Read idoma AÍJĒ KÚ Ɛ̄GBĀ 64 Bible Online

AÍJĒ KÚ Ɛ̄GBĀ 64 - idoma bible

AÍJĒ KÚ Ɛ̄GBĀ 64

¹N yɔ̄ ipú unwalu, Ɔwɔicō, jāhɔ̄ tá ɛpɔ̄ nɛ̄ n yɔ̄ ī fu uwɔ ā. N gē yúufi kú aólɛlā kú um, lɛ um nyatá ŋmá abɔ̄ uwā.

²Gbō um ŋmá abɔ̄ kú ujɔ̄ kú ācobɔ̄bíipú ā.

³É ī bī ígblɛ́nyī kú uwā bɛ̄ɛka ɔkpacaŋgelī nēé le tūlé ā. É gē tá ɛlā obɔ̄bí ŋmá okónu wɛ̄ɛcɛ bɛ̄ɛka ofītɛ́ nōo gē tá ɔyī ɛ́fa ā.

⁴É ī hápápá ī nyɔ̄ í kɛ̄mgbɛ̄ ɛbɛɛbɛ abɔ̄ é jé ɔdā uwēyī ŋ́ mā. É ī bī ācɛ olɔhi ā iyē ŋmá lɛ o híla uwá igbīhi uwā.

⁵É gē lɛ ɔtū tū iyī uwā ɔtū ipú ujɔ̄ obɔ̄bí nēé gē tū ā. É gē miya ɛga nēé géē kpla ukpa tá ā. É gē gbɛlá kahíníī, “Ɔ̄cɛ dúúmā í má alɔ glá ŋ́.”

⁶É le ojuju obɔ̄bí tū klla gē kahíníī, “Alɔ le ojuju obɔ̄bí nɛ̄hi gbō tá ajɛ ɛɛ́, ɔ̄cɛ dúúmā í gáā má ɔ̄, ɛ́ɛ́ nēé gē jɔ́ɔkwu alɔ glá ŋ́.” Odo mla ɔtū kú ɔlɛɛcɛ lipú nɛ̄hi.

⁷Amáŋ Ɔwɔicō géē tá ɔyī kú nū lɛ uwá, cɛ́ɛ́ ó lɛ uwá yá ágbe acígilí.

⁸Ó géē je uwá kpó yíífi ohígbū ɛlā nēé ka ɔ́ɔmā, odúúdú ācɛ nēe í má uwá ā géē yá uwā ɛbɛ́.

⁹Odúúdú ācɛ ā i yúufi, é kē ī gbɛlá kwu ɔdā nɛ̄ Ɔwɔicō yá nyā. É klla í kā ācɛ ɔhá ɔ̄kā nū.

¹⁰Odúúdú ācɛ olɔhi mɛ́mla ācɛ okpaakpa ā géē gwéeyē, ohígbū ɔdā nɛ̄ Ɔwɔicō yá nyā. É klla í kpɔtūce ɔ́ kóō gbō uwā. Odúúdú ācɛ nēe le kpaakpa ipú ɔtū ā kē í cɛ̄tra Ɔwɔicō.