Read idoma AÍJĒ KÚ Ɛ̄GBĀ 51 Bible Online

AÍJĒ KÚ Ɛ̄GBĀ 51 - idoma bible

AÍJĒ KÚ Ɛ̄GBĀ 51

¹Ményīnyi um, Ɔwɔicō, ohígbū ihɔtū nāa ī mafú eko dóódu ā, mɛ́mla ɛ́gɛ́nɛ̄ a gē ményinyi ācɛ íbí ā. Kwú óbíipú nɛ̄hi nɛ̄ n bī nyā ú yá um ɛhi.

²Lɛ odúúdú ucē obɔ̄bí nɛ̄ n yá ā kpó na ŋmá um iyē, cɛ́ɛ́ ká ā lɛ um iyē gwu yēŋēē ŋmá ipú odúúdú íne nɛ̄ n bīya ā.

³Ohígbū ka n jé ucē obɔ̄bí kú um. Ɛlá kú um kwu íne nɛ̄ n bīya ā eko dóódu.

⁴N le íne kú uwɔ bīya, awɔ ōfōōfū uwɔ nɛ̄ n bīya íne kú uwɔ klla yá ɔdā nɛ̄ a je kóō wɛ ɔdōbɔ̄bí ā. Ɛpɔ̄ dúú nāa ka tū um, a lé ɛpɔ̄hi. Ohígbū ɔ́ɔmā, awɔ lɛ́pɔ̄hi kú ɛpɔ̄ nāa ka tū um á. Á kē yá ɔdōbɔ̄bí kú ɛpɔ̄bí nāa ŋmó um ā ŋ́.

⁵Ucē kú um húmáyī bɔ̄bí ŋmífī nɛ̄ ɛ́nɛ́ um ma um ā. Eko nɛ̄ ɛ́nɛ́ um kōō yīipú kú um ā, ucē kú um í lɔhi ŋ́.

⁶Ɛlā ɔkwɔ̄ɔ̄kwɛ̄yi mɛ́mla ɔtū oyēŋēē kú ipú odo kú ɔ̄cɛ nāa tíne á, ohígbū ɔ́ɔmā, lɛ íjééyī kú uwɔ nwū um kú n̄ lɛ ɔ́ kpó tū ipú ɔtū kú um.

⁷Kwú íne nɛ̄ n bīyá ā í yá um ɛhi, cɛ́ɛ́ ká n̄ kwú yá yēŋēē. Lɛ um na péee ɛ́gɛ́nɛ̄ ɔ̄cɛ gē na īlī nɛ̄hɛ́ péee ā, cɛ́ɛ́ ká n̄ kwú tɛ́hɛ́ fíyɛ́ áfū.

⁸Le yá cɛ́ɛ́ ká n̄ gwéeyē, kú ɔtū kóō he um. Ká iyē kú um nāa catīīpú ā kóō gbo um nɛɛ. Cɛ́ɛ́ kú ɔtū kú um kóō kwú pīya ɛnɛ̄hɛ́.

⁹Kwú íne nɛ̄ n bīya ā ú yá um ɛhi. Cɛ́ɛ́ ká ā lɛ ucē obɔ̄bí kú um ā ú kpó ŋmá um iyē.

¹⁰Kwú ɔtū oyēŋēē ú tá um ipú ɔtū kú um, Ɔwɔicō. Ká ā kwú odo ɛ̄yīpɛ̄ nōo le kpaakpa ā ú gā um.

¹¹A nū um ŋmá ɛgiyí uwɔ ŋ́. A kē je alelékwū ihɔ kú uwɔ ŋmá ɛgiyí um ŋ́.

¹²Kwú éeyē kú o nyatā nāa nya um tá ā ú cīgbīhi gā um, cɛ́ɛ́ ká ā yá um ká n lɛyítáajɛ gā uwɔ.

¹³Cɛ́ɛ́, n géē nwū ācɛ nēe gē bīya íne kú uwɔ ā ɛlā, cɛ́ɛ́ kéē klla kwúcē wā ɛgiyí uwɔ.

¹⁴Ɔwɔicō, awɔ wɛ ohɔ́nyɛtá kú um á. Lɛ n hɛ́tá ŋmá ɔ́bíipú kú ɔ̄cɛ ō ŋmó, cɛ́ɛ́ ká n̄ gwíijē ŋmá ɔtū nɛ̄hɛ́ yɔ̄ ī da ācɛ ka a lɔhi.

¹⁵Óndú, yá ká n̄ kɛlā, ká n̄ klla cɛ̄tra awɔ.

¹⁶Ɔ́dāŋ ka n lɛ ɛya gwō gā uwɔ nááná, ɔ́ɔmā í kē wɛ ɔdā nōo ce uwɔ ɛgbá ā ŋ́. Ɛya ō yɔlá dúúdú í kē wɛ ɔdā nōo he uwɔ ɔtū ŋ́.

¹⁷Ɛya nɛ̄ n géē gwó nōo í he Ɔwɔicō ɔtū ā wɛ o tú iyī um wāajɛ. Á kē gáā tá ɔ̄cɛ nōo le iyī nū tú wāajɛ klla le pīyabɔ̄ ŋ́.

¹⁸Ɔwɔicō, ményinyi kú Usáyɔn kú ā tá ɔ̄ abɔ̄. Lɛ ɔdɔ kú Ujerúsālɛm túgwó igbɔhá.

¹⁹Cɛ́ɛ́ ɛya okpaakpa kú alɔ mɛ́mla ɛya o yɔlá dóódu kú alɔ ā kē í he uwɔ ɔtū. Cɛ́ɛ́ kéē klla kpó aɔ́bá ɛna gwɛ́ɛya ga awɔ ɛyí ede kú uwɔ.