Read idoma AÍJĒ KÚ Ɛ̄GBĀ 37 Bible Online

AÍJĒ KÚ Ɛ̄GBĀ 37 - idoma bible

AÍJĒ KÚ Ɛ̄GBĀ 37

¹Ā híī je unwalu lɛ iyī uwɔ ohígbū ācobɔ̄bíipú ŋ́. Ā híī hɔ́ɔkɔ kú ɔdā dóódu kú ācɛ ō yá ɔdōbɔ̄bí ŋ́.

²É géē bí tāajɛ bɛ̄ɛka ácí nōo le ŋmókókó ā. É géē kwú bɛ̄ɛka ɔcí nōo le wúla ēpū ā.

³Aá lɛ ɔtūce Ɔwɔicō lɔfú lɔfú. Aá yá ucē olɔhi cɛ́ɛ́ kú aá lā ipú ajɛ ā ɛbɔ́.

⁴Aá yá ɔdā nēe he Óndú ā ɔtū ā, cɛ́ɛ́ kóō je aɔ́dā nēe he aá ɔtū ā lɛ aá.

⁵Kwú iyī uwɔ ú tū Ɔwɔicō abɔ̄. Le ɔtū kpóce ɔ́, ó géē tá uwɔ abɔ̄ í yá ɔdā nōo ce uwɔ ɛgbá ā.

⁶Ó géē yá ka olɔhi mɛ́mla okpaakpa kú uwɔ kóō fíyajɛ pélúú bɛ̄ɛka ɛnɔ oyɛ̄ɛyí ā.

⁷Gbeyī cíí, cɛ́ɛ́ kú ā gbēyī ɔdā nɛ̄ Ɔwɔicō í yá ā. Ā híī je unwalu lɛ iyī uwɔ ohígbū ācɛ nēe ī jāgbénū fíyafíya ā, ámāŋ ka ācɛ nēe ī yá lɔhi ipú ɔdōbɔ̄bí nēé gē miya ā ŋ́.

⁸Ā híī je ɛga lɛ unwalu amáŋ ɔnū ipú ɔtū kú uwɔ ŋ́. Ohígbū ka ó gē kpó ɔ̄cɛ abɔ̄ tū ɔdōbɔ̄bí mɛ́mla unwalu ōfōōfūnū.

⁹Ācɛ dúú nēe lɛ ɔtūce Óndú ā, géē lé úgwū kú ajɛ ā. Amáŋ é géē nū ācobɔ̄bíipú ā, bɛ̄cɛ ŋmá ipú ajɛ ā.

¹⁰Eko kpií nōo ī wā ā, ācobɔ̄bíipū kē í bí tāajɛ. Á jé ŋ́, a géē yɔ̄ ī dɔɔ̄kā uwā, amáŋ á gáā pīyɛ̄ uwá gɛ ŋ́.

¹¹Ācɛ nēé ī tú iyī uwā wāajɛ ā géē lā ipú ajɛ ā. É klla í jɔ́ɔnyɛ gɔbū ipú ɛbɔ́ mɛ́mla aɔ́dā olɔhi nɛ̄ Ɔwɔicō ī je lɛ ācɛ ā.

¹²Ɔ̄cōbɔ̄bíipú ā gē tū ujɔ̄ tū ɔ̄cɛ olɔhi klla ī má ɔ̄ ɔkɔnyɔ̄ obɔ̄bí.

¹³Amáŋ, Óndú ā í yɛhɛ tū ācobɔ̄bíipú ā, ohígbū ka ó jé ka ɔ́ gáā gbojī ɛ́ɛ́ kéē kpó uwā yíífi ŋmá ajɛ ŋ́.

¹⁴Ācobɔ̄bíipū ā, le ɔkpacaŋ́gelī kú uwā pi ŋmá apɛ́, lɛ ɔtā kú uwa túce kéē ŋmó aólɛhá mɛ́mla ācɛ nɛ̄ ɛgbá ce uwá nɛ̄hi ā, kéē klla lɛ ācɛ nēe ī yá ucē okpaakpa ā kpó ŋmó.

¹⁵Amáŋ, ɔkpacaŋ́gelī kú uwā piíí ɔ́ɔmā, nēé géē bī le ŋmó uwā á. É klla í kpó ɔtā kú uwā cē kwaákwaá bónū ŋmá uwá abɔ̄.

¹⁶Ɔdā nɛ̄ŋcɛ́ lígíi, nɛ̄ ɔ̄cɛ o yá olɔhi ā lɛ ā, béyī fíyɛ́ agbénú kú ɔ̄cɛ ōbɔ̄bíipú á.

¹⁷Ohígbū ka Óndú ā géē mīyɛ ɔfú kú ɔ̄cobɔ̄bíipú ŋmá ɛgiyí nū, amáŋ, ó géē gbō ācɛ oyólɔhi ā ɛyí.

¹⁸Óndú ā gē lɛ ɛlá kwu ācɛ nēe gē lɛyítáajɛ lɛ ɔ́ ā. Ajɛ ā klla géē wɛ ákú uwā piyóó.

¹⁹É gáā móōwē eko obɔ̄bí ŋ́, amáŋ é géē lɛ ɔdōlé cabɔ̄ bá eko kú ɔkpɛtā.

