Read idoma AÍJĒ KÚ Ɛ̄GBĀ 61 Bible Online

AÍJĒ KÚ Ɛ̄GBĀ 61 - idoma bible

AÍJĒ KÚ Ɛ̄GBĀ 61

¹Pó ikwū nɛ̄ n yɔ̄ ī je ā, Ɔwɔicō, ká ā jāhɔ̄ lɛ ɔkɔ nɛ̄ n gē gbā ā.

²Eko nɛ̄ odo kú um le gbenyi ohígbū ákanya nɛ̄ n yɔ̄ ipú nū, nɛ̄ n kē le lé ligbó lɛ ɔlɛ́ ā, n hī uwɔ igwú, Óndú. Lɛ um bī ga ɛga nāa í gbō um ɛbɔ́ á.

³Ohígbū ka awɔ gē gbō um á. A lɛbɛ̄ɛka ɔdɔ kú inɔ̄ɔda olɔfū nɛ̄hi nōo ī gbō ācɛ ŋmá ɛgiyí aólɛlā kú um ā.

⁴Ká n̄ lā ipú Agblīihɔ-nɛ̄hi kú uwɔ piyóó, Óndú, cɛ́ɛ́ ká n̄ géē lā ɛga nāa yɔ̄ ā ɛbɔ́.

⁵Ohígbū ka awɔ Ɔwɔicō, le okónu nɛ̄ n ce ā pó ɛɛ́. A kē le ɔdā nōo wɛ úgwū kú ācɛ nēe gē yúufi uwɔ ā je gā um ɛ́ɛ́.

⁶Lɛ oyēeyī ōlīgbō je lɛ ɔcɛ́ ā, cɛ́ɛ́ kóō yēeyī nyɔ̄ piyóó ipú ɛcɛ, ka iyē kú nū kóō híī bī ŋ́.

⁷Yá kóō lé ɔcɛ́ piyóó, ipéyī uwɔ, Ɔwɔicō. Leyī kwu ɔ́, ohígbū ka a gē yíihɔtū ɔ̄cɛ eko dóódu. A klla ī yá okónu okpaakpa nāa ce lɛ ɔ́ ā jīla.

⁸Cɛ́ɛ́ ká n̄ gē yɔ̄ ī gwíijē, yɔ̄ ī cɛ̄tra uwɔ piyóó. Cɛ́ɛ́ ká n̄ gē yɔ̄ ī yá okónu nɛ̄ n ce gā uwɔ ā jīla eko dóódu.