Read idoma AÍJĒ KÚ Ɛ̄GBĀ 60 Bible Online

AÍJĒ KÚ Ɛ̄GBĀ 60 - idoma bible

AÍJĒ KÚ Ɛ̄GBĀ 60

¹Udéfīdi gwíijē nyā kéē lɛ nwū ācɛ odée. Ó tá ɔ̄ tāajɛ eko nɛ̄ ó yɔ̄ ī kpɛ́fú mla ācɛ Áram nēe ŋmá Unaharáyim nōo klla ŋmá Usóba ā. Anɔ́ɔ Ujówābu le cīgbīhi gaá le ācɛ Ɛ́dɔm úlā ofu cigwó kpó ŋmó ipú ɔpɛ́ nēé hī ɔpɛ́ kú Ɔmā ā. 2 Usam 8.13, 1 Úkl kú aɔ́cɛ́ 18.12 Ɔwɔicō, a tá alɔ klla le alɔ yálé ɛɛ́. A húmáyī ī cɔ̄nū mla alɔ, amáŋ abālɔbányā, le cīgbīhi wā ɛgiyí alɔ mɛ́ɛnɛ.

²A le ajɛ ā jīliyē, klla cɛ̄ lɛ ɔ́ kwú hɛ́ wulu kwú okónu ú tɔ́ɔtɛ́ ɛɛ́. Lɛ ɛga nōo tɔ́ɔtɛ́ hegwū ɛ́ɛ́ kóō je catāajɛ dúúdú.

³Ā cɛ̄ lɛ ācɛ kú uwɔ le ōwē má nɛ̄hi. Alɔ bá ī ga ɔwɛ ga ácí bɛ̄ɛka ɔdā nɛ̄ ejé lɛ alɔ kwú ā.

⁴A le ācɛ nēe gē gbā uwɔ ā ahɔ̄ pi, cɛ́ɛ́ kéē le kwu ŋmá ɛgiyí aólɛlā nōo yá uwā lé ā.

⁵Lɛ alɔ nyatá mla ɔfū kú uwɔ, pó ɔkɔ nɛ̄ alɔ gē gbā ā, cɛ́ɛ́ ká ā lɛ ācɛ nɛ̄ ā yíihɔtū tá uwā ā hɛ́tá.

⁶Ɔwɔicō kɛlā ŋmá ipú Agblīihɔ-nɛ̄hi kú nū kahíníī, “Abɔ̄ n le yálé ā, n géē je Usɛ́kɛm kɔ̄, klla í je ɔpɛ́ kú Usúkɔ̄tu ka tū ɔ̄ lɛ ācɛ ɔlɛ́ um.

⁷Ugílɛ̄di wɛ ákú um, Umanásɛ kē wɛ ákú um dúú. Ɛ́frɛm lɛbɛ̄ɛka ɔkpú ō kwɛyí kpɛ́fú kú um á. Ujúda kē wɛ okwutɛ kú ɔcɛ́ kú um á.

⁸Amáŋ n géē je Umówābu pīya ocíbú ō le na abɔ̄, n klla í tá áblákpá kú um fíyɛ́ Ɛ́dɔm, cɛ́ɛ́ kóō jé ka amiɔɔ ɔ̄ Óndú kú nū á. N géē gbogwú ga ɛgiyí ācɛ Ufilístiya, kóō mafú ka n le uwá yálé ɛɛ́.”

⁹Ɔwɔicō, ɔ̄nyɛ géē bī um ga igelī nɛ̄hi, nēé cē igá tū ɔ̄ ā? Ɔ̄nyɛ géē bī um tá ga Ɛ́dɔm ā?

¹⁰Ɔwɔicō, a tá alɔ piyóó ɔkwɛ̄yi nɛɛ? Á gáā ga ɔgbɛ́fú mla aícɔ́ɔja kú alɔ gɛ ŋ́ nɛɛ?

¹¹Tá alɔ abɔ̄ lɛyíkwu aólɛlā kú alɔ, ohígbū ka otábɔ̄ kú ɔlɛɛcɛ wɛ áncā nɛ̄.

¹²Abɔ̄ Ɔwɔicō yɔ̄ pī alɔ ā, alɔ géē yálé piíí. Ó géē yá aólɛlā kú alɔ lé lɛ alɔ.