Read idoma AÍJĒ KÚ Ɛ̄GBĀ 44 Bible Online

AÍJĒ KÚ Ɛ̄GBĀ 44 - idoma bible

AÍJĒ KÚ Ɛ̄GBĀ 44

¹Ɔwɔicō, alɔ bī ahɔ̄ kú alɔ le pó ɛ́ɛ́, aádáádā alɔ kɛlā lɛ alɔ lɛyíkwu ɔ́ dúú. Ɔdā nɛ̄hi nāa yá ipú ígbíli eko kú uwá íkííkē ā.

²A bī ɔfú kú uwɔ lɛ aéwɔhá nū bɛ̄cɛ ŋmá ipú ajɛ ā. A klla lɛ ācɛ ɔlɛ́ uwɔ bu tū ipú ajɛ ā. A le italā yá aéwɔhá, anɔ́ɔ ācɛ ɔlɛ́ uwɔ kwú gbagbénú ā.

³Ó wɛ ɔkpacaŋ́gelī kú uwá nēé bī le mīyɛ ajɛ á ŋ́, ɛ́ɛ́ nēé bī ɔfú kú abɔ̄ uwā le yálé ŋ́. Amáŋ o ŋmá lɛ ɔfú kú uwɔ nɛ̄, ohígbū ka é jé lɔɔlɔhi ka a yɔ̄ mla uwá, ohígbū ka é he uwɔ ɔtū.

⁴Awɔ wɛ ɔcɛ́ mɛ́mla Ɔwɔicō kú um á. Awɔ yá ɛ́ɛ́ nɛ̄ ācɛ ɔlɛ́ uwɔ yálé á.

⁵Awɔ le ɔfú tū alɔ iyē nɛ̄ alɔ yá aólɛlā kú alɔ lé á.

⁶Ń lɔtūce ɔtā mɛ́mla ɔkpacaŋ́gelī kú um kéē nya um tá glá ŋ́.

⁷Amáŋ, a lɛ alɔ nyatá ŋmá abɔ̄ kú aólɛlā kú alɔ. A klla le ācɛ nēe gē wɔ́tū alɔ ā kpó yálé ɛɛ́.

⁸Alɔ géē bá ī cɛ̄tra uwɔ eko dóódu, klla í bá ī tá uwɔ ahínyá piyóó.

⁹Amáŋ abālɔbányā, a tá alɔ, a klla cɛ̄ lɛ uwá le alɔ yálé ɛɛ́. Á klla kē ga ɛfú mla aícɔ́ɔja kú alɔ gɛ ŋ́.

¹⁰A cɛ̄ lɛ alɔ le inya kwu ŋmá ɛgiyí aólɛlā kú alɔ. É le iyɔ́fú mɛ́mla ɔdā nēe wɛ ákú alɔ ā kpó.

¹¹A cɛ̄ le uwá le alɔ kpó hɛ́ ɔkɔ bɛ̄ɛka álá ā. A lɛ alɔ pahīla tū ipú ajɛ kú aéwɔhá.

¹²A kwú ācɛ kú uwɔ ú kpó lá alahá mla ije olígíí, bɛ̄ɛka ɔdā nēé gbo ɔdā dúúmā gɛ ŋ́ mā.

¹³Aóladógbe kú alɔ kē má ɔdā nāa yá alɔ nyā, anɔ́ɔ é yɛhɛ tū alɔ, klla yá alɔ ɛbɛ́ á.

¹⁴A kwú alɔ ú pīya ɔdā ɛhɛ, ipú aéwɔhá ɛɛ́. É gē leyī gwū alɔ bónū klla ī cōkónu tá alɔ gbɛdɛɛ.

¹⁵É gē juwēyī gā um eko dóódu. Uwēyī kē le um kwú dúúdú ɛɛ́,

¹⁶ŋmá ɛ́gɛ́nɛ̄ aólɛlā kú um bá ī leyī gwū um bónū lɛ ā mɛ́mla ɛcá nɛ̄ ācɛ nēe wɔ́tū um ā gē cá um ā.

¹⁷Odúúdú ɔdā nēe bá nyā bá ī yá alɔ, nááná alɔ í kē gwɛ̄lá awɔ ŋ́, ɛ́ɛ́ nɛ̄ alɔ kōō ī nyílá okónu nāa ce mla alɔ ā ŋ́ mā.

¹⁸Alɔ í cīgbīhi kwu uwɔ ŋ́, ɛ́ɛ́ nɛ̄ alɔ gē bīya íne kú uwɔ ŋ́.

¹⁹Nááná, ā maabɔ̄ alɔ tá ipú aɛ́bɛ́ obɔ̄bī nyā, nɛ̄ alɔ í lɛ ɔ̄cɛ o tá alɔ abɔ̄ ŋ́. A klla habɔ̄ alɔ tá ipú obū juu.

²⁰Ɔ́dāŋ ka alɔ mā ɛ̄gbā ō gbā Ɔwɔicō kú alɔ tá, nɛ̄ alɔ bá ī gbā ɔwɔ kú aéwo ɔhá ɛ̄gbā nɛɛ,

²¹a kē í yɛ í le jé piíí, ohígbū ka a jé ɔdā otayínū dóódu kú ɔtū kú ɔ̄cɛ.

²²Amáŋ, ohígbū uwɔ nēé bá ī ŋmó alɔ eko dóódu á. Nēé bá ī yá alɔ bɛ̄ɛka álá nēé gáā bī nyɔ̄ í ŋmó ā.

²³Óndú, le héyī, ɔdíyá nāa yɔ̄ ī gbɔlā ā? Cāŋjɛ, ā tá alɔ tónū piyóó ŋ́.

²⁴Ɔdíyá nāa gē je iyī uwɔ tayínū ŋmá ɛgiyí alɔ āa? Ā híī je mlanyī ōwē mɛ́mla unwalu kú alɔ ŋ́.

²⁵É le alɔ yá ocɛ̄bícɛ̄bi, alɔ gwutá ajɛ lɛ eyī pīya klá úmúlá ɛɛ́, alɔ í kē cāŋjɛ ŋmá ajɛ glá ŋ́.

²⁶Wā í tá alɔ abɔ̄. Ohígbū ka a gē yíihɔtū tá alɔ eko dóódu.