Read idoma AÍJĒ KÚ Ɛ̄GBĀ 55 Bible Online

AÍJĒ KÚ Ɛ̄GBĀ 55 - idoma bible

AÍJĒ KÚ Ɛ̄GBĀ 55

¹Ɔwɔicō, jāhɔ̄ lɛ ɔkɔ nɛ̄ n gbā ā. Ā cīgbhīhi kwu ɛ̄ba nɛ̄ n yɔ̄ ī ba ā ŋ́.

²Lɛ ahɔ̄ jē gā um, cɛ́ɛ́ ká ā lɛ ohi tá um, ɛ̄jɛ̄ ōwē le jɛ̄ um ɛɛ́.

³Ufi nɛ̄hi le um kwú ohígbū ɔnū nɛ̄ aólɛlā kú um bá ī fu um ā, mɛ́mla ɛ́gɛ́nɛ̄ ācobɔ̄bíipú bá ī lɛ abɔ̄ da um ɛyí tāajɛ ā. É le unwalu mɛ́mla ákanya kpó í klá um. É le cɔ̄nū mla um klla ī wɔ́tū um.

⁴Ufi nɛ̄hi yɔ̄ ī yá um. Ufi kú ikwū gaá le um kwú ɛɛ́.

⁵Ufi le um kwú, n kē yɔ̄ ī fīyégbúlú, Ipú kú um kwú gbogodo ɛɛ́.

⁶Eyī yá um ká n̄ lɛ acá bū bɛ̄ɛka okóohō ā, cɛ́ɛ́ ká n̄ kwú wu ŋmá amānyā nyɔ̄ í mlɛ́nyɔ́ ɛga éyi.

⁷Ń géē yɛ í le wu nyɔ̄ í lā ipú ígbíli.

⁸Cɛ́ɛ́ n géē hápápá lɛ ɛga nɛ̄ um í lɛ ɛyí wu ā pīyɛ lɛ iyī um ŋmá ipú ofúlutu mɛ́mla owu nɛ̄hi nyā.

⁹Lɛ ɛlā okónu kú aólɛlā kú um gbájí, Óndú. N má ācɛ bá ī yá ucē ɔ́bíipú mɛ́mla ikpɛ́lā igelī nɛ̄hi ā.

¹⁰É bá ī yá ucē nyā yɔ̄ ī yɛ igelī nɛ̄hi yɛ jīla tá kwu ɛnɔ kwu ɔtú. É cɛ̄ lɛ igelī nɛ̄hi ā le mu mla ucē obɔ̄bí.

¹¹Ācɛ nēe ī kpó odée yíífi ā bá ɛga dóódu. É bī ɔfú kú uwā bá ī le pīya ācɛ tū, klla bá ī plla ācɛ ipú úláyi.

¹²Ɔ́dāŋ ka olɛlā kú um yɔ̄ ī yá um okónu á nɛɛ, ń géē yɛ í lɛ ɛlā wu ɔ́ ŋ́. Ɔ́dāŋ ka ācɛ nōo yɔ̄ ī héyī tū um ā yɔ̄ ī gwō lɛyíkwu um á nɛɛ, ń géē yɛ í kwú ɔwɛ kú nū ú tá ajɛ.

¹³Amáŋ, awɔ nōo wɛ ɔ́nyī um mɛ́mla ɔ̄cɛ nōo kwu um ajaajɛ ā, yɔ̄ ī yá ɛlā yɔ̄ á.

¹⁴Alɔ kē tɛtɛ bá ī kɔ̄ɔ̄kā olɔnyɛ tɔ̄há, klla bá ī lé tɔ̄há ipú Agblīihɔ-nɛ̄hi kú Ɔwɔicō.

¹⁵Óndú, ká aólɛlā kú um kéē gekwú acígilí. Kéē lɛ uwá hɛ́ ɔ̄gɔ̄ tū oyēeyī, Ɔdōbɔ̄bí yɔ̄ ɔlɛ́ uwā, ɔtū kú uwā klla kē bɔ̄bí dúú.

¹⁶Amáŋ n géē hī Óndú igwú. Óndú ā kē í nya um tá.

¹⁷Kwu ɔ̄cɔ̄ɔ̄cī kwu ɔlɛ́ɛnɔ mɛ́mla ɔ̄nɔ̄ɔ̄nɛ̄ dóódu, kwu otú, n géē yɔ̄ ī kpó ɛpɔ̄ lɛ ɔ́, klla í yɔ̄ ī tíifu, ó kē í pó ɔkɔ kú um.

¹⁸Ó kē ī bī um wā ɔlɛ́ ɛbɔ́ ŋmá ipú ɛfú nū n gē kpó mla aólɛlā alɛwa nɛ̄ n lɛ ā.

¹⁹Ɔwɔicō nōo wɛ ɔcɛ́ ŋmá íkííkée ā, géē pó ɔkɔ kú um klla í yá aólɛlā kú um lé. Ohígbū ka é tá kéē pīyabɔ̄ ŋmá ucē obɔ̄bí kú uwā. É klla yúufi Ɔwɔicō ŋ́.

²⁰Ɔ́nyī um tɛtɛ ā yɔ̄ í kpɛ́fú tá oklóbīya nū yɔ̄ á. Ó le okónu nɛ̄ ó ce ā tēelihɔ ɛɛ́.

²¹Ɛlā kú nū lɔnyɛ fíyɛ́ ɛnwú á. Amáŋ ɔ́bíipú wɛ omōōmu ipú ɔtū kú nū. Ɛlā kú nū gbɔtū nɛɛ bɛ̄ɛka anɔ̄ ā. Amáŋ ó lulé nōo lɔfú hɛ́ ɔ̄cɛ bɛ̄ɛka ɛ̄wā ā glá.

²²Mā unwalu kú uwɔ tá ce Ɔwɔicō, ó kē í lɛ ɛlá kwu uwɔ. Ɔwɔicō, í gaá cɛ̄ kéē yá ācɛ olɔhi ā lé gbóógbóō ŋ́.

²³Amáŋ, Ɔwɔicō, ā géē bī ācoŋmɔ́ɔ̄cɛ, mɛ́mla aúwī, mɛ́mla ācokɛ̄mgbɛ̄ ɔ́ɔmā ga ipú únóji kú uwā piíí. Uwá í gāa lā āyā éyi kú oyēeyī kú uwā ga ajɛ ŋ́. Amáŋ ami ā, géē lɛ ɔtūce uwɔ piyóó.