Read idoma AÍJĒ KÚ Ɛ̄GBĀ 48 Bible Online

AÍJĒ KÚ Ɛ̄GBĀ 48 - idoma bible

AÍJĒ KÚ Ɛ̄GBĀ 48

¹Óndú ā nwuné klla lɔfú nɛ̄hi. Ācɛ cíkā ō cɛ̄tra anú nwuné, ipú igelī nɛ̄hi kú Ɔwɔicō kú alɔ mɛ́mla ɛyí ɛfu ōtīihɔ kú nū.

²Usáyɔn, ɛyí ɛfú kú Ɔwɔicō ā, licō lɔhi nɛ̄hi. Igelī nɛ̄hi, ɔlɛ́ kú ɔcɛ́ nɛ̄hi ɔ́ɔmā gē bī éeyē gē lɛ odúúdú ɛcɛ.

³Ɔwɔicō le mafú lɛ ācɛ ké í lā ɛbɔ́ mla anúɔ ipú igelī nɛ̄hi nē é cē igá olɔfú nɛ̄hi tū ɔ̄ ā.

⁴Aɔ́cɛ́ kú aéwɔhá ā, le aícɔ́ɔja kú uwā túbá tɔ̄há wā gáā le ɛfú kpó tá Usáyɔn.

⁵Amáŋ eko nēé gā, gaá lɛ Usáyɔn má ā, é kwú hɛ́ idáagó, ufi le uwá kwú, anɔ́ɔ é kwú pɛ́ kwu á.

⁶Ufi mɛ́mla ɔnɔ lɛ uwá kwú bɛ̄ɛka ɔnyā nōo yɔ̄ ī yá ɔmā gáā ma ɔyí ā.

⁷Bɛ̄ɛka owu nɛ̄hi nōo gē tá úgbéenyi nɛ̄hi úgbagwú eyī itekwū ā.

⁸Alɔ tɛtɛ pó ɔdā nɛ̄ Ɔwɔicō yá ā, amáŋ abālɔbányā alɔ lɛ ɔ́ má ipú igelī kú Ɔwɔicō kú alɔ. Óndú ā nōo lɔfú fíyɛ́ dúú ā, géē lɛ igelī nɛ̄hi ā tū ɛbɔ́ piyóó.

⁹Óndú, alɔ gē blakwu ihɔtū nāa ī yá tá alɔ ipú Agblīihɔ-nɛ̄hi kú uwɔ ā eko dóódu.

¹⁰Odúúdú ācɛ nēe bá ɛga dóódu gē cɛ̄tra awɔ Óndú, ohígbū kēé pó ofu ɔfú kú uwɔ ɛga dóódu kú ɛcɛ. A gē bī ɛpɔ̄ okpaakpa nāa gē ka a le gbō ācɛ ā.

¹¹Ɔtū kóō he ācɛ kú Usáyɔn ā. Ohígbū ka a gē hɛ́pɔ̄ okpaakpa. Ācɛ kú aígelī nɛ̄hi kú Ujúda kéē gwéeyē.

¹²Ācɛ kú Ɔwɔicō, aá yɛ Usáyɔn biílí, cɛ́ɛ́ kú aá gbā inɔ̄ɔda-ɔkplɛ́fú kú nū áluka.

¹³Aá má ɔdɔ kú nū, ká aá lɛ eyī bī ɛga olɔfū kú nū, cɛ́ɛ́ kú aá géē ka lɛ ayí kú ipɔ́ɔma kú alɔ ɔhá kahíníī,

¹⁴“Ɛ̄nyā wɛ Ɔwɔicō kú alɔ piyóó ipú ɛcɛ nyā á.”