Read idoma AÍJĒ KÚ Ɛ̄GBĀ 74 Bible Online

AÍJĒ KÚ Ɛ̄GBĀ 74 - idoma bible

AÍJĒ KÚ Ɛ̄GBĀ 74

¹Ɔdíyá nāa cīgbīhi kwu alɔ lɛ ā Ɔwɔicō? A géē yɔ̄ ī cɔ̄nū mla ācɛ ɔlɛ́ uwɔ piyóó nɛɛ?

²Blakwu ācɛ ɔlɛ́ uwɔ, nāa fu lɛ īyī uwɔ ŋmá ígblé ā. Ācɛ nāa kpo wɛ̄ɛcɛ ŋmá ajɛ kú ɔfiyɛ kéē kwú pīya ipɔ́ɔma kú uwɔ ā. Blakwu ɛyí ɛfu kú Usáyɔn, ɛga nāa tɛtɛ lā ā.

³Wā gaá má aɔ́dā nēe kpó yíífi dúúdú nyā. Aólɛlā kú alɔ kwú ɔdā dóódu nōo yɔ̄ ipú Agblīihɔ-nɛ̄hi ā ú kpó yíífi ɛɛ́.

⁴Aólɛlā kú uwɔ le ɛgba ōgwú dɛ̄ ipú Agblīihɔ-nɛ̄hi kú uwɔ ā ɛɛ́. É kwú otúta kú uwá ú kwu ajɛ ipú Agblīihɔ-nɛ̄hi kú uwá ā, gē mafū ka aá le yálé ɛɛ́.

⁵É lɛbɛ̄ɛka ācɛ nēe bá ipú ūpū, bī āgā ī tū ɔcí ā.

⁶É bī āgā mɛ́mla omútāgā lɛ odúúdú ɔcī kú Agblīihɔ-nɛ̄hi kú uwɔ kpó yíla ɛɛ́.

⁷É kwú Agblīihɔ-nɛ̄hi kú uwɔ ā ú wúlatāajɛ klla kwú ɔ̄ ú tū ɔlá. É kwú ɛga nɛ̄ ācɛ gē gbā uwɔ ɛ̄gbā ā ú nyílá.

⁸É tíne kéē lɛ alɔ kpó yíífi dúúdú. É lɛ ɛga otīihɔ dóódu kú ajɛ ká alɔ ā kpó tū ɔlá.

⁹Ɔdā ōcābɔ̄ otīihɔ kú alɔ dóódu ā í yɔ̄ gɛ ŋ́. Ācomɛ́ɛbɛ dúúmā í hile gɛ ŋ́, ɔ̄cɛ í ke jé eko nɛ̄ ɛ̄nyā í yá lɛ ā, gáā kwu ā ŋ́.

¹⁰Eko nyá, Ɔwɔicō, nɛ̄ aólɛlā kú alɔ géē yɛhɛ tū uwɔ gaá kwu ā? É géē bá ī cá uwɔ ɛcá piyóó mɛ́ɛ?

¹¹Ɔdíyá nāa tá kóō tá alɔ abɔ̄ ā? Kwú abɔ̄ kú uwɔ ú kpó ŋmá igbīhi cɛ́ɛ́ ká ā lɛ aólɛlā kú alɔ kpó yíífi.

¹²Ɔwɔicō, awɔ húmáyī wɛ ɔcɛ́ kú alɔ ŋmá ajaajɛ á, A hɛ́ alɔ tá igbo alɛwa ɛɛ́.

¹³A bī ɔfú nɛ̄hi kú uwɔ ā lɛ ísu kɔ́ ɛpa lɛ alɔ, a klla le aíkpɛ̄yí kú aɛ́bɛ́ obɔ̄bí nɛ̄hi kú ipú ísu ā kpó ca.

¹⁴A le ɛbɛ́ obɔ̄bí nɛ̄hi kú itekwū nēé hī ka Ulébīyātan ā ŋmó klla kwú ɛbɛ́ kú nū ú lɛ aɛ́bɛ́ kú ígbíli kéē kwú lé.

¹⁵A yá ka aúnjɔlɔ mɛ́mla ɔkpá kéē pɛ́. A kē cɛ̄ lɛ aísu nēé gē ŋmó tɛtɛ ŋ́ mā kéē kwú ŋmó.

¹⁶Awɔ yá otú mɛ́mla ɔlɛ́ɛnɔ á. Awɔ kpó ɛnɔ mɛ́mla ɔyā kwu ɛga nēé kwu á.

¹⁷Awɔ tū ɛjī kú ɛcɛ á, awɔ yá ɔnɔ̄ mɛ́mla ɔgwā á.

¹⁸Amáŋ, Óndú, bla ka aólɛlā kú uwɔ, bá ī yɛhɛ tū uwɔ. É lɛ ɛlá wu ɛlā kú uwɔ ŋ́, é klla bá ī leyī gwō uwɔ bónū.

¹⁹Ā mā ācɛ ɔlɛ́ uwɔ nēé lɛ ɔ̄cɛ nōo ī tá uwā abɔ̄ ŋ́ mā, tá lɛ aólɛlā kú uwā, nēe lɛ ɔnɔɔtū nɛ̄hi ɔ́ɔmā ŋ́. Ā je mlanyī ācɛ ɔlɛ́ uwɔ nēé bá í yá ŋmó ā ŋ́.

²⁰Blakwu okónu nāa ce mla alɔ ā. Ācɛ bá yɔ̄ ī yá ɔdōbɔ̄bí ɛga odobū dóódu kú ajɛ kú alɔ ā.

²¹Ā cɛ̄ kú uwēyī kóō lɛ ācɛ nēé gē pīyatū ā kwú ŋ́. Yá ka aógbɛhá mɛ́mla ācɛ nɛ̄ ɛgbá ce uwá ɔ́ɔmā kéē cɛ̄tra uwɔ.

²²Cāŋjɛ abɔ̄yī uwɔ, Ɔwɔicō, ká ā nuunu lɛ īyī uwɔ. Bla ka ācɛ nēé jé awɔ nōo wɛ Ɔwɔicō ŋ́ mā, bá ī yɛhɛ tū uwɔ ɛ̄cī dóódu.

²³A híī mlanyī ɛgba kú ícɔ̄nū kú aólɛlā kú uwɔ mɛ́mla uya nɛ̄ é bá ī yá piyóó ā ŋ́.