɔ̄ ekwu kú ɛ́nɛ́ nū ā.

¹⁵Amáŋ, eko nɛ̄ n le tá ipú unwalu ā, odúúdú uwā bá ī gwéeyē. Odúúdú uwā le jīla tū um bá yɔ̄ ī yá ucē obɔ̄bí nɛ̄ ó lɛ oōmɛ ŋ́,

¹⁶Ācɛ nēé jé uwɔ ŋ́ nēe bá nyā, bá gē yá um ɛbɛ́ bɛ̄ɛka ɛ́gɛ́nɛ̄ é gē yá ocīkpó ɛbɛ́ ā. Cɛ́ɛ́ é klla bá ī má um ɔkɔnyɔ ī hīlayīnu kú íwɔ́tū um.

¹⁷Óndú, eko nyá nāa géē yɔ̄ ī leyīkwu um áncā lɛ ā gaá kwu, nɛ̄ aá gáā tú um abɔ̄ ŋ́ māā? Lɛ um hɛ́tá ŋmá abɔ̄ kú uwā. Lɛ oyēeyī kú um nyatá ŋmá abɔ̄ aágábá nēe bá ā.

¹⁸Cɛ́ɛ́ ká n̄ géē tá uwɔ ahínyá ipú ójīla kú ācɛ ɔlɛ́ uwɔ. N géē cɛ̄tra uwɔ ipú ójila kú odúúdú ācɛ ɔlɛ́ uwɔ ā.

¹⁹Ā cɛ̄ lɛ aólɛlā kú um nēe gē wɔ́tū um ā gwéeyē tá um ŋ́, Óndú.

²⁰É gē kɛlā ɔwɛ nōo gē bī ɛbɔ́ wā ŋ́, ikɔkɔ ɔ́ɔmā, é gē kā ɛdɔ ɛ̄kɛ̄mgbɛ̄ dóódu ce ācɛ nɛ̄ ɛbɔ́ ī he uwá ɔtū ā.

²¹É gē nwūla okónu kú uwā gbādāā lɛyíkwu um, cīije bá um kahíníī, “Ɛhɛ̄ɛ, Ɛhɛ̄ɛ, Alɔ má uwɔ abɔ̄yī alɔ.”

²²Óndú, a lɛ ɔdā nōo gē yá ā má ɛɛ́. Ā lɛ okónu klá gɛ ŋ́. A híī yɛ ligbō hɛ́ um tá gɛ ŋ́.

²³Cānjɛ Óndú, cɛ́ɛ́ ká ā cɛ̄pɔ̄ um. Cāŋjɛ, Ɔwɔicō kú um, ká ā lɛ ɔkɔ kú um ka.

²⁴Óndú um mɛ́mla Ɔwɔicō kú um, da uwá ka ń jíkpó ɔdā dúúmā ŋ́. A cɛ̄ lɛ uwá gwéeyē tá um gɛ ŋ́.

²⁵Ā híī cɛ̄ lɛ uwá da iyī uwā kahíníī, “Alɔ le ɔdā nōo kwu alɔ ɔtū ā yá ɛɛ́. Alɔ kē le ɔ́ ŋmó tāajɛ dúúdú ɛɛ́.”

²⁶Lɛ ācɛ nēe gē gwéeyē ohígbū unwalu kú um ā ɔtū gbájí. Uwēyī kóō le pīya klá ācɛ nēe gē gbɛlá ka aá lɔhi fíyɛ́ um ā, ɛ́gɛ́nɛ̄ īlī ī klá ɔ̄cɛ iyē ā.

²⁷Le ɔ́ yá tɔ́ɔtɛ́ lɛ ācɛ nēe gē tíne ká n̄ lɛ́pɔ̄hi ā, kéē gwéeyē klla tɔ́ɔga, kú ɔtū kóō he uwá, nēé géē yɔ̄ ī ka tɛ́ɛcɛ eko dóódu kahíníī, “Óndú ā lɔfú nɛ̄hi. Anú nōo gé lɛ ɛlá kwu ō yɔ̄ lɔhi kú ɔ̄cocɛ̄hɔ̄ kú nū ā.”

²⁸Cɛ́ɛ́ n géē yɔ̄ ī kɔ̄kā olɔhi mɛ́mla okpaakpa kú uwɔ piyóó. N klla í yɔ̄ ī cɛ̄tra uwɔ ɛ̄cī dóódu.