Read idoma AÍJĒ KÚ Ɛ̄GBĀ 46 Bible Online

AÍJĒ KÚ Ɛ̄GBĀ 46 - idoma bible

AÍJĒ KÚ Ɛ̄GBĀ 46

¹Ɔwɔicō gē gbō alɔ klla gē je ɔfú lɛ alɔ á. Ó le tútū kóō tá alɔ abɔ̄ eko kú unwalu.

²Ɔtū í gáā hɛ́ alɔ ko ŋ́, ɔ́dāŋ ka ajɛ yɔ̄ ī jīliyē, nɛ̄ ɛfu le wúla tū ipu itekwū.

³Ámáŋ nɛ̄ itekwū kwú cēnyi klɛ́ɛcɛ yɔ̄ ī túgbagwú mɛ́mla uya nɛ̄hi wulúwulú, nɛ̄ ɛfu kē yɔ̄ ī jíliyē lɔfú lɔfú.

⁴Ísu éyi yɔ̄ nōo ī pɛ́ klla ī bī éeyē wā igelī nɛ̄hi, kú Ɔwɔicō nōo tīihɔ ā.

⁵Ɔwɔicō yɔ̄ igelī nɛ̄hi ā, é kē gáā ca ɔ́ tāajɛ gbóógbóō glá ŋ́. Ofúlɔ̄cī blibli ā, ó géē wā ipú ɔlɛ́ ɔ́ɔmā, í tá ɔ̄ abɔ̄.

⁶Ɔwɔicō kɛlā bɛ̄ɛka akpáabana ō gbo ā, aéwɔhá gbɔɔ́ ō hútú ipú ufi. Aájɔ̄ɔ̄cɛ́ ā bá ī jíliyē, anɔ́ɔ ɔtū kú ācɛ kú ipú ɛcɛ nyā kwú gbenyi á.

⁷Ɔwɔicō nōo fíyɛ́ dúú ā yɔ̄ mla alɔ. Ɔwɔicō kú Ujékɔ̄pu gē gbō alɔ á.

⁸Wā ká ā gaá má ɔdā nɛ̄ Ɔwɔicō yá ā, ká ā má ɔdā ō yéeyījii nɛ̄ ó yá ipú ɛcɛ ā.

⁹Ó le ɛfú nɛ̄ ācɛ gē kpó tá aɔ́mpa uwā ā ci ipú odúúdú ɛcɛ ā. Ó le ɔtā kpó cē bónū klla le aóbō kpó yíífi bónū. Ó klla le aɔ́kplɛ́fú kpó tū ɔlá bónū.

¹⁰“Aá habɔ̄ ɛfú ō kpó mla iyī aá tá, ká aá cɛ̄ ka ami ɔ́ɔ wɛ Ɔwɔicō á. Odúúdú aéwɔ ā gē cɛ̄tra um, ɛjɛ̄ɛ̄jī ācɛ kú ɛcɛ ā gē ka ka ami ɔ́ɔ fíyɛ́ dúú á.”

¹¹Óndú ā nōo lɔfú fíyɛ́ dúú ā yɔ̄ mla alɔ. Ɔwɔicō kú Ujékɔ̄pu gē gbō alɔ á.