Read idoma AÍJĒ KÚ Ɛ̄GBĀ 52 Bible Online

AÍJĒ KÚ Ɛ̄GBĀ 52 - idoma bible

AÍJĒ KÚ Ɛ̄GBĀ 52

¹Ɔ̄cɛ oyɔ́dābɔ̄fú, ɔdíyá nāa gē bī ɔdōbɔ̄bí nāa yá ācɛ olɔhi ā gwó āa?

²Aá gē tū ujɔ̄ kú aá lɛ ācɛ ɔhá kpó yíífi. Ígblɛ́nyī kú uwɔ lúlé bɛ̄ɛka igwu nēé gē bī lɛ wɛ́yi ā. A yɔ̄ ī gbɛlá ɛ̄kɛ̄mgbɛ̄ nāa géē ka eko dóódu.

³Ɔdɔ̄bɔ̄bí he uwɔ ɔtū fíyɛ́ ɔdā olɔhi á. Ɛ̄kɛ̄mgbɛ̄ klla he uwɔ ɔtū fíyɛ́ ɛlā ɔkwɛ̄yi ō ka á.

⁴Ɛlā nōo gē ŋmó ɔ̄cɛ tāajɛ ā he uwɔ ɔtū ō ka piyóó á. A wɛ ɔ̄cɛ o kɛ̄mgbɛ̄ mɛ́mla ō plla ɔ̄cɛ.

⁵Amáŋ, Ɔwɔicō géē je uwɔ yíífi ŋmá ajɛ piyóó. Ó géē kwú uwɔ klla í je uwɔ nū ŋmá ɔlɛ́ uwɔ. Ó géē fu uwɔ ikpó ŋmá ajɛ kú ācɛ o yēeyī ga ɔlékwū.

⁶Ācɛ o yá ɔdā okpaakpa ā, kē í má ɛ̄nyā, ufi kē í kwú uwā. É klla í yɛhɛ tū uwɔ í kahíníī,

⁷“Aá má ɔ̄cɛ nōo kwú ɔtū kú nū ú kpóce agbénú nɛ̄hi kú nū, ka Ɔwɔicō kóō híī gbō anúɔ ŋ́ māa. Ó gē kpɔ́tūce ɔbíipú kú nū kóō gbó ɔ̄ ɛyí á.”

⁸Amáŋ ami ā lɛbɛ̄ɛka ɔcí nēé hī ka ólīfu ɛ̄mɛ̄ɛ̄mɛ̄ ā ipú inu kú Ɔwɔicō. N lɛ ɔtūce ihɔtū nɛ̄ Ɔwɔicō lɛ gā um eko dóódu ā.

⁹Ɔwɔicō, n gēe tá uwɔ ahínyá piyóó ipú ɛcɛ nyā, ohígbū ka a lɛ ɔ́ yá ɛɛ́. N géē yɔ̄ ī bī iyē kú uwɔ tɔ́ɔna ipú ójila kú ācɛ kú uwɔ ohígbū ka a lɔhi.