Read idoma AÍJĒ KÚ Ɛ̄GBĀ 42 Bible Online

AÍJĒ KÚ Ɛ̄GBĀ 42 - idoma bible

AÍJĒ KÚ Ɛ̄GBĀ 42

¹Óndú, n cɛ́gbá awɔ ɛ́gɛ́nɛ̄ īkpɛɛnū gē tíne éŋkpɔ̄ ō hīlaŋdɔ́ kú ɔkpá nōo yɔ̄ ī pɛ́ ā.

²Ɔwɔicō nōo yēeyī ā, cɛ um ɛgbá, ɛ́gɛ́nɛ̄ éŋkpɔ́ ī ce ɔ̄cɛ nɛ̄ ijényi le ɔ́ ŋmó táajɛ ɛgbá ā. Eko nyá nɛ̄ n géē nyɔ̄ í gbā uwɔ ɛ̄gbā ipéyī uwɔ ā?

³Agīje húmáyī wɛ ɔdōlé kú um kwu otú kwu ɛnɔ á. Eko dóódu aólɛlā kú um bá gē da um ɔ̄kā ka, “Iní nɛ̄ Ɔwɔicō kú uwɔ yɔ̄ ā”

⁴Ɔtū kú um gē bīya, eko nɛ̄ n le ɛlá gbo kwu eko otɛtɛ ā. Eko nɛ̄ n gē yɛ mla ɛwa nɛ̄hi ga ipú Agblīihɔ-nɛ̄hi kú Ɔwɔicō, nɛ̄ n kpó uwā trɛ̄yí abɔ̄ alɔ bá ī nyɔ̄ ā, ɔtū gē he uwā ā, cɛ́ɛ́ é bá ī gwíijē, bá ī dɛ̄gba, bá ī cɛ̄tra Ɔwɔicō.

⁵N da iyī um ɔ̄kā kahíníī, “Ɔdíyá nɛ̄ ɔtū bīya gā um nɛ̄hi lɛ āa? Ɔdíyá nɛ̄ ɔtū kú um playicō lɛ āa? N géē leyīce Ɔwɔicō, n klla géē cɛ̄tra Ɔwɔicō kú um nōo ī hɛ́ um tá ā kpɔ́ ɛ́ɛ́.

⁶Ipú ajɛ kú éwɔhá amānyā ā, ɔtū le bīya gā um, ohígbū ɔ́ɔmā ā, n le blakwu uwɔ, ŋmá ajɛ kú Ujɔ́dan mɛ́mla Uhɛ́mɔ̄n, mɛ́mla oŋmá ɛyí ɛfu kú Umísa.

⁷Úgbagwú nɛ̄hi kú uwɔ nōo lɔfú yá ɔ̄cɛ odée glá ā, le pɛ́ kwūūū wā í klá um báajɛ, bɛ̄ɛka úgbagwú kú itekwú nōo le cɔ̄nū ā, ámāŋ ka éŋkpɔ̄ ō pɛ́ wāajɛ lɔfú lɔfú ŋmá ɛyí ɛfu ā.

⁸Óndú kóō ma ihɔtū kú nū fú gā um ɔlɛ́ɛnɔ dóódu, cɛ́ɛ́ ká n̄ lɛ ijē nɛ̄ n géē gwó otú, ká n̄ kē gbɔ̄ɔkɔ lɛ Ɔwɔicō nōo cɛ̄ gā um yēeyī ā.

⁹N da Ɔwɔicō nōo gbō um ā kahíníī, “Ɔdíyá nāa je mlanyī um ā? Ɔdíyá nɛ̄ n géē yɔ̄ ī yá ɔtūnōbí piyóó, ohígbū ōwē nɛ̄ aólɛlā kú um nēe bá ī yá um ŋmó ā, gē je gā um ā.”

¹⁰Ɛcá nēé yɔ̄ ī cá um ā lɛ um iyē catīipú, abɔ̄ é bá ī dɔɔ̄kā eko dóódu kahíníī, “Iní nɛ̄ Ɔwɔicō kú uwɔ yɔ̄ ā?”

¹¹Ɔdíyá nɛ̄ ɔtū bīya gā um nɛ̄hi lɛ āā? Ɔdíyá nɛ̄ n lɛ unwalu nɛ̄hi lɛ āā? N géē lɛ ɔtūce Ɔwɔicō, n klla géē cɛ̄tra Ɔwɔicō kú um, nōo ī hɛ́ um tá ā kpɔ́ ɛ́ɛ́.