Read idoma AÍJĒ KÚ Ɛ̄GBĀ 49 Bible Online

AÍJĒ KÚ Ɛ̄GBĀ 49 - idoma bible

AÍJĒ KÚ Ɛ̄GBĀ 49

¹Odúúdú ācɛ aá pó ɛ̄nyā. Aá jáhɔ̄, odúúdú ācɛ nēe lā ipú ɛcɛ ā,

²kwú ācɛ nɛ̄hi, kwu ācɛ nɛ̄ŋcɛ́, kwu aógbɛhá kwu aólagbénú.

³N gē kɛlā kú íjééyī, ɛlá nɛ̄ n gē gbo ā kē cēyīgēdēē.

⁴N géē je ɔtū tá ita ō kwu, N kē yɔ̄ ī ka ɛyí ita ā, abɔ̄ n géē yɔ̄ ī gwō ɛ̄ngwū ā.

⁵Eko kú unwalu nɛ̄ aólɛlā kú um le yɛ um jīla tá nááná, n gáā yúufi ŋ́.

⁶Aólɛlā nēe bá ɔ́ɔmā lɛ ɔtūce agbénú kú uwā. É klla gē gwō ohígbū agbénú nɛ̄hi nēé lɛ ā.

⁷Ɔ̄kwɔ̄ɔ̄kwɛyi, ɔ̄cɛ dúúmā í nya īyī nū tá glá ŋ́, ɛ́ɛ́ nɛ̄ ɔ̄cɛ dúúmā lɔfú cíla Ɔwɔicō ulé kú oyēeyī kú nū glá ŋ́ má.

⁸Ohígbū ka ɔ́lá kú oyēeyī kú ɔlɛɛcɛ nwuné fíyábɔ̄ nɛ̄ ɔ̄cɛ dúúmā í cílá Ɔwɔicō ije nwuné nōo gaajɛ ɔ́lá kú oyēeyī kú iyī nū,

⁹cɛ́ɛ́ kóō híī kwú ŋ́ nɛɛ ŋ́. Ámāŋ ko cɛ̄ lɛ ɔ́ yéeyī piyóó glá ŋ́.

¹⁰Ɔ̄cɛ dóódu, lɔfú má ka ɔ̄cɛ ojéeyī nááná gē kwú, ɛ́gɛ́nɛ̄ ācɛ ɔdāhá mɛ́mla aólíla ā gē kwú dúú ā. É klla í habɔ̄ agbénú kú uwā tá igbīhi lɛ ācɛ ɔhá.

¹¹Únóji kú uwā wɛ ɔlɛ́ uwā piyóó mɛ́ɛ̄ á. Abɔ́ɔ nēé gáā lā piyóó ŋmá eko kú ɛ́gɔ́ éyi ga ɔhá á. Nááná nēé tɛtɛ lɛ ajɛ kú abɔ̄yī uwā ā.

¹²Ɛ́gɛ́ dúú nɛ̄ ɔ̄cɛ gbagbénú lɛ, ó gáā nya ɔ́ ŋmá ikwū glá ŋ́. Amáŋ ó géē kwú bɛ̄ɛka aɛ́bɛ́ ā dúú.

¹³Má ɔdā nōo gē yá ācɛ nēe lɛ ɔtūce īyī uwā ā, mɛ́mla oŋmɛ́yí kú ācɛ nēe ka ka agbénú kú aá, ɔ́ɔ jɛ̄ aá ɛɛ́ mā.

¹⁴É géē kwú piíí bɛ̄ɛka álá ā, ikwū kē í gbō uwā nyɔ̄ únóji bɛ̄ɛka ɛ́gɛ́nɛ̄ ɔ̄cogāálá ī gbō álá ā. Únóji nēé géē nyɔ̄ bōōbū á. É géē je wā tāajɛ ipú únóji nōo je pīya ɔlɛ́ uwā mɛ́ɛ̄ ā.

¹⁵Amáŋ, Ɔwɔicō géē nya odo kú um tá ŋmá abɔ̄ ikwū. Ohígbū ka Ɔwɔicō géē mīyɛ um.

¹⁶A híī cɛ̄ lɛ ɔtū kú uwɔ plicō ɔ́dāŋ ka ɔ̄cɛ kwú gbaagbénú ŋ́, eko nɛ̄ agbénú kú ɔlɛ́ nū le nwuné tōōtɔ̄ɔ̄ ŋ́.

¹⁷Ohígbū ka eko nɛ̄ ó gekwú, ó gáā kpó ɔdā dúúmā nyɔ̄ mla iyí nū ŋ́. Agbénú kú nū ā í gáā ga únóji mla anú ŋ́.

¹⁸Ɔ́daŋ nɛ̄ eko nɛ̄ ó yēeyī ā, nɛ̄ ɔdā nɛ̄ ó lɛ ā, nū ɔ̄ ipú nɛ̄hi nááná, ācɛ kē í cɛ̄tra anú ka ó kwú lɔhi lɛ ɔ́ ɛɛ́,

¹⁹nááná, ó géē nyɔ̄ í tá aádáádā nū ɔlékwū, ɛga nɛ̄ obū yɔ̄ piyóó ā.

²⁰Ojājīlīmā mɛ́mla ɛgahi kú ɔlɛɛcɛ í ci ikwū kú nū glá ŋ́, ó géē kwú piíí ɛ̄cī éyi bɛ̄ɛka aɛ́bɛ́ ā dúú.