Read idoma AÍJĒ KÚ Ɛ̄GBĀ 54 Bible Online

AÍJĒ KÚ Ɛ̄GBĀ 54 - idoma bible

AÍJĒ KÚ Ɛ̄GBĀ 54

¹Óndú, lɛ um nyatá mla ɔfú kú uwɔ. Lɛ um hɛ́tá mla ɔfú nɛ̄hi kú uwɔ Ɔwɔicō.

²Pó ɔkɔ nɛ̄ n gē gbā gā uwɔ ā, Ɔwɔicō, cɛ́ɛ́ ká ā lɛ ahɔ̄ jē lɛ ɛlā kú um.

³Ācɛ o yá ɔbɔ́ɔ̄cɛ ā gē wā ī nuunu tá um ɛɛ́. Ācobɔ̄bíipú ā gē tíne kéē je um ŋmó ɛɛ́. Ācɛ nēé jé ka Ɔwɔicō ɔ́ɔ wɛ odée ŋ́ mā.

⁴Amáŋ n jé ka, Ɔwɔicō gē tú um abɔ̄ á. Ɔwɔicō gē gbō oyēeyī kú um á.

⁵Ɔwɔicō géē bī obɔ̄bí piíí kú aólɛlā nēe gē gbō um gɛɛ ā, le cílá uwá ulé. Óndú lɛ uwá kpó yíífi ohígbū ka a tōō lɛ ɔtūce.

⁶N géē wā í gwɛ́ɛya gā uwɔ mla ɔtū nɛ̄hɛ́, Óndú. N géē yɔ̄ í tá uwɔ ahínyá eko dóódu, ohígbū ka a lɔhi.

⁷A le um hɛ́tá ŋmá ipú unwalu dóódu ɛɛ́. A kē klla má ka a lɛ aólɛlā kú um yálé ɛɛ́.