Read idoma AÍJĒ KÚ Ɛ̄GBĀ 72 Bible Online

AÍJĒ KÚ Ɛ̄GBĀ 72 - idoma bible

AÍJĒ KÚ Ɛ̄GBĀ 72

¹Ɔwɔicō nwū ɔcɛ́ kú alɔ ɛ́gɛ́nɛ̄ a ī kɛpɔ̄ kpaakpa lɛ ā. Ká ā klla lɛ ɛlá ɔkwɛ̄yi kú uwɔ nwū ɔcɛ́ kú alɔ dúú.

²Cɛ́ɛ́ kóō géē gbō ācɛ ɔlɛ́ uwɔ ipú okpaakpa. Kóō gbó ācɛ nēé gē piyatū ā ipú ɛpɔ̄ okpaakpa.

³Yá ka ajɛ ā kóō yá ɔdɛ̄hɔ̄ lɔɔlɔhi lɛ ācɛ ɔlɛ́ uwɔ, ohígbū ka ācɛ ɔlɛ́ uwɔ bá ī yá ucē okpaakpa.

⁴Yá ka ɔcɛ́ kóō hɛ̄pɔ̄ okpaakpa lɛ aólɛhá. Kóō hɛ́ ācɛ nɛ̄ ɛgbá ce uwá ā tá. Cɛ́ɛ́ kóō lɛ ācɛ nēe gē yá ācɛ ŋmó ā kpó yíífi.

⁵Ɔcɛ́ ā mɛ́mla ayááyí nū kéē lé ɔcɛ́ piyóó bɛ̄ɛka ɛnɔ mɛ́mla ɔyā nēe kwu icō gē fíyajɛ piyóó ā.

⁶Ɔcɛ́ ā kóō lɛbɛ̄ɛka ɔwɔ nōo gē yá klá aɔ́dɛ̄hɔ̄ nēe bá gē jɛ̄ ā, mɛ́mla ísu nōo gē kpó éŋkpɔ̄ tū ajɛ ā.

⁷Okpaakpa kóō nyīla ga ɛbɛɛbɛ eko nɛ̄ ɔcɛ́ ā í yēeyī ā. Ká ɛbɔ́ mɛ́mla agbénú kóō yɔ̄ piyóó ipú ajɛ kú nū jāā gbéeko nɛ̄ ɔyā í yɔ̄ gɛ ŋ́.

⁸Ajɔ̄ɔ̄cɛ́ kú nū kóō yɔ̄ ŋmá ísu éyi ga ísu ɔhá, ŋmá ísu kú Uyúfarétīisi ga oŋmɛ́yí kú ɛcɛ.

⁹Aólɛlā kú nū kéē túkpɛ́ɛ̄ iyɔ̄bū nū, kéē cɔ̄nyā lɛ ɔ́.

¹⁰Aɔ́cɛ́ kú Utásisi mɛ́mla ācɛ kú ajɛ kú aídɔ ā, kéē gbā ɔcɛ́ kú alɔ ɛ̄gbā. Aɔ́cɛ́ kú Ussɛ́ba mɛ́mla Usíba kéē bī ɛhi wā í gbā ɔcɛ́.

¹¹Odúúdú aɔ́cɛ́ géē túkpɛɛ́ iyɔ̄bū nū. Odúúdú aéwo klla í gbā ɔ̄ ɛ̄gbā.

¹²Ó hɛ́ aólɛhá nēe jikwū klá anú mɛ́mla ācɛ nɛ̄ ɛgbá ce uwá nēé lɛ ɔ̄cɛ o tá uwā abɔ̄ ŋ́ mā tá.

¹³Ó gē ményinyi ācɛ nēé lɔfú ŋ́ mɛ́mla aólɛhá ā. Ó klla gē nya oyēeyī kú uwā tá.

¹⁴Ó gē hɛ́ uwā tá ŋmá abɔ̄ kú ācɛ nēe lɔnɔɔtū ā mɛ́mla ācɛ nēe ī pīya uwá tū ā. Oyēeyī kú uwā ce ɔ́ ɛgbá nɛ̄hi.

¹⁵Ɔcɛ́ ā kóō yēeyī piyóó. Ācɛ kú Ussɛ́ba kéē kpó ugóolu (oje ɔdɔ) gē lɛ ɔ́. Ācɛ kéē gbɔ̄ɔkɔ ohígbū ɔcɛ́ eko dóódu.

¹⁶Īkpɔ̄dɛ̄hɔ̄ kóō le nwuné ipú ajɛ ā. Aɔ́dɛ̄hɔ̄ kéē le jɛ̄ klá aɛ́fu nēe í gwá īkpō bɛ̄ɛka ákú ɛga nēé hī Ulɛ́bānɔn ā. Ācɛ kéē nyīla tū aígelī nɛ̄hi ā bɛ̄ɛka ácí nēe ī bū tá ipácí ā.

¹⁷Iyē kú ɔcɛ́ ā kóō lɛ́ɛcɛ piyóó. Ofū kú ɔcɛ́ kóō fíyajɛ bɛ̄ɛka ɛnɔ ā. Ācɛ kéē gbɔ̄ɔkɔ lɛ Ɔwɔicō kóō hɔ́ɔhā ce uwá ɛ́gɛ́nɛ̄ ó hɛ́ ce ɔcɛ́ ā, kéē klla gbɔ̄ɔkɔ kóō le lɔhi lɛ ɔ́.

¹⁸Aá cɛ̄tra Óndú ā, Ɔwɔicō nɛ̄ Ísrɛ̄lu gē gbɛ̄gbā ā. Anú ōfōōfūnū gē yá ɔdā idáagó á,

¹⁹Aá cɛ̄tra anú piyóó kóō lɔfú tōōtū ɔ̄. Ɛgahi kú nū kóō le mu odúúdú ɛcɛ. Aamí, Aamí.

²⁰Ɛ̄nyā wɛ oŋmɛ́yí kú ɔkɔ nɛ̄ Udéfīdi ɔyí kú ɔlɛ́ Ujése gbā á.