²⁰Amáŋ ācobɔ̄bíipú ā géē je yíífi. Aólɛlā kú Óndú ā géē je wúla bónū bɛ̄ɛka ododó kú ɔ̄cɔ̄ɔ̄cī ā, é klla í mɛ tāajɛ bɛ̄ɛka ódūdū nɛ̄ owu gē kpó nyɔ̄ ā.

²¹Ācobɔ̄bíipú ā gē kplá ɔ̄dā, é kē ī cíla ŋ́. Amáŋ ācɛ okpaakpa ā gē jɛ́ɛlā. É klla gē nwūlabɔ̄ lɛ ācɛ.

²²Ohígbū ka ācɛ nɛ̄ Óndú ā hɔ́ɔhā ce uwá ā géē lā ipú ajɛ ā. Amáŋ ācɛ nɛ̄ Óndú ā tókónu lɛ uwá ā, é géē nū uwā ŋmá ipú ajɛ ā.

²³Eko nɛ̄ ucē kú ɔ̄cɛ dúúmā le he Ɔwɔicō ɔtū, ó ī gbō ɔ̄cɛ ɔ́ɔmā, ga ɛga dúú nɛ̄ ó cíkā ō nyɔ̄ ā.

²⁴É túgagá nááná, é gáā pīya ɔcíkōtō ŋ́ ohígbū ka Óndú ā lɛ abɔ̄ bī uwā.

²⁵N le gbo ɔnyākwɔ́cɛ klla kwú hīla ɛɛ́, amáŋ ń má ɔ̄cɛ okpaakpa dúúmā nɛ̄ Óndú ā kwú ɛlá nū ú gwū jéjée ɛ́ɛ́ ŋ́.

²⁶Amáŋ eko dúúmā, ó gē kpó odée lɛ ācɛ alahá, klla ī lɛ ɔdā ō le kplá ācɛ ɔhá. Ayí nū kē wɛ ɔhá nɛ̄ Óndú ā hɛ́ ce ɔ́ á.

²⁷Aá lɛ igbīhi cē kwu ɔdōbɔ̄bí ká ā yá olɔhi, cɛ́ɛ́ ayááyí aá géē lā ipú ajɛ ā.

²⁸Ohígbū ka ɔdā nōo le kpaakpa he Óndú ā ɔtū á. Ó gē kwu hɛ́ ācɛ ɔlɛ́ nū ā tá ŋ́. Ó gē gbo uwá piyóó. Amáŋ ó gē nū ayááyí kú ācobɔ̄bíipú ā tɛ́ɛcɛ.

²⁹Ācɛ o yá ucē okpaakpa ā géē lé úgwū kú ajɛ ā, klla í lā ipú ajɛ ā piyóó.

³⁰Ɔ̄cɛ okpaakpa ā, gē kɛlā kú íjééyī. Ó kē ī kɛlā ɔkwɛ̄yi ŋmá okónu eko dóódu.

³¹Íne kú Ɔwɔicō le mu ɔ́ ɔtū. Ó gē nyā ŋmá íne kú Ɔwɔicō tá gbóógbóō ŋ́.

³²Ɔ̄cobɔ̄bíipú ā gē gbō ɔ̄cɛ okpaakpa ā gɛɛ, kóō ŋmó ɔ̄.

³³Amáŋ, Óndú ā í gáā kwu hɛ̄ ɔ̄ tá, lɛ aólɛlā kú nū gbóógbóō ŋ́, ɛ́ɛ́ nɛ̄ ó gē má ɔ̄ tá kóō lé ɛpɔ̄bí eko nēé í kɛpɔ̄ tū ɔ̄ ŋ́.

³⁴Aá lɛ ɔtūce Óndú ā, ká ā lɛyí táajɛ lɛ ɛlā kú nū, ó géē lɛ ojīlīmā ce aá, klla í je ajɛ ā lɛ aá. A kē í má ācobɔ̄bíipú ā abɔ̄ é géē nū uwā bɛ̄cɛ ŋmá ipú ajɛ ā.

³⁵N jé ɔ̄cōbɔ̄bíipú éyi nōo lɔfú ikpó nɛ̄hi. Ó le fíyɛ́ ācɛ dóódu abɔ̄, ɛ́gɛ́nɛ̄ Usɛ́da gē jɛ̄ fíyɛ́ aɔ́cí ɔhā dóódu ipú ūpū kú Ulɛ́bānɔn ā.

³⁶Amáŋ igbīhāajɛ, ń má ɔ̄ abɔ́ɔ gɛ ŋ́, n tíne nū, amáŋ ń pīyɛ̄ ɔ̄ glá gɛ ŋ́.

³⁷Leyī kwu ɔ̄cɛ ɔkwɛ̄yi ā, téeyī wāajɛ ká ā má ɔ̄cɛ okpaakpa ā, ɔ̄cɛ kú ɛbɔ́ ā gē lɛ ayááyí.

³⁸Amáŋ é gē je ācobīyíne ā kpó yíífi ŋmá ajɛ. É klla géē je ayááyí nū kpó ŋmó bónū ŋmá ipú ɛcɛ.

³⁹Óndú gē nya ācɛ nēe gē yá ɔdā okpaakpa ā tá. Ó klla ī gbō uwā eko kú unwalu.

⁴⁰Óndú í tá uwā abɔ̄ klla í hɛ́ uwá tá. Ó géē nya uwá tá ŋ́má abɔ̄ kú ācobɔ̄bíipū, ohígbū ka ācɛ okpaakpa ā géē kwu ga ɛgiyí Óndú ā kóō gbō uwā ɛyí.