Read idoma AÍJĒ KÚ Ɛ̄GBĀ 40 Bible Online

AÍJĒ KÚ Ɛ̄GBĀ 40 - idoma bible

AÍJĒ KÚ Ɛ̄GBĀ 40

¹N gbēyī Óndú cíí kóō tá um abɔ̄. Ó kē le ahɔ̄ jē gā um, klla le ikwū nɛ̄ n je ā pó.

²Ó lɛ um pi wɛ̄ɛcɛ ŋmá ɔ̄gɔ̄ ōtūufi mɛ́mla ɔ̄gɔ̄ itɛ kú ikwū. Ó kwú um ú ce ɛyí ápátɛ́cɔ̄, klla le um ikpó bū tū kli.

³Ó le ijē ɛ̄yīpɛ̄ nwū um kú n̄ gwó, ijē kú ocɛ̄tra Ɔwɔicō kú alɔ. Ācɛ alɛwa nēe géē má ɔdā nyā ā, í yúufi, klla í kpɔ́tūce Óndú.

⁴É géē hɔ́hā ce ɔ̄cɛ dúúmā, nōo lɛ ɔtūce Óndú ā. Ɔ̄cɛ nɛ̄ ó gē ga ɛgiyí aíkpékwūja ŋ́, mɛ́mla ācɛ nēé gē gbā aɔ́wɔ ɛ̄kɛ̄mgbɛ̄ ɛ̄gbā ŋ́ mā.

⁵Óndú, Ɔwɔicō kú um, a le ɔdā idáagó alɛwa yá lɛ alɔ ɛɛ́. Ɔ̄cɛ dúúmā í lɛbɛ̄ɛka awɔ ā ɛ́ɛ́ gɛ ŋ́. A miya ɔdā olɔhi nɛ̄hi alɛwa tū alɔ. Ń kē gáā ka uwá tɛ́ɛcɛ dúúdú glá ŋ́, ohígbū ka é lɛ ɛwa nɛ̄hi.

⁶ Á tíne ɛhi kú aɔ́dā kú ɛ̄gbā ŋ́, á klla kē cɛgbá ɛya ō yɔlá dúúdú ámāŋ ka ɛya kú ínoōbīya ŋ́. Amáŋ a le ahɔ̄ je gā um, ká n̄ pó ɔkɔ kú uwɔ.

⁷Anɔ́ɔ n tá ohi kahíníī, “Ami yɔ̄ á, ɔdā nāa tíne ká n̄ yá kpɛ́mm ā, bá ipú ɔkpá nōo ī nwū ukɔ́ kú uwɔ ā.

⁸Ó he um ɔtū nɛ̄hi ká n̄ yá ɔdā nōo he uwɔ ɔtū, Ɔwɔicō kú um. Íne kú uwɔ yɔ̄ ipú ɔtū kú um.”

⁹Óndú n le ɔ̄kā olɔhi ā ka tɛ́ɛcɛ ipú ójīla kú odúúdú ācɛ ɔlɛ́ uwɔ ā, ka a le alɔ nyatá ɛɛ́. A jé, Óndú, a jé ka ń gáā klá okónu tū ō ka ɛ̄nyā tɛ́ɛcɛ glá ŋ́.

¹⁰Ń je ɔ̄kā kú onyatá nyā tayínū ipú ɔtū kú um ŋ́, amáŋ n gē ka ɔ̄kā ā tɛ́ɛcɛ lɛ ācɛ eko dóódu ɛ́gɛ́nɛ̄ a ī yá ucē okpaakpa lɛyíkwu ācɛ ɔlɛ́ uwɔ, nāa klla ī tú uwā abɔ̄ lɛ ā. Ipú ójīla kú odúúdú ācɛ kú uwɔ Óndú, ń klá okónu tū ɛ́gɛ́nɛ̄ a ī yá ucē ɔkwɛ̄yi, klla ī yíihɔtū tá ācɛ ɔlɛ́ uwɔ eko dóódu lɛ ā ŋ́.

¹¹Ondú, eyinyinyi um nɛ̄ ā gē má ā kóō kwɛjī ɔwɛ ŋ́. Yɔ̄ ī gbō um ohígbū ka a yíihɔtū tú um eko dóódu, a klla ī yá ucē okpaakpa lɛyíkwu um.

¹²Unwalu nɛ̄ ń gbaáluka glá ŋ́ mā le yɛ um jila tá biílí. Íne nɛ̄ n bīya ā le um kwú klla cɛ̄ gā um mɛ́ɛbɛ lɔhi glá gɛ ŋ́. Íne nɛ̄ n bīya ā lɛ ɛwa fíyɛ́ īnyīlɛ̄yí kú um. Abɔ̄ kē le hɛ́ um iyē ɛɛ́.

¹³Ondú, kóocō lɛ um hɛ́tá, Ondú, wā ī tá um abɔ̄ fíyaa.

¹⁴Lɛ uwēyī je lɛ ācɛ nēe ī tíne kéē lɛ um ŋmó ā, lɛ uwá gbájí, cɛ́ɛ́ ká ā lɛ uwá yálé. Ācɛ nēe bá ī gwéeyē tū um ohígbū unwalu kú um ā, lɛ uwá cīgbīhi ŋmá ɛgiyí um ipú uwēyī.

¹⁵Uwēyī kóō lɛ ācɛ nēe gē yɛhɛ tū um ā kwú.

¹⁶Amáŋ, Óndú, le yá kú ɔtū kóō he odúúdú ācɛ nēe wā ɛgiyí uwɔ ā, cɛ́ɛ́ kéē gwéeyē. Yá kú odúúdú ācɛ nēe ī dɔ̄ɔ̄kā ō tá uwɔ ahínyá, ohígbū ka a le uwá nyatá ā, kéē bá ī ka eko dóódu kahíníī, “Ondú ā lɔfú nɛ̄hi.”

¹⁷Ami ā, n wɛ ogbɛhá mɛ́mla ɔ̄cɛ nɛ̄ ó lɛ ɔ̄cɛ nōo ī tá ɔ̄ abɔ̄ ŋ́. Awɔ gē tá um abɔ̄ klla ī hɛ́ um tá á, Óndú. Wā í tá um abɔ̄ fíyaa, ā kpéko bónū gɛ ŋ́, Ɔwɔicō kú um.