Read idoma AÍJĒ KÚ Ɛ̄GBĀ 66 Bible Online

AÍJĒ KÚ Ɛ̄GBĀ 66 - idoma bible

AÍJĒ KÚ Ɛ̄GBĀ 66

¹Aá tɔ́ɔga kú aá gwéeyē kú aá cɛ̄tra Ɔwɔicō, odúúdú alɛɛcɛ.

²Aá gwíijē kú ɛgahi kú iyē kú nū cɛ́ɛ́ kú aá cɛ̄tra anú.

³Da Ɔwɔicō kahíníī, “Ɔdā nāa yá ā í cɛ̄ lɛ ɔ̄cɛ hídáagó nɛ̄hi. Abɔ̄ kú uwɔ lɔfú nɛ̄hi, aólɛlā kú uwɔ bá ī yúufi ī túkpɛɛ́ iyɔ̄bū uwɔ.

⁴Odúúdú ācɛ kú ipú ɛcɛ gē gbā uwɔ ɛ̄gbā. É ī gwíijē ī cɛ̄tra uwɔ, klla bá ī cɛ̄tra iyē kú uwɔ.”

⁵Aá wā í má ɔdā nɛ̄ Ɔwɔicō yá ā ooo. Úklɔ́ ōhídáagó nɛ̄ ó yá ɔtāhɛ̄ alɛɛcɛ ā.

⁶Ó kwú ísu u pīya ajɛ oŋmókókó, aádáádā alɔ le yɛ ikpó bēhé ísu ajɛ olamu. Abɔ́ɔ ā, alɔ gwéeyē kú ɔdā nɛ̄ ó yá ā.

⁷Ó gē gbō ajɛ piyóó mla ɔfú kú nū. Eyī kú nū kwu odúúdú ɛcɛ. Ɔ̄cɛ dúúmā nōo ī yíkpɛ̄yí olɔfú kóō cāŋjɛ lɛyíkwu ɔ̄ ŋ́.

⁸Aá cɛ̄tra Ɔwɔicō kú alɔ, odúúdú aéwo ā, ācɛ nēe bá ipú ɛcɛ nyā ā, kéē pó ocɛ̄tra nāa ī cɛ̄tra ɔ́ ā ɛga dóódu.

⁹Ɔwɔicō le alɔ tū oyēeyī, ipu kú ācɛ nēe yēeyī ā, ó cɛ̄ lɛ aólɛlā kú alɔ yá alɔ lé ŋ́.

¹⁰Ɔwɔicō, a le alɔ jámá, le alɔ na ɛ́gɛ́nɛ̄ ɔlá ge jé oje nɛhɛ́ má ā.

¹¹A cɛ̄ le ukpa lɛ alɔ kwú, a klla kwú iyō ogbɛ́nú nɛ̄hi ú ce alɔ igbīhi.

¹²Á cɛ̄ lɛ aólɛlā kú alɔ le alɔ yálé, le ikpó da alɔ ɛyí tāajɛ. Alɔ móōwē bū ipú ɔlá mɛ́mla ipú éŋkpɔ̄ bɛ̄ɛcɛ. Amáŋ a kē le alɔ bī wā ɛga nɛ̄ ɛbɔ́ mɛ́mla ɔdā dóódu cabá anú ā.

¹³N géē wā í gwɛ́ɛya kú ɔdāajɛ o yɔlá dúúdú gā uwɔ ipú Agblīihɔ-nɛ̄hi kú uwɔ. Ɔdā nɛ̄ n cokónu nū gā uwɔ ā, n géē je gā uwɔ.

¹⁴N géē je ɔdā nɛ̄ n cokónu nū gā uwɔ eko nɛ̄ n yɔ̄ ipú unwalu ā gā uwɔ.

¹⁵N géē bī álá wā í gwɛ́ɛya o yɔlá dúúdú ɛyí ede kú uwɔ. N gē bī aɛ́wū mɛ́mla aɔ́bá ɛna wā í gwɛ́ɛya gā awɔ. Anɔ́ɔ ódūdū kú nū gē ŋmá ajɛ ga ɔkpáncō á.

¹⁶Aá wā í jāhɔ̄ gā um, odúúdú ācɛ nēe gē gbā Ɔwɔicō klla ī lɛ ojīlīmā ce ɔ́ ā. N géē da aá ɔdā nɛ̄ ó yá gā um ā.

¹⁷N le ikwū je klá anú kóō tá um abɔ̄, n gwíijē cɛ̄tra anú.

¹⁸Ɔ́dāŋ ka ń lɛ ɛlá wu ucē obɔ̄bí nɛ̄ n yá ā ŋ́ nɛɛ, Óndú ā í géē yɛ ī jāhɔ̄ gā um ŋ́.

¹⁹Amáŋ Óndú ā lɛ ɔkɔ kú um pó ɔkwɛ̄yi ɛɛ́. Ó klla le ahɔ̄ jē le ɔkɔ nɛ̄ n gbā ā ɛɛ́.

²⁰N tá Óndú ā ahínyá klla cɛ̄tra anú, ohígbū ka ó tá ɔkɔ oōgbā kú um, ɛ́ɛ́ nɛ̄ ó gē mā ō yíihɔtū tū um eko dóódu ŋ́.