Read idoma AÍJĒ KÚ Ɛ̄GBĀ 69 Bible Online

AÍJĒ KÚ Ɛ̄GBĀ 69 - idoma bible

AÍJĒ KÚ Ɛ̄GBĀ 69

¹Ɔwɔicō kócōō, lɛ um nyatá. Ohígbū ka éŋkpɔ̄ le yɛ gaá kwu um ɔkɔ ɛɛ́.

²N yɔ̄ ī bí gaajɛ ga ipíípú ɔ́tɔ̄ ɛɛ́, ń má ajɛ olɔfú dúúmā, nɛ̄ n gē lɛ ikpó ce ɔ́ gɛ ŋ́. N yɔ̄ ɛga olipú kú īsu ā ɛɛ́, úgbagwú kú ísu ā kē gáā je um nyɔ̄ ɛɛ́.

³Ɛ̄jɛ̄ kú ikwū nɛ̄ n húmáyī je kéē wā í tá um abɔ̄ ā le jɛ̄ um ɛɛ́. Ɔkɔ kú um kwú ŋmó ɛɛ́. Agīje kwú eyī kú um í kpó mi, ohígbū ikwū nɛ̄ n yɔ̄ ī je gē tíne ɔ̄cɛ nōo í wā í tá um abɔ̄ ā.

⁴Ācɛ nēe gē wɔ́tū um icííci ā, lɛ ɛwa fíyɛ́ īnyīlɛyí kú um á. Aólɛlā kú um gē kɛ̄mgbɛ̄ bá um. É lɔfú, é klla tíne ō je um ŋmó. É mīyɛ ɔdā nɛ̄ ń je uwī ŋ́ mā ŋmá ɛgiyí um, anɔ́ɔ é kwú ɔ̄ lɛ ācɛ ɔhá.

⁵Ɔwɔicō, íne nɛ̄ n bīya ā í tayínū ŋmá ɛgiyí uwɔ ŋ́. A jé ɛ́gɛ́nɛ̄ n líla lɛ ā.

⁶Ā híī cɛ̄ gā um kpó uwēyī tū ācɛ nēe lɛ ɔtūce uwɔ ā ɛyí ŋ́, Óndú, Ɔwɔicō, awɔ nōo lɔfú fíyɛ́ dúú. Ā cɛ̄ ká n̄ bī uwēyī gē lɛ ācɛ nēe gē gbā uwɔ ɛ̄gbā ā ŋ́, Ɔwɔicō kú Ísrɛ̄lu.

⁷Ohígbū uwɔ nēé gē cē um ɛcá nɛ̄ n tá ipú uwēyī yɔ̄ á.

⁸N lɛbɛ̄ɛka ugbɔga ā ɛgiyí ayínɛ́ um. Ācɛ ɔlɛ́ um je um bɛ̄ɛka éwɔhá ā.

⁹Ɔtū caca kú Agblīihɔ-nɛ̄hi kú uwɔ ā yɔ̄ ī yi um ɔlá nɛ̄hi. Odúúdú ɛcá nēé ī cá uwɔ ā, wā í klá um dúú.

¹⁰N le okónu gwū, le īyī um tū wāajɛ. Ācɛ kē gbɔɔ́ ō cá um ɛcá.

¹¹N le īlī ekwu kpó wu iyē, é kē gbɔɔ́ ō yɛhɛ tū um.

¹²Ɛga dóódu ipú úláyi ā, é bá ī kɛlā kú um, ācɛ nɛ̄ ejé kwú ā klla bá gē tū um ijē.

¹³Amáŋ n yɔ̄ ī gbɔ̄ɔkɔ gā uwɔ Óndú, Ɔwɔicō, tá um ohi eko dúúmā nōo he uwɔ ɔtū ā. Tá um ohi ohígbū ihɔtū nɛ̄hi kú uwɔ ā, ohígbū ka a le okónu nāa ce ka anúɔ í tá um abɔ̄ ā tū.

¹⁴Lɛ um nyatá cɛ́ɛ́ kú n̄ híī bū ipú itɛ ŋ́. Gbō um ɛbɔ́ ŋmá abɔ̄ kú aólɛlā kú um.

¹⁵Ā cɛ̄ lɛ ísu cēenyi je um kpó ŋ́, ā cɛ̄ lɛ ísu nōo lipú nɛ̄hi je um mulɛ ŋ́. A kē híī cɛ̄ lɛ únóji je um lé ɛ́ɛ́ ŋ́.

¹⁶Óndú ā le ohi tá um, ohígbū ka a lɔhi, a kē ī yíihɔtū tá um eko dóódu. Le ohi tū um ohígbū ka a gē ményinyi um.

¹⁷Ā híīī je īyī uwɔ tayínū ŋmá ɛgiyí ami nōo wɛ ɔ̄cocɛ̄hɔ̄ kú uwɔ ŋ́. N yɔ̄ ipú unwalu nɛ̄hi, lɛ ohi tá um abālɔbányā.

¹⁸Wā ɛgiyí um ká ā lɛ um nyatá lɛ um hɛ́tá ŋmá abɔ̄ ká aólɛlā kú um.

¹⁹A jé ɛ́gɛ́nɛ̄ é gē ca um ɛcá lɛ ā, ɛ́gɛ́nɛ̄ é gē je uwēyī gā um lɛ klla ī nyí um ojīlīmā lɛ ā. A kē ī má odúúdú aólɛlā kú um.

²⁰Ɛcá kwú um ɔtū ú bīya, ɔtū kú um kē kwú gbenyi ɛɛ́. N leyīce ka n géē má ɔ̄cɛ nōo í ményinyi um, amáŋ ɔ̄cɛ dúúmā í yɔ̄ ŋ́. N má ɔ̄cɛ dúúmā nōo ī tá um ɔtū lé ŋ́.

²¹Eko nɛ̄ ɛmiyɛ gē ŋmó um, ɔdā nōo ī ŋmó ɔ̄cɛ ā nēé gē je gā um á. Eko nɛ̄ ijēēnyi gbɔɔ́ ō ŋmó um, ɔdā nōo le mákáká ā, nēé gē je gā um á.

²²Ucɛ kú uwā kóō kwú pīya ífi lɛ uwá. Ucɛ o tīihɔ kú uwā ā kóō kwú pīya ukpa lɛ uwá.

²³Le uwá eyī kpó pu, ká ā lɛ uwá ikpokwú igbīhi kpó cē.

²⁴Le mafú lɛ uwá ɛ́gɛ́nɛ̄ a cɔ̄nū nwuné lɛyíkwu ucē kú uwā lɛ ā.

²⁵Ɔlɛ́ uwā kóō kwú pīya alácɛ̄, nɛ̄ ɔ̄cɛ dúúmā í gáā hile nōo géē lā inu ɔlɛ́ uwā ŋ́.

²⁶É gē yá ɔ̄cɛ nāa yá italā ā ŋmó, é géē yá awanda lɛyíkwu italā nēé yá ɔ̄cɛ nāa yá ɔ̄ ágbe ā.

²⁷Lɛ odúúdú íne nēé bīya ā tá tāajɛ. Ā cɛ̄ lɛ uwá lɛ ukpɛ̄ dúúmā ipú onyatá kú uwɔ ā ŋ́.

²⁸Lɛ iyē kú uwā nya ŋmá ipú ɔkpá kú oyēeyī. Ā tá iyē kú uwā tū ipú ɔkpá nāa tá iyē kú ācɛ ɔlɛ́ uwɔ tū ɔ̄ ā ŋ́.

²⁹Amáŋ n yɔ̄ ipú ɔnɔ mla ákanya nɛ̄hi, kwú um ú gicō Ɔwɔicō, cɛ́ɛ́ ká ā lɛ um nyatá.

³⁰N géē gwíijē í cɛ̄tra Ɔwɔicō. N géē ka ɛ́gɛ́nɛ̄ ó lɔfú lɛ ā, abɔ̄ n gē tá ɔ̄ ahínyá ā.

³¹Ɛ̄nyā kē ī he Ɔwɔicō ɔtū fíyɛ́ ɛya kú ɛna á. Ó klla lɔhi fíyɛ́ ō je ɔbá ɛna gwɛ́ɛya lɛ ɔ́.

³²Eko nɛ̄ ācɛ nēé gē yáŋmó ā lɛ ɛ̄nyā má, ɔtū géē he uwá, ɔtū kē í tú kwu ɔtū lɛ ācɛ nēe gē gbā Ɔwɔicō ɛ̄gbā ā.

³³Óndú ā gē jāhɔ̄ lɛ ācɛ nɛ̄ ɛgbá ce uwá ā. Ó gē gwɛ̄lá ācɛ ɔlɛ́ nū nēe bá ipú agbá ā ŋ́.

³⁴Ɛcɛ mɛ́mla ɔkpáncō, mɛ́mla ísu, mɛ́mla ɔdā dóódu nēé bá ipú nū ā kéē cɛ̄tra Ɔwɔicō.

³⁵Ó géē nya Ujerúsālɛm tá, klla í tú aígelī nɛ̄hi kú Ujúda gwó. Ācɛ ɔlɛ́ nū í lā abɔ́ɔ ɛbɔ́, é klla í lé úgwū kú ajɛ ā.

³⁶Ayááyí kú ācocɛ̄hɔ̄ kú nū kē í lé úgwū ajɛ ā. Ācɛ nēe kē yíihɔtū tá ɔ̄ ā, kē í lā abɔ́ɔ.