Read idoma AÍJĒ KÚ Ɛ̄GBĀ 57 Bible Online

AÍJĒ KÚ Ɛ̄GBĀ 57 - idoma bible

AÍJĒ KÚ Ɛ̄GBĀ 57

¹Ményīnyi um, Ɔwɔicō, ményinyi um. Ohígbū ka awɔ gē lɛ ɛlá kwu um á. Ɛ́gɛ́nɛ̄ ugwū gē lɛ acá klá ayí nū ā, nāa gē gbō um, jāā gbéeko nɛ̄ owu nɛ̄hi kú ífi ā le tá gaá le yɛ.

²N gē hī Ɔwɔicō nōo lɔfú fíyɛ́ dúú ā igwú. Anú wɛ Ɔwɔicō nōo gē yá odúúdú ɛgbá kú um gā um á.

³Ó géē tɛ̄hɔ̄ ŋmá ɔkpáncō wā í nya um tá. Ó géē yá ācɛ nēe gē yá um ŋmó ā lé klla í je uwēyī lɛ uwá. Ɔwɔicō géē ma ihɔtū kú nū, nōo ī yɔ̄ piyóó ā, mɛ́mla ucē okpaakpa kú nū ā fú gā um.

⁴Aólɛlā nēe lɛbɛ̄ɛka ágábá nōo gē lé ɛbɛ́ ā, le yɛ jīla um tá ɛɛ́. Ayīnu kú uwā lɛbɛ̄ɛka óbō mɛ́mla ɔyī ā. Ígblɛ́nyī kú uwā kē lɛbɛ̄ɛka ɛ̄wā ōlúlé nɛ̄hi ā.

⁵Óndú, lɛ ɛ́gɛ́nɛ̄ a nwuné lɛ ā mɛ́mla ɛgahi kú uwɔ mafú ɔkpáncō, ká ā lɛ ɛgahi kú uwɔ mafú lɛ odúúdú ācɛ kú ipú ɛcɛ nyā.

⁶Aólɛlā kú um lɛ ukpa kpla tá ajɛ gē gbo eyī um kóō kwú um ɛɛ́. Ákanya le fíyɛ́ odo kú um abɔ̄, é le ɔ̄gɔ̄ bū tá ɔwɛ kú um, amáŋ, uwá abɔ̄yī uwā má gwōnū tá ipú ɔ̄gɔ̄ nēé bu táajɛ gā um piíí ā.

⁷N lɛ ɔtū kú um kpóce uwɔ dúúdú, Óndú, n géē gwíijē kú n̄ cɛ̄tra awɔ.

⁸Le héyī odo kú um, lɛ héyī ɛ̄ngwū mɛ́mla ɔkpānā. N klla géē héyī gbɔbū ɛ́ɛ́ kú eyī kóō nyā.

⁹Ɔwɔicō, n géē tá uwɔ ahínyá ipéeyī aéwo ā. N klla í cɛ̄tra awɔ ipéeyī aéwo kú ɛcɛ ā.

¹⁰Ihɔtū kú uwɔ nōo gē yɔ̄ eko dóódu ā, nwuné nɛ̄hi bɛ̄ɛka oŋmáajɛ ga ɔkpáncō ā. Ucē okpaakpa kú uwɔ ā kē nwuné bɛ̄ɛka o ŋmá ajɛ jāā gaá kwu ojuja ā.

¹¹Óndú, lɛ ɛ́gɛ́nɛ̄ a nwuné lɛ ā mafú ɔkpáncō. Ká ā lɛ ɛgahi mɛ́mla ojīlīmā kú uwɔ mafú lɛ odúúdú ɛcɛ.