Read idoma AÍJĒ KÚ Ɛ̄GBĀ 62 Bible Online

AÍJĒ KÚ Ɛ̄GBĀ 62 - idoma bible

AÍJĒ KÚ Ɛ̄GBĀ 62

¹Ɔwɔicō ōfōōfūnū gē je ɛbɔ́ lɛ odo kú um á. Anú gē nya um tá á.

²Anú ōfōōfūnū gē gbō um klla gē nya um tá á. Anú ā lɛbɛ̄ɛka ɔkplɛ́fú kú um á. Ɔ̄cɛ dóódu í gáā yá um lé glá ŋ́.

³Eko nyá nɛ̄ odúúdú aá géē kpɔ́fú kwu ɔ̄cɛ éyi, nɛ̄ ó lɔfú ŋ bɛ̄ɛka ɔdɔ nōo yɔ̄ ī wúla tāajɛ ā.

⁴Aá tíne ká aá lɛ ɔ́ bī wāajɛ ŋmá ipú ɛga ojīlīmā nɛ̄ ó ce ā ōfōōfūnū. Ɛ̄kɛ̄mgbɛ̄ wɛ ɔdā nōo he aá ɔtū á. Aá bī akpokónu ká aá gē hɛ́ ɔhā ce ācɛ, amáŋ aá bá ī tókónu lɛ ācɛ ipú ɔtū kú aá.

⁵Ɔwɔicō ōfōōfūnū gē je ɛbɔ́ lɛ odo kú um á. Anú nɛ̄ n kē lɔtūce á.

⁶Anú gē gbō um klla ī nya um tá á. Anú lɛbɛ̄ɛka ɔkplɛ́fú kú um á, ɔ̄cɛ dúúmā í yá um lé glá ŋ́.

⁷Ɔwɔicō gē hɛ́ um tá klla ī le ojīlīmā ce um á. Anú lɔfú nɛ̄hi nōo ī gbō um ŋmá ákanya á.

⁸Ācɛ ɔlɛ́ um, aá kpɔ́tūce Ɔwɔicō eko dóódu. Aá da ɔ́ odúúdú unwalu kú aá, ohígbū ka anú gē leyīkwu alɔ á.

⁹Alɛɛcɛ lɛbɛ̄ɛka owu áncā nɛ̄, kwu ācɛ nɛ̄ŋcɛ́, kwu ācɛ nɛ̄hi, í lɛ ile dúúmā ŋ́. Lɛ uwá jámá ká ā má ɔ̄, é wɛ ɔdā dúúmā ŋ́. É le fékéé bɛ̄ɛka ēpū ā.

¹⁰Ā kpɔ́tūce ɔdōbɔ̄bí ō yá mɛ́mla ɔ́bíipú ō bī ŋ́. Aá kpɔ́tūce agbénú ō lɛ ɔwɛ kú ɔ́bíipú mɛ́mla ɔ̄cɛ o pīyatū ŋ́. Aá kē lɔtūce itene ō lɛ ŋmá uwī ō wī ŋ́.

¹¹Ɔwɔicō kɛlā igbo ékpónú, n kē húmáyī pó ɛlā ɔ́ɔmā igbo alɛwa ka Ɔwɔicō ōfōōfūnū lɔfú á.

¹² Ihɔtū kú nū yɔ̄ eko dóódu. Óndú, awɔ abɔ̄yī uwɔ gē cíla ɔ̄cɛ ulé ɛ́gɛ́nɛ̄ ó gē yá ucē lɛ ā á.