Read idoma AÍJĒ KÚ Ɛ̄GBĀ 73 Bible Online

AÍJĒ KÚ Ɛ̄GBĀ 73 - idoma bible

AÍJĒ KÚ Ɛ̄GBĀ 73

¹Ɔ̄kwɔɔkwɛ̄yi, Ɔwɔicō lɔhi lɛ ācɛ kú Ísrɛ̄lu. Ó kē lɔhi lɛ ācɛ nēe ī gbā ɔ̄ ɛ̄gbā mla ɔtū ékpónú ā.

²Amáŋ ami ā, ó hile lígíí ká n̄ má gwōnū. Ɛtrɔ kwú um ikpó igbō.

³Ohígbū ka n yɔ̄ í mímálānyī kú ācɛ nēe ī gɔ̄ ā, eko nɛ̄ n má ka ó yɔ̄ ī lɔhi lɛ ācobɔ̄bíipú ā.

⁴É jé ɔnɔ kú ɔdā dúúmā ŋ́. É kē lɔfú iyē, é klla dōōcē ŋ́.

⁵É móōwē nɛ̄ ācɛ ɔhá gē má ā ŋ́, ɛ́ɛ́ nēé gē lɛ unwalu nɛ̄ ācɛ ɔhá gē lɛ ā ŋ́.

⁶Ohígbū ɔ́ɔmā ā, é lɛ ɔbɔ́ɔ̄cɛ tū ɔkɔ bɛ̄ɛka agbá ō tɔ̄ɔkɔ ā. É klla lɛ ɔnɔɔtū wiyē bɛ̄ɛka úwé ā.

⁷Ɔtū kú uwā le mu mla ɛlá ōbɔ̄bí, odo kú uwá yɔ̄ ī gbɛlá klla ī yá ojuju kú ɔ́bíipú piyóó.

⁸É gē yɛhɛ tū ācɛ ɔhá klla ī kɛlā obɔ̄bí. É gē yɔ́bɔ́ɔ̄cɛ́ klla gē tū ujɔ kú aá pīya ācɛ tū.

⁹É gē ka obɔ̄bí kú Ɔwɔicō nōo yɔ̄ ɔkpáncō ā, klla ī je ɔ́da kú ɔbɔ́ɔ̄cɛ lɛ ɛjɛ̄ɛ̄jī ācɛ kú ipú ɛcɛ.

¹⁰Jāā nɛ̄ ācɛ kú Ɔwɔicō ā, ká ē ī yɛce ucē nēé yá ā. É klla ī kpɔ́tūce ɔdā dúúmā nēé ka ā.

¹¹É kahíníī, “Ɔwɔicō í jé glá ŋ́, anú nōo lɔfú fíyɛ́ dúú ā, í gáā jɔ́ɔkwu alɔ ŋ́.”

¹²Ɔdā nɛ̄ ācobɔ̄bíipū ā ī ka ā yɔ̄ á. É lɛ agbénú nɛ̄hi eko dóódu, é klla ī lɛ tōōtɔ̄ɔ̄ eko dóódu.

¹³Ayíka n lɛ īyī um tū yēŋēē ŋmá ínoōbīya icííci nɛɛ?

¹⁴Ɔwɔicō, a húmáyī yá um ka n̄ móōwē ɛ̄cī odunkwulu. É kē ī yá um italā ɔ̄cɔ̄ɔ̄cī dóódu.

¹⁵Ɔ́dāŋ ka n lɛ ɛlā ɛ́gɔ́ɔmā ka, ayíka ń yá ucē bɛ̄ɛka, éyi kú ācɛ kú uwɔ ā ɛ́ɛ́ gɛ ŋ́.

¹⁶N yá ká n̄ jɛ́yí unwalu nyā, amáŋ ó lɔnɔ tū um ō jɛ́yí nū nɛ̄hi.

¹⁷Jāā gbéeko nɛ̄ n le tá ipú Agblīihɔ-nɛ̄hi kú uwɔ, abɔ́ɔ ā, nɛ̄ n gáā jé ɔdā nōo géē yá ācobɔ̄bíipú ā á.

¹⁸Ɔkwɛ̄yi, a géē je uwá ce ɛga nōo gē plla nɛ̄hi, cɛ́ɛ́ é kwú plla ŋmá abɔ́ɔ gaá kwú yíífi.

¹⁹É kwú yíífi ŋmá ajɛ bōōbū, é klla le pɛ́ ga ɔlíkɔtɔ obɔ̄bí nɛ̄hi.

²⁰É lɛbɛ̄ɛka ɔ̄na nɛ̄ ɔ̄cɛ nā otú, kwú mlanyī nū ɔ̄cɔ̄ɔ̄cī ā. Óndú eko dúúmā nāa cāŋjɛ abɔ̄yī uwɔ, é gebí tāajɛ.

²¹Eko nɛ̄ ɔtū yɔ̄ í wú um nɛ̄hi, nɛ̄ ɔtū le bīya gā um nɛ̄hi ā,

²²n kwú pīya olíla bɛ̄ɛka álá ā, ohígbū ka ń jíípú uwɔ ŋ́.

²³Nááná ā n̄ yɔ̄ kwu uwɔ ajaajɛ kpɔ́, a le abɔ̄ tū um abɔ̄lɔ́ná.

²⁴Ukɔ́ nāa gē tū um ā gē bī um jé ɔwɛ á. Igbīhāajɛ, a mīyɛ um ipú ojīlīmā.

²⁵Ɔ̄nyɛ ɔhá nɛ̄ n lɛ ɔkpáncō gwū uwɔ tá ā. Ɛ́gɛ́nɛ̄ a wɛ ákú um ā, ɔnyɛ ɔhá nɛ̄ n gē tíne ipú ɛcɛ nyā kpɔ́ ɛ́ɛ́ gɛ?

²⁶Odo mla iyē kú um lɔfú kwáahi glá, amáŋ Ɔwɔicō wɛ ɔfú kú um á, anú ōfōōfūnū ce um ɛgbá á.

²⁷Ācɛ nēe cīgbīhi kwu uwɔ ā, Óndú, géē je kpó yíífi piíí. A géē je ācɛ nēé yɛ ce uwɔ kpaakpa ŋ́ mā kpó yíífi ŋmá ajɛ.

²⁸Amáŋ, ami ā, ó lɛ ɔhi gā um nɛ̄hi nɛ̄ n kwu Ɔwɔicō ajaajɛ, nɛ̄ Óndú, Ɔwɔicō ī gbō um, cɛ́ɛ́ ká n̄ yɔ̄ ī ka odúúdú ɔdā nɛ̄ ó yá ā tɛ́ɛcɛ gbōmgbōm.