Read idoma AÍJĒ KÚ Ɛ̄GBĀ 50 Bible Online

AÍJĒ KÚ Ɛ̄GBĀ 50 - idoma bible

AÍJĒ KÚ Ɛ̄GBĀ 50

¹Ɔwɔicō nōo lɔfú fíyɛ́ dúú ā, Óndú ā kɛlā, gē hī odúúdú ācɛ nēe bá ipú ɛcɛ ā igwú ŋmá ɛga dóódu wā ɛgiyí nū.

²Ɛgahi mɛ́mla ojīlīmā kú Óndú, Ɔwɔicō gē fíyajɛ ŋmɛ́ɛ̄mm ŋmá Usáyɔn igelī nɛ̄hi olɔhi kú nū ā bɛ̄ɛka ɛnɔ ā.

³Ɔwɔicō kú alɔ yɔ̄ ī wā, ó kē lɛ okónu klá ŋ́. Ɔlá yɔ̄ ī yi iyɔ̄bū nū, ofúlutu nɛ̄hi le yɛ ɔ́ jīla tá.

⁴Ó gē hī ɛcɛ mɛ́mla ɔkpáncō igwú kéē wā í pó ɛpɔ̄ nɛ̄ ó gáā ka tū ācɛ ɔlɛ́ nū ā.

⁵Ó kahíníī, “Lɛ ācɛ okpaakpa kú ɔlɛ́ um ā túbá tɔ̄há gā um, ācɛ nēe cokónu mla um ipú ɛya nēé gwó ā.”

⁶Ɔkpáncō gē ka tɛ́ɛcɛ ka Ɔwɔicō le kpaakpa. Ka anú abɔ̄yī nū ā kē wɛ ohɛ́pɔ̄ á.

⁷“Aá jāhɔ̄ gā um, ācɛ ɔlɛ́ um, cɛ́ɛ́ ká n̄ lɛ ɛlā ka. N géē cɛ̄ ijáalí tū aá, Ísrɛ̄lu. Ami Ɔwɔicō, nōo wɛ Ɔwɔicō kú aá á.

⁸Ń pi aá ahɔ̄ ohígbū ɛya ɔlamu mɛ́mla ɛya o yɔlá dúúdú nɛ̄ aá gē gwó gā um ā ŋ́.

⁹Ń cɛgbá aɛ́na ŋmá ipú ɛhɔ̄ kú aá ŋ́, ɛ́ɛ́ nɛ̄ n gē cɛgbá opī ŋmá ipú aɛ́wū kú aá ŋ́.

¹⁰Odúúdú aɛ́bɛ́ nēe bá ipú ūpū ā wɛ ákú um. Aɛ́na ulúúlā nēe bá ɛyí ɛfu ā kē wɛ ákú um dúú.

¹¹Odúúdú aígbáanɔ nēe gē wu ɔkpáncō ā mɛ́mla aɔ́dā oyéeyī dóódu nēe lā ipácí ā kē wɛ ákú um.

¹²“Ɔ́dāŋ ka ɛmiyɛ gē ŋmó um nɛɛ, ń gáā ka lɛ aá ŋ́, ohígbū ka odúúdú ɛcɛ mɛ́mla ɔdā dóódu nēe bá ipú nū ā wɛ ákú um.

¹³Ń gē lé ɛbɛ́ ɛna ŋ́, ɛ́ɛ́ nɛ̄ n kōō ī gwá oyī kú ɛwū ŋ́.

¹⁴Ahínyá nɛ̄ aá í tá ā kóō wɛ ɛya nɛ̄ aá gē gwó lɛ Ɔwɔicō, cɛ́ɛ́ kú aá lɛ odúúdú ɔdā nɛ̄ aá cokónu nū lɛ Ɔwɔicō ā je lɛ ɔ́.

¹⁵Hī um igwú eko kú unwalu, n gē nya uwɔ tá, cɛ́ɛ́ ka á cɛ̄tra um.”

¹⁶Amáŋ, Ɔwɔicō da ācobɔ́bíipú kahíníī, “Ɔdíyá nɛ̄ aá gē bá ī jé íne kú um tū ɛyí ā? Ɔdíyá nɛ̄ aá gē bá gē kɛlā lɛyíkwu okónu nɛ̄ n ce ā?

¹⁷Aá cɛ̄ gā um nā aá tɔ́ɔwɛ ŋ́ má. Aá klla kē ka aá bī íne mɛ́mla ɔ́da kú um le yúklɔ́ ŋ́.

¹⁸Aá kwú pīya aóklóbīya mɛ́mla áncɛ́nyā kú aúwī dóódu nɛ̄ aá má ā. Aá klla gē yɛ mla ācɛ nēe ī cikpó anyā nōó wɛ anyā uwā ŋ́.

¹⁹Aá le tútū ō kɛlā obɔ̄bí eko dóódu. Aá gē kpó eko bónū kú aá kɛ̄mgbɛ̄ ŋ́.

²⁰Aá le tútū kú aá cīije bá ɔyínɛ̄ aá eko dóódu. Aá ba ī tíne kú aá yá unwalu tá ɔ̄ eko dóódu.

²¹Abɔ̄ aá gē yá odúúdú ɔdā nēe bá nyā, nɛ̄ ń kē ka ɔdā dúúmā ŋ́ mā, aá gbɛlá ka ami ɔ́ɔ lɛbɛ̄ɛka aá ā nɛɛ. Amáŋ abālɔbányā, n géē gbɔɔ́ ō pi aá ahɔ̄, géē je odúúdú ɛlā yá téeyī péee lɛ aá.

²²Aá jāhɔ̄ lɛ ɛlá ɛ̄nyā, aá nōo gē lɛ eyī gwō um bónū ā, ohígbū nɛ̄ n géē kpó aá yíífi. Nɛ̄ ɔ̄cɛ dúúmā í yɔ̄ nōo géē nya aá tá glá ŋ́.

²³Ahínyá nɛ̄ aá gē tá ā wɛ ɛya, nōo gē je ojīlīmā ga um ā. Odúúdú ācɛ nēe lɛyítáajɛ gā um ā, n géē nya uwá tá piíí.”