Read idoma AÍJĒ KÚ Ɛ̄GBĀ 38 Bible Online

AÍJĒ KÚ Ɛ̄GBĀ 38 - idoma bible

AÍJĒ KÚ Ɛ̄GBĀ 38

¹Óndú, ā híī yá um italā eko nāa le cɔ̄nū ŋ́, ɛ́ɛ́ nāa kōō ī bī ánya le yá um italā ŋ́.

²Ɔyī kú uwɔ nāa tá ce um ā le tá ipú iyē kú um ɛɛ́. Abɔ̄ kú uwɔ kē le um fīyɛ̄ wāajɛ.

³N yɔ̄ ī jɔ́ɔnɔ nɛ̄hi ohígbū ɔnū nāa cɛ̄ ā. Odúúdú iyē kú um í lɛ ɔbɔ́lā gɛ ŋ́, ohígbū íne nɛ̄ n bīya ā.

⁴Íne nɛ̄ n bīya ā kwú um mulɛ ɛ́gɛ́nɛ̄ éŋkpɔ̄ nɛ̄hi gē je ɔ̄cɛ bí ipú nū ā. Aíne nɛ̄ n bīya ā le jɛ̄ um ɛ̄jɛ̄, ɛ́gɛ́nɛ̄ iyó nōo le gbɛnú fíyɛ́ um abɔ̄ ge jɛ̄ um ō bī ā.

⁵Ohígbū íla kú um ā, ipí kú um yɔ̄ ī nyīla tōōtɔ̄ɔ̄ klla le wā, yɔ̄ ī nípī fiyúu.

⁶Ɔnɔ nɛ̄ n yɔ̄ ī jé ā í cɛ̄ gā um háyi icō kpaakpa glá ŋ́. N yɔ̄ ī jikwū eko dóódu bɛ̄ɛka ɔ̄cɛ nōo yēkwu ā.

⁷Iyē kú um yɔ̄ ī hɔ́lá gbáyíí, ōcē yɔ̄ ī yá um nɛ̄hi.

⁸N mɛ ŋmá ajɛ dúúdú ɛɛ́, ń kōō jé ɔdā dóódu gɛ ŋ́, ohígbū unwalu nɛ̄ n tá ipú nū nyā.

⁹Óndú ā jé ɔdā nōo wɛ ɛgbá kú um ā, a kē pó ifu nɛ̄ n yɔ̄ ī tá ā dúú.

¹⁰Ɔtū kú um yɔ̄ ī gwō kin kin kin, abɔ̄ le hɛ́ um iyē ɛɛ́. Eyī kú um í klla mɛ́ɛbɛ lɔhi gɛ ŋ́.

¹¹Aóklóbīya um, mɛ́mla aɔ́mpa um í cē túblá um gɛ ŋ́, ohígbū ipí kú um ā. Kwú aɔ́máapú um piíí ā, gē kwu ŋmá ɛgiyí um dúú.

¹²Ācɛ nēe tíne kéē ŋmó um ā, le ukpa kpla gbēyī um ɛɛ́. Ācɛ nēe tíne ō yá um ɔdōbɔ̄bí ā yɔ̄ ī fu um ɔnū ka aá í je um yíífi. É mlɛ̄nyɔ̄ ō tū ujɔ̄ obɔ̄bí tū um ŋ́.

¹³Amáŋ n lɛbɛ̄ɛka odahɔ̄ nɛ̄ ó pó ɛlā dóódu gɛ ŋ́ mā, n lɛbɛ̄ɛka odokónu nɛ̄ ó kɛlā glá gɛ ŋ́ mā.

¹⁴N le yá bɛ̄ɛka odahɔ̄ nɛ̄ ó tá ohi ɛlā kú ɔ̄cɛ glá ŋ́ mā, ohígbū ka ó pó ɛlá nēé gē ka ā ŋ́.

¹⁵Amáŋ, n lɛ ɔtūce uwɔ, Óndú, awɔ nōo wɛ Óndú, Ɔwɔicō kú um ā kē í tá um ohi.

¹⁶Ā cɛ̄ lɛ aólɛlā kú um gwéeyē tū um eko kú unwalu kú um ŋ́. Ā cɛ̄ lɛ uwá gwō ohígbū abɔ̄ kú um nōo wāajɛ nyā ŋ́!

¹⁷N gáā gwōnū ɛɛ́, n kē yɔ̄ ī jé ɔnɔ eko dóódu.

¹⁸N gē ka aíne nɛ̄ um bīya ā tɛ́ɛcɛ, ohígbū keé cɛ̄ lɛ ufi gē yá um.

¹⁹Ācɛ nēe kwú iyī uwā í pīya aólɛlā kú um áncā nɛ̄ ń yá uwá ɔdā dúúmā ŋ́ mā, le lɔfú nɛ̄hi. Ācɛ nōo klla gē wɔ́tū um áncā nɛ̄ um yá uwā ɔdā dúúmā ŋ́ mā le lɛwa nɛ̄hi.

²⁰Ācɛ nēe gē bī obɔ̄bí le cílá um ulé olɔhi nɛ̄ n yá lɛ uwá ā, wɛ aólɛlā kú um, ohígbū ka n gē yá ɔdā nōo lɔhi ā.

²¹Á híī je ɛlá um gwó ŋ́, Óndú, Ɔwɔicō kú um, a híī yɔ̄ ligbō hɛ́ um tá ŋ́.

²²Hápápá wā í tá um abɔ̄, Óndú ā, awɔ nōo ī hɛ́ um tá ā.