Read idoma AÍJĒ KÚ Ɛ̄GBĀ 45 Bible Online

AÍJĒ KÚ Ɛ̄GBĀ 45 - idoma bible

AÍJĒ KÚ Ɛ̄GBĀ 45

¹Ɔtū kú um le mu mla ijē olɔhi, abɔ̄ n gáā gwíije nyā lɛ ɔcɛ́ ā. Ígblɛ́nyī kú um lɛbɛ̄ɛka ɛkɔ o bī tɔ́kpá kú ɛ́nɛ́nɛ̄ ɔmálɛ ā.

²Awɔ jē oklóbīya fíyɛ́ odúúdú ayí kú alɛɛcɛ á. A jé ō kɛlā lɔhi nɛ̄hi, ohígbū ɔ́ɔmā yá nɛ̄ Ɔwɔicō hɔ́ɔhā ce uwɔ piyóó á.

³Lɛ iyɔ́fú kú uwɔ kpó tū iyē, ɔcɛ́ olɔfú nɛ̄hi, a tū ɛgahi nɛ̄hi, a klla lɛ ojīlīmā nɛ̄hi.

⁴Ipú ɛgahi kú uwɔ, a ce ɔnya nyɔ̄ í kpɛ́fú cɛ́ɛ́ kú eyīnyinyi mɛ́mla ɛpɔ̄ okpaakpa kóō le yálé. Ɔfú nɛ̄hi nɛ̄ a lɛ ā gē cɛ̄ gā awɔ yálé.

⁵Aɔ́yī kú uwɔ lúlé, é ī bū odo kú aólɛlā kú uwɔ. Aéwo ā bá ī gwōnū iyɔ̄bū uwɔ.

⁶Ajɔ̄ɔ̄cɛ́ nɛ̄ Ɔwɔicō je gā uwɔ ā géē yɔ̄ piyóó. A gē gbō ācɛ kú uwɔ mla okpaakpa.

⁷Ɔdā olɔhi he uwɔ ɔtū. Ɔdā obɔ̄bí í kē he uwɔ ɔtū ŋ́, ɔ́ɔmā yá ɛɛ́ nɛ̄ Óndú, Ɔwɔicō kú uwɔ ā fu uwɔ á. Ó le yá ká ā gwéeyē nɛ̄hi, fíyɛ́ odúúdú aɔ́mpa awɔ á.

⁸Ɔtulalī yɔ̄ ī kpóocu īlī kú uwɔ kwūū. Ācɛ ogwíijē, gē gwíijē gā awɔ, ipú agblɔ̄cɛ́ nāa yíifa mla ayīnu adāgbá ā.

⁹Ayínɔ̄nyā kú ɔlɛ́ aɔ́cɛ́ wɛ ipú ayínɔ̄nyā kú agbla kú uwɔ ā, ɔcányā ā kē māháyi abɔ̄lɔ́ná kú akpa ɔcɛ́ kú uwɔ bī ɛ́nɛ́nɛ̄ ugóolu (oje ɔdɔ) le ifa yá.

¹⁰Ɔnyā ɔlɛ́ ɔcɛ́, jáhɔ̄ lɛ ɛlā nɛ̄ n gē ka ā, kwú mlanyī ācɛ ɔlɛ́ uwɔ mɛ́mla aɔ́máapú uwɔ dóódu.

¹¹Ɔhi mɛ́mla ɔ̄ncɛ́nyā nāa jɛ̄ ā gē yá kú ɔcɛ́ ā kóō yúúnwū uwɔ. Ɔcɛ́ ā wɛ ɔkpani uwɔ á, ó lɛ a, a géē lɛyítáajɛ lɛ ɔ́ piíí.

¹²Ācɛ kú Utáya géē bī ɔdā kú ɛ̄gbā gé lɛ uwɔ. Ācɛ olɔdu kē í bī agbénú kú uwā, géē bá ī tíne kéē má eyī olɔhi kú uwɔ.

¹³Ɔyínɔ̄nyā nɛ̄ ɔcɛ́ gáā lɛ ā gā agblɔ̄cɛ́ ɛɛ́. Má ɛ́gɛ́nɛ̄ ó jɔncɛ́nyā háyi mámlama klla héyīfuú ō má lɛ ā ɛ́! Owú kū ugóolu (oje ɔdɔ) nēé bī le tá īlī kú nū á.

¹⁴Ó le īlī kú nū nōo tína ɛyɛ́ɛyɛ́yí ā wiyē, ɛ́ɛ́ nēé bī ɔ̄ tá gē lɛ ɔcɛ́ á. Áncɛ́nyā nū nēe ī tá ɔ̄ ɔkwu ā, yɛce ɔ́ wā ɛgiyí ɔcɛ́ dúú.

¹⁵É wā mla éeyē, ɔtū nɛ̄hɛ́, gáā ga agblɔ̄cɛ́ ā.

¹⁶Ɔcɛ́ kú um, a géē ma ayí nɔ̄nyīlɔ alɛwa, kéē lé ɔcɛ́ kwɛyí uwɔ ɛ́gɛ́nɛ̄ aádáádā uwɔ lé ā. É kē í gbō odúúdú ɛcɛ.

¹⁷Ijē kú um ā kē í cɛ̄ lɛ odúúdú ācɛ gbɛlá kwu ɔdā nɛ̄hi nāa yá ā piyóó. Odúúdú ācɛ kē ī bá ī cɛ̄tra uwɔ ŋmá abālɔbányā jāā gbéeko dóódu.