Read idoma AÍJĒ KÚ Ɛ̄GBĀ 41 Bible Online

AÍJĒ KÚ Ɛ̄GBĀ 41 - idoma bible

AÍJĒ KÚ Ɛ̄GBĀ 41

¹Ɔhā yɔ̄ lɛ ācɛ dúúmā nēe bī odo olɔhi lɛyíkwu aógbɛhá. Óndú ā géē hɛ́ ɔ̄ tá eko kú unwalu.

²Óndú ā géē gbō ācɛ ɛ́gɔ́ɔmā klla í lɛ oyēeyī kú uwā tū. Óndú ā géē yá kóō gwéeyē ipú ajɛ ā. Ó gáā mā ɔ̄ tá ipú abɔ̄ kú aólɛlā kú nū ŋ́.

³Eko dúúmā nɛ̄ ó gē doōcē, Óndú ā géē tá ɔ̄ abɔ̄, klla ī nya ɔ́ tá ŋmá ōcē kú nū ɔ́ɔmā.

⁴Ami ā gē ba Óndú ā kahíníī, “Óndú, n le íne bīya, le uwɔ yá cɔ̄nū ɛɛ́, ményīnyi um ká ā lɛ um nyatá ŋmá ōcē.”

⁵Aólɛlā kú um gē má um ímálānyī, gē dɔ̄ɔ̄kā kú n̄ gekwú, kú iyē kú um kóō gebí ŋmá ipú ɛcɛ ā.

⁶Eko nɛ̄ ācɛ gē wā í má um kú ōcē ā, é bī ɔkwɛ̄yi ipú ŋ́. É ī wā kē wā í bla ɔ̄kā obɔ̄bí lɛyíkwu um, amáŋ ipú kú uwā wɛ ogwiji lɛyíkwu um. Cɛ́ɛ́ eko dúú nēé le bɛ̄cɛ ŋmá ɛgiyí um nɛɛ, é gē ka ɔ̄kā obɔ̄bí tɛ́ɛcɛ ɛbɛɛbɛ.

⁷Odúúdú ācɛ nēe gē wɔ́tū um ā, gē lɛ ahɔ̄ bá īyī uwā ahɔ̄, gē gbɛlá obɔ̄bí lɛyíkwu um eko dóódu.

⁸É gē ka kahíníī, “Ōcē obɔ̄bí nɛ̄hi gē yá ɔ̄ á, ó klla gáā wi ŋmá ōcē nyā glá gɛ ŋ́.”

⁹O fíyɛ́ dúú ā, kwu aóklóbīya um, nɛ̄ n lɛ ɔtūce uwá ā, nēe gē lé ɔdōlé ɔlɛ́ um ā, lɛyí bú kwu um dúú.

¹⁰Amáŋ, Óndú ā ményinyi um, ká ā lɛ um hɛ́tá ŋmá ōcē nyā kú n̄ lɛ óluma cílá uwá.

¹¹Oŋmá lɛ ɛ̄nyā ā, n kē le jé ka n he uwɔ ɔtū, nɛ̄ á cɛ̄ kú aólɛla kú um kéē yá um lé ŋ́ má.

¹²A géē tū um abɔ̄, ohígbū ka n yá ɔdā okpaakpa. A kē í cɛ̄ gā um klá ɛgiyí uwɔ piyóó.

¹³Aá cɛ̄tra Óndú, Ɔwɔicō kú Ísrɛ̄lu, ŋmá abālɔbányā ga eko nɛ̄ ó ī mɛ ŋ́. Aamí, aamí.