Read idoma AÍJĒ KÚ Ɛ̄GBĀ 68 Bible Online

AÍJĒ KÚ Ɛ̄GBĀ 68 - idoma bible

AÍJĒ KÚ Ɛ̄GBĀ 68

¹Ká Óndú ā kóō cāŋjɛ, ka aólɛlā kú nū kéē kwú fíyákátā. Ācɛ nēe gē wɔ́tū nū ā, kéē kwu ŋmá ɛgiyí nū.

²Óndú, lɛ uwá nū nyɔ̄ ɛ́gɛ́nɛ̄ owu gē kpó ódūdū nyɔ̄ ā, Ācobɔ̄bíipú ā kéē le kpó yíífi ŋmá ɛgiyí Ɔwɔicō ɛ́gɛ́nɛ̄ ɔja gē ja ipú ɔlá ā.

³Amáŋ ká ɔtū kóō he ācɛ okpaakpa ā, kéē gwéeyē ipéyī Óndú ā. Kéē lɛ ɔtū nɛ̄hɛ́, kéē tɔ́ɔga kú éeyē.

⁴Aá gwíijē lɛ Ɔwɔicō, aá gwíijē ō cɛ̄tra Ɔwɔicō. Aá gwíijē lɛ anú nōo ce ɛyí ojuja bɛ̄ɛka ɔnya ā. Iyē kú nū wɛ Óndú ā, aá gwíijē ɛga nɛ̄ ó yɔ̄ ā.

⁵Ɔwɔicō nōo lā ɔlɛ́ otīihɔ kú nū ā wɛ ádā kú ayókwū á, anú klla ī gbō anyōkwū ŋmá unwalu á.

⁶Ɔwɔicō gē je ɔlɛ́ lɛ ɔ̄cɛ nɛ̄ ó lɛ ɔlɛ́ kóō lā anú ŋ́ má. Ó klla gē kpó aálagbá ŋmá ipú agbá gē je uwá gbo agbénú. Amáŋ, ācɛ nēe gē yíkpɛ̄yí olɔfú ā gē lā ipú alácɛ̄ piyóó.

⁷Ɔwɔicō, eko nāa hɛ́ ācɛ ɔlɛ́ uwɔ tá, nāa gbɔbū lɛ uwá ipú ígbíli ā,

⁸ajɛ yɔ̄ í jīliyē, ɔkpáncō pīya ɔwɔ wāajɛ. Ohígbū ka awɔ nōo wɛ Ɔwɔicō kú Ísrɛ̄lu ā gā, awɔ nōo wɛ Óndú kú Usáyínāyi ā gā.

⁹A le yá kú ɔwɔ kóō yá nɛ̄hi klá ajɛ kú ɔlɛ́ uwɔ, o yá ká ajɛ ā nōo le ŋmókókó ā kóō le tīile kpɔ́.

¹⁰Ācɛ kú uwɔ le ɔlɛ́ uwā gwó abɔ́ɔ. Abɔ̄ ā lɔhi ā, a le ɔdā nɛ̄ aógbɛhá cɛgbá ā je lɛ uwá.

¹¹Óndú ā le ɔ́da je, ɛwa nɛ̄hi kú ācɛnyā gbɔɔ́ ō kɔ̄ɔ̄kā ā tɛ́ɛcɛ bá yɔ̄ ī ka kahíníī,

¹²“Aɔ́cɛ́ mɛ́mla aícɔ́ɔja kú uwā bá ī kwinya nyɔ̄.” Ācɛnyā nēe bá ɔlɛ́ ā, lɛ ɔdā nēe kpó ŋmá ɔgbɛ́fú ā kɔ̄.

¹³Aɔ́dā nēé kɔ̄ ā wɛ aójibó kú okóohō nēé le oje nɛ̄hɛ́ ma plá uwá iyē nɛ̄ aácá kú nū wɛ ɛ́nɛ́nɛ̄ ugóolu (oje ɔdɔ) gē ceyī ŋɛɛ́ŋɛɛ́ ā. nááná nɛ̄ ācɛ ōhī kú aá gaá bá inú álá eko nēé bá gē kpɛ́fú ā.

¹⁴Eko nɛ̄ Ɔwɔicō nōo lɔfú fíyɛ́ dúú ā, je aɔ́cɛ́ kpó fíyákátā wāajɛ ā, é lɛbɛ̄ɛka ébú nōo yá wāajɛ klá ɛyí ɛfu kú Usálumɔn kwɛ́mm ā.

¹⁵Ubássan wɛ ɛfu nɛ̄hi nōo nwuné klla lɛ ɛga opílópíló alɛwa.

¹⁶Ɔdíyá nāa géē má ɛfu nɛ̄ Ɔwɔicō fu ka anúɔ í lā piyóó ā ímálānyī ā?

¹⁷Óndú ā gē wā ŋmá ɛyí ɛfú kú Usáyínāyi mla úlúúlā kú aúgbɔ́ɔnya o kpɛ́fú wā ɛga otīihɔ ā.

¹⁸ Ó le yɛ ga ágēnégēne kú ɛfu ā, le aálagbá kú ɛfú alɛwa kpó nyɔ̄ mla iyī nū. Ó mīyɛ aɔ́dā ɛhi ŋmá abɔ̄ ācɛ nēe bɛ́yí kwu ɔ́ ā.

¹⁹Aá cɛ̄tra Óndú ā, nōo gē bī iyó kú alɔ ɛ̄cī dóódu ā. Anú wɛ Ɔwɔicō nōo gē nya alɔ tá á.

²⁰Ɔwɔicō nɛ̄ alɔ gē gbɛ̄gbā ā, wɛ Ɔwɔicō nōo gē nya ɔ̄cɛ tá. Anú wɛ Óndú, nōo wɛ Óndú kú alɔ nōo gē hɛ́ alɔ tá ŋmá abɔ̄ kú ikwū á.

²¹Ɔwɔicō géē kpó aíkpɛ̄yí kú aólɛlā kú nū ca piíí, ācɛ nēe tá kéē kwúcē ŋmá ínoōbīya kú uwā ā.

²²Óndú ā kahíníī, “N géē kpó aólɛlā kú aá kwúcē wā ŋmá Ubássan. N géē kpó uwá wɛ̄ɛcɛ ŋmá ɔkɛkɛlɛ kú itekwū.

²³Cɛ́ɛ́ ká aá yɛ bū ipú oyī kú uwā, ka aéwō kú ɔlɛ́ aá kéē pla oyī ā nyɛ̄ ɛ́gɛ́nɛ̄ é planyɛ̄ lɛ glá ā.”

²⁴Ɔwɔicō, odúúdú ācɛ má uwɔ, eko nāa nɔwɔ bɛ̄ɛka ícɔ́ɔja nōo le ɛfú yálé ā, ɔwɔ ō na kú Ɔwɔicō, ɔcɛ́ kú um mla ɛwa kú ācɛ ga Agblīihɔ-nɛ̄hi ā.

²⁵Ācogwíijē bá iyɔ̄bū nū, ācɛ nēe ī gwō ɔdā ōbī gwíijē ā bá igbīhi, áncɛ́nyā nēe bá ī gwō ɔjá bá ɔtāhɛ̄ ā.

²⁶“Aá cɛ̄tra Ɔwɔicō ipéyī ōjīla kú ācɛ kú nū, aá cɛ̄tra Ɔwɔicō odúúdú ayááyí kú Ujékɔ̄pu.”

²⁷Ubɛ́njamīn nōo wɛ ipɔ́ɔma nōo nyɛ́ fíyɛ́ ā, géē wā aflɛ́yí á, cɛ́ɛ́ anyākwɔ́cɛ kú Ujúda mɛ́mla ígwu kú uwā kē yɛ ce uwá Anyākwɔ́cɛ kú Usébūlɔn mɛ́mla Unáfutāli kéē gbo ce Ujúda.

²⁸Ɔwɔicō, lɛ ɔfú kú uwɔ mafú ɔfú nāa bī le nuunu lɛ alɔ ā

²⁹ŋmá ipú Agblīihɔ-nɛ̄hi kú uwɔ, Ujerúsālɛm, ɛga nɛ̄ aɔ́cɛ́ gē bī aɔ́dā ɛhi gē lɛ uwɔ ā.

³⁰Lɛ ɛgba dɛ̄ tū Íjīpiti, nōo lɛbɛ̄ɛka ɛbɛ́ obɔ̄bí ɔ́ɔmā nōo lā okónu ɔkpá ā. Lɛ ɛgba dɛ̄ tū aéwo nēe lɛbɛ̄ɛka aɔ́bá ɛna mɛ́mla ayí ɛna kú uwā ā, jāā gbéeko nɛ̄ odúúdú uwā túkpɛɛ́, kwú oje nɛ̄hɛ́ kú uwā ú gā uwɔ. Lɛ odúúdú ācɛ nɛ̄ ɛfú ō kpó he uwá ɔtū ā fíyákátā.

³¹Ācɛ okwɛyí éwo ā géē wā ŋmá Íjīpiti ācɛ kú Itiyópiya géē je abɔ̄ kú uwā gicō kpɛ́tɛ́ɛ́ í gbɔ̄ɔkɔ lɛ Ɔwɔicō.

³²Aá gwíijē lɛ Ɔwɔicō, odúúdú ajɔ̄ɔ̄cɛ́ kú ɛcɛ. Aá gwíijē kú aá cɛ̄tra Ɔwɔicō.

³³Anú nōo ce ojuja bɛ̄ɛka ɔnya ā, ɔkpáncō nɛ̄ ó yá ŋmá íkííkée ā. Aá jāhɔ̄ lɛ ɔ́ ká aá tɔ́ɔga tɔ̄há nɛ̄hi lɛ ɔ́.

³⁴Aá bī ɔfú kú Ɔwɔicō le tɔ́ɔna, ó cɔcɛ́ Ísrɛ̄lu, ɔkpáncō kē ī mafú ɛ́gɛ́nɛ̄ ó lɔfú lɛ ā.

³⁵Ɔwɔicō, tūufi nɛ̄hi, eko nɛ̄ ó yɔ̄ ī wɛ̄ɛcɛ ŋmá ipú Agblīihɔ-nɛ̄hi kú nū. Anú wɛ Ɔwɔicō kú Ísrɛ̄lu á. Ó géē lɛ ɔfū tū ācɛ ɔlɛ́ nū iyē klla gē je íkwu lɛ uwā. Aá cɛ̄tra Ɔwɔicō.