Read idoma AÍJĒ KÚ Ɛ̄GBĀ 59 Bible Online

AÍJĒ KÚ Ɛ̄GBĀ 59 - idoma bible

AÍJĒ KÚ Ɛ̄GBĀ 59

¹Lɛ um hɛ́tá ŋmá abɔ̄ kú aólɛlā kú um, Ɔwɔicō. Gbō um ŋmá ɛgiyí ācɛ nēe ī kpɛ́fú tá um ā.

²Lɛ um hɛ́tá ŋmá ɛgiyí ācɛ oyá ɔdōbɔ̄bí. Lɛ um nyatá ŋmá abɔ̄ kú ācoŋmɔ́ɔ̄cɛ.

³Má ɔ̄, é tayínū yɔ̄ ī gbēeyī um kéē lɛ um ŋmó. Ācɛ olɔnɔɔtū nɛ̄hi ā lɛ īyī uwā túbá tɔ̄há lɛyíkwu um. Ó kē wɛ ka, n bīyíne dúúmā, amáŋ ka n yá uwá ɔdōbɔ̄bí dúúmā ŋ́.

⁴Óndú, ń kē lɛ́pɔ̄bí kú ɔdā dúúmā abɔ̄yī um ŋ́, ɛ́ɛ́ nēé gē hápápá nyɔ̄ í tayínū gbēyī umŋ ā.

⁵Óndú, Ɔwɔicō nōo lɔfú fíyɛ́ dúú, cāŋjɛ ká ā wā í tá um abɔ̄. Má ɛlā nyā abɔ̄yī uwɔ, Ɔwɔicō kú Ísrɛ̄lu. Óndú cāŋjɛ, ká ā lɛ italā yá odúúdú aéwo ā. Ā cɛ̄ lɛ ācɛ o yá ɔdōbɔ̄bíipú nēe ī yá ibīyājɛ ɔ́ɔmā nyɔ̄ icííci ŋ́.

⁶É kwúcē wā ɔlɛ́ ɔ̄nɔɔ̄nɛ̄ eko dóódu lɛ ígblɛ́nyī tɛ́ɛcɛ bá ī wú ahɛ bɛ̄ɛka ewō nēe bá ī yɛ gicō gajɛ ipú úláyi ā.

⁷Jāhɔ̄ ká ā pó ɛcá mɛ́mla oōgwō kú uwā. Ígblɛ́nyī kú uwā lɛbɛ̄ɛka ɛ̄wā ipú okónu kú uwā, nááná ā, é kē gbɛlá ka ɔ̄cɛ dúúmā, ɔ́ɔ pó ɛlā kú aá ŋ́.

⁸Amáŋ a yɔ̄ ī yɛhɛ tū uwā, Óndú, a yɔ̄ ī yá aéwɔhá nēe bá abɔ́ɔ ā ɛbɛ́.

⁹N lɛ ɔtūce ɔfú kú uwɔ, Ɔwɔicō. Awɔ gē gbō um á, Ɔwɔicō kú um.

¹⁰Ɔwɔicō kú um yíihɔtū tá um eko dóódu. Ó kē ī wā ɛgiyí um. Ó kē ī yá ká n̄ má ɔ̄ eko nōó ī yá aólɛlā kú um lé ā.

¹¹A híī ŋmó uwá ŋ́ Óndú, Ɔwɔicō, ohígbū nɛ̄ ācɛ ɔlɛ́ um géē je mlanyī. Lɛ uwá fíyákátā mla ɔfú kú uwɔ ā, ká ā lɛ uwá yálé, Óndú, Ɔwɔicō nōo gē gbō alɔ ā.

¹²É gē bīyíne eko dóódu nēé gē kɛlā. Ɛlā dúúmā nēé ka ā, wɛ ínoōbīya. Kéē lɛ uwá kwú ipú ɔbɔ́ɔ̄cɛ kú uwā ā, bɛ̄ɛka ɛ́gɛ́nɛ̄ ukpa gē kwú ɛbɛ́ ā. Ohígbū ka é ī cɛ́ɛcá klla ī kɛ̄mgbɛ̄.

¹³Lɛ uwá kpó yíífi dúúdú ipú íwɔ́tū kú uwɔ ā, cɛ́ɛ́ ka ācɛ dóódu kéē le jé ka Ɔwɔicō gē gbō Ísrɛ̄lu á. Ka anú klla gē gbāajɛ jāā ga ɛga dóódu kú ɛcɛ á.

¹⁴Aólɛlā kú um pīyɛyí wā ɔlɛ́ ɔ̄nɔ̄ɔ̄nɛ̄ lɛ ígblɛ́nyī tɛ́ɛcɛ bá ī wú ahɛ ɛha bɛ̄ɛka ewō nēe bá ī yɛ gicō gaajɛ ipú igelī nɛ̄hi ā.

¹⁵É lɛbɛ̄ɛka ewō nōo yɔ̄ ī tíne ɔdōlé ā, nōo klla ī fɔɔnū ɔ́dāŋ ka ó má ɔdōlé lé nū ipú ŋ́ mā.

¹⁶Amáŋ n géē yɔ̄ ī gwíije ohígbū ɔfú kú uwɔ, ɔ̄cɔ̄ɔ̄cī dóódu. N géē yɔ̄ ī gwíijē gbōmgbōm ohígbū ihɔtū kú uwɔ nōo yɔ̄ eko dóódu ā. Awɔ húmáyī lɛ ɛlá kwu um klla gē gbō um eko kú unwalu dóódu á.

¹⁷N géē gwíijē kahíníī, “A lɔfú.” N klla í ka ka, awɔ Ɔwɔicō ā gē gbō um á. Ka awɔ gē yíihɔtū tá um eko dóódu á.