Read idoma AÍJĒ KÚ Ɛ̄GBĀ 71 Bible Online

AÍJĒ KÚ Ɛ̄GBĀ 71 - idoma bible

AÍJĒ KÚ Ɛ̄GBĀ 71

¹Óndú, n gā ɛgiyí uwɔ ká ā gbō um ɛɛ́. Ā cɛ̄ lɛ uwēyī kwú um ŋ́.

²Abɔ̄ a le kpaakpa ā, tá um abɔ̄ ká ā lɛ um nyatá.

³Gbō um bɛ̄ɛka ápɛ́tɛ́cɔ̄ nōo gē gbō ɔ̄cɛ nōo tayínū ɛháajɛ nū ā. Gbō um bɛ̄ɛka ɔlɛ́ nɛ̄ ɔdɔ kú nū lɔfú nɛ̄hi ā. Awɔ gē gbō um, klla wɛ ɛga nɛ̄ n gē tayínū á.

⁴Ɔwɔicō kú um, lɛ um hɛ́tá ŋmá abɔ̄ kú ācobɔ̄bíipú. Lɛ um hɛ́tá ŋmá ɔfú kú ācɛ olɔnɔɔtū mɛ́mla mla ācɛ oyɔ́dābɔ̄fú.

⁵Óndú, awɔ nōo lɔfú fíyɛ́ dúú ā, nɛ̄ n leyīce á. N húmáyī lɔtū ce uwɔ ŋmífī nɛ̄ n wɛ ɔyípɛ̄ŋcɛ́ ā.

⁶Awɔ nɛ̄ n húmáyī, gboló ce uwɔ ŋmífī nēé ma um ā. Awɔ kē húmáyī gbō um ŋmá ɛ̄cī nɛ̄ ɛ́nɛ́ ma um á. N géē yɔ̄ ī cɛ̄tra awɔ eko dóódu.

⁷Oyēeyī kú um húmáyī wɛ ɔdā ocābɔ̄ lɛ ācɛ alɛwa. Ohígbū ka awɔ húmáyī wɛ ɔ̄cɛ nōo gē gbō um klla ī lɛ ɔfú tū um iyē á.

⁸N géē yɔ̄ ī cɛ̄tra awɔ eko dóódu klla ī wóofu iyē kú uwɔ.

⁹Ā tá um tonú eko ókplícī kú um nyā gɛ ŋ́. Ɛ́ɛ́ nāa gē mabɔ̄ um tá eko nyā nɛ̄ ń lɔfú gɛ ŋ́ mā ŋ́.

¹⁰Aólɛlā kú um gē tíne kéē kwú um ú ŋmó. É le ɛlā um tóokónu gē ka eko dóódu, anɔ́ɔ é bá gē tūujɔ̄ obɔ̄bí tū um á.

¹¹É kahíníī, “Ɔwɔicō le igbīhi cē kwu ɔ́ ɛɛ́, ālɔ̄ nū ɔ̄ nyɔ̄ ká ālɔ̄ lɛ ɔ́ kwú, ohígbū ka ɔ̄cɛ dúúmā í yɔ̄ nōo géē hɛ́ ɔ̄ tá gɛ ŋ́.”

¹²Ɔwɔicō, ā yɛ ligbō gwō um tá ŋ́, Ɔwɔicō kú um, wā fíyaa í tá um abɔ̄.

¹³Lɛ ācɛ nōo gē nuunu tá um nyā yálé, ká ā lɛ uwá yíífi. Lɛ uwēyī je lɛ ācɛ nēe ī dɔ̄ɔ̄kā ō yá um ɔdōbɔ̄bí ā.

¹⁴N géē kpó ɔtūce uwɔ, n klla í yɔ̄ ī cɛ̄tra awɔ fíyɛ́ eko dóódu.

¹⁵N géē bī ɔdā olɔhi nāa yá ā tɔ́ɔna. N géē yɔ̄ ī ka ɛ́gɛ́nɛ̄ a gē nya ācɛ tá lɛ ā eko dóódu, nááná nɛ̄ ń jé ɛyí nū dúúdú ŋ́ mā.

¹⁶N géē cɛ̄tra uwɔ ohígbū ka a lɔfú, Ɔwɔicō nōo fíyɛ́ dúú. Olɔhi nāa yá lɛ ācɛ ɔlɛ́ uwɔ ōfōōfūnū ā nɛ̄ n géē bī tóokónu yɔ̄ ī ka á.

¹⁷Ɔwɔicō, ŋmá eko ɔyípɛ̄ kú um nāa nwū um ɛlā á, n géē yɔ̄ gē tɔ́ɔna kú úklɔ́ idáagó kú uwɔ tɛ́ɛcɛ kpɔ́.

¹⁸Abɔ̄ n kwú hīla ókplícī nɛ̄ īnyīlɛyí kú um kwú pīya ɛnɛ̄hɛ́ ɛɛ́ mā, nááná ā, Ɔwɔicō kú um, ā cīgbīhi kwu um gɛ ŋ́. Yɔ̄ mla um, eko nɛ̄ n gē tɔ́ɔna kú úklɔ́ idáagó nāa yá mɛ́mla ɔfú kú uwɔ lɛ aɛ́gɔ́ kú eko ɔhá nōo ī wā ā.

¹⁹Ɔwɔicō, olɔhi mɛ́mla okpaakpa kú uwɔ ā, yɛ jāā ga ɔkpáncō. A yá ɔdā nɛ̄hi alɛwa, ɔ̄cɛ dúúmā í lɛbɛ̄ɛka awɔ ŋ́.

²⁰A le unwalu mɛ́mla ōwē tū klá um, nááná ā, a géē je ɔfú kú um cīgbīhi gā um. Á kē gáā yá ká n̄ kwú ga ipú únóji ŋ́.

²¹A géē yá ká n̄ kwú jājīlīmā fíyɛ́ otɛtɛ. A klla í tá um ɔtū lé kpɔ́ ɛ́ɛ́.

²²N géē gwō ɛ̄ngwū ká n̄ cɛ̄tra uwɔ. N gē cɛ̄tra okpaakpa kú uwɔ, Ɔwɔicō kú um. N géē gwō ɛ̄ngwū klla í gwíijē olɔnyɛ lɛ awɔ, Ɔwɔicō nōo tīihɔ nɛ̄ Ísrɛ̄lu gē gbā ā.

²³N géē tɔ́ɔga kú éeyē nōo mu um ipú, abɔ̄ n géē gwó ɔdā ō bī gwíijē gā uwɔ ā. N géē bī odúúdú odo kú um lɛ gwíijē gā uwɔ ohígbū ka a le um nyatá ɛɛ́.

²⁴N géē bī okpaakpa mɛ́mla olɔhi kú uwɔ tóokónu yɔ̄ ī ka eko dóódu. Ohígbū ka a le ācɛ nēe tíne kéē ŋmó um ā yálé, le uwēyī kpó tū uwā ɛyí.