Read idoma AÍJĒ KÚ Ɛ̄GBĀ 58 Bible Online

AÍJĒ KÚ Ɛ̄GBĀ 58 - idoma bible

AÍJĒ KÚ Ɛ̄GBĀ 58

¹Aá nēe gē gbāajɛ ā gē bɛ́yíkwu ɛpɔ̄ okpaakpa nɛɛ? Aá gē hɛ́pɔ̄ okpaakpa lɛ ɛjɛ̄ɛ̄jī ācɛ ɛɛ?

²Ehée. Ɔdōbɔ̄bí nɛ̄ aá gé yá glá ā, nɛ̄ aá gē gbɛlá nū á. Aá klla ī yá ucē kú ɔ́bíipú mla ucē obɔ̄bí ipú ajɛ ā.

³Ācobɔ̄bíipú ā gē gbo ucē obɔ̄bí ŋmá ipú kú ɛ́nɛ́ uwā. É gbɔɔ́ ō nyíleyī klla gbɔɔ́ ō kɛ̄mgbɛ̄ ŋmá ɛ̄cī nēé ma uwá ā.

⁴Ɛlā nēé ī ka wɛ̄ɛcɛ ŋmá okónu ā lɛ ɛ́fa bɛ̄ɛka ɛ́fa kú ogwiji ā. É lɛ ahɔ̄ kú uwá gwū kpɔ́kɔ́ɔ́ bɛ̄ɛka ahɔ̄ kú idu ɔbá ɛgwā,

⁵nɛ̄ ó gē pó ɔkɔ kú ɔ̄cɛ nōo gē bī ɛgwā ɔlɛ́ ŋ́, ámāŋ ka o pó ɛla kú ɔ̄cɛ o bī imabɔ̄ gē le plla ɛgwā ā ŋ́ mā.

⁶Óndú, lɛ ayīnu kú uwā kpó cē tū uwā okónu. Ɔwɔicō lɛ ayīnu kú uwā nōo lɛbɛ̄ɛka ákú ágábá ā ɔ́ɔmā kpó cē.

⁷Kéē gebí tāajɛ bɛ̄ɛka éŋkpɔ̄ nɛ̄ ajɛ je gwá tīiyē ā. Ācɛ kéē lɛ uwá da tāajɛ bɛ̄ɛka ácí nēe bū kwu ɔtāhɛ̄ ɔwɛ ā.

⁸Kéē kwú pīya bɛ̄ɛka igbí nōo gē je ja tāajɛ ŋmá ipú ɔlɛ́ nū ā. Kéē kwú pīya bɛ̄ɛka ɔyí nōo gekwú tá ɛ́nɛ́ nū ipú, ɛ́ɛ́ kéē ma ɔ́, nɛ̄ ó yēeyī má ɛnɔ ŋ́ mā.

⁹Ɛ́ɛ́ kéē jé ɔdā dúúmā dúú ā, é lɛ uwá kpó hɛ́ klá ajɛ bɛ̄ɛka ácí ā. Óndú géē je uwá mu owu bónū ipú íwɔ́tū nɛ̄hi kú nū, eko nēé kōō yēeyī nááná ā.

¹⁰Ācɛ o yá ucē okpaakpa ā géē bá ī gwéeyē, eko nēé má ɛ́gɛ́nɛ̄ é géē yá ācobɔ̄bíipú italā lɛ ā. É géē na ikpó kú uwā ipū oyī kú ɔ̄cobɔ̄bíipú nōo yɔ̄ ī pɛ́ ajɛ ā.

¹¹Ācɛ géē bá ī ka ka, “É géē cíla ācɛ o yá ucē okpaakpa ulé ɔ̄kwɛ̄yi gbóó. Ɔwɔicō yɔ̄ nōo gē kɛpɔ̄ tū ācɛ kú ɛcɛ nyā ɔkwɛ̄yi.